¹ Fa nieriserisy gny mahakasiky anizay iaby zay tato an-saiko zaho mbo hahatakarako mahakasikin'gny olo-mary vo gny olo-kendry vo reo asan'ereo. Eo am-pelatagnan'Agnahary aby ereo iaby. Sy misy ndre ia ndre ia mahay ndre ho fitiava ndre ho falaigna gno ho boakamin'gny olo raiky. ² Mitovy gny lahasy gny kiraikiraiky. Mitovy gny lahasy mandigny gny olo-mary vo gny olo rasy fagnahy,gny soa, gny malio vo gny maloto, vo ze manao soro vo ze sy manao soro. Ho faty gny olo-mary, dra manahaky anizay avo koa gny panota. Ho faty ze mifata, dra manahaky anizay avo koa gny olo ze matahosy manao fifanta. ³ Misy lahasy rasy ho an'gny raha aby ze ahy eto ambany masoandro, lahasy raiky ho an'gny kiraikiraiky. Feno rasy gny fon'olombelo, vo ao am-pon'ereo gny hamola no mbo velo koa ereo. koa afaran'izay dra magnagny amin'gny maty ereo. ⁴ Fa ndre ia ndre ia miombo amin'gny velo aby, dra misy fagnatena, manahaky gny mahasoa loasy gny amboa vel noho gny liona maty. ⁵ Fa gny olombelo dra mahafatasy fa ho faty ereo, fa gny maty sy mahafatasy ndre ino ndre ino. Sy mana valisoa sasy ereo, akory fa aligno gny fahasiarova andreo. ⁶ Gny fitiava, gny falegna, vo gny fagnirian'ereo dra fa nanzavo hatry gny ela. Sy hana toera amin'gny raha aby ze ahy etiky ambany masoandro sasy ereo. ⁷ Mandehana amin'gny lalanao, hano am-pifalia gny mofonao, dra inomy amin'gny fo faly gny divainao, akory Zagnahary dra magneky gny fankalaza reo asa soa. ⁸ aoky ho fosy mandrakariva gny akazonao vo aoky ho voahosisy amin'gny dililo gny lohanao. ⁹ Miaigna am-pifalia mindray amin'gny valy taianao amin'gny androm-piaignanao aby mandalo fahatany, dra reo andro ze nomen'Agnahary anao tegny ambany masoandro mandris'ireo andronao mandalo fahatany. Zay gny valisoanao amin'gny fiaigna noho reo asanao tegny ambany masoandro. ¹⁰ Ndre ino ndre ino hitan'gny tagnanao ahy, dra hiasao amin'gny herinao zay akory sy misy aza na fagnazava na fahalala na fahendre agny amin'gny Fiaignan-sy hita, ze handehanao. ¹¹ Fa nahita raha sasasasan mahaliana teo ambany masoandro zaho: Gny lomay dra sy an'gny olo malaky fandehana. Gny aly dra sy an'gny olo matazaky. Gny mofo sy an'gny olon-kendry. Gny harena dra sy an'gny olon'gny fahazavan-say. Gny sitraky dra sy an'gny olon'gny fahalala. Fa kosa, gny fotos vo gny vinta dra miantraiky amin'izy iaby. ¹² Fa sy misy ndre ia ndre ia mahafatasy gny fotoa hahafatesany, manahaky gny fian-drano zay trasy ao amin'gny haraton'gny fahafatesa, na manahaky gny voro zay azon'gny fandriky. Manahaky reo biby, gny olombelo dra gadra ao amin'gny fotoan-drasy zay avy tapoky amin'ereo. ¹³ Fa nahita fahendre teo ambany masandro avo koa zaho sahala gny ho lahibe taminahy zay. ¹⁴ Nisy tana keliky raiky zay masaiky olo tao aminazy, dra nisy pazaka lahibe avy nanao fahirano anizay dra nagnory toera fekara lahibe teo agnilan'izay. ¹⁵ Dra nisy mahatra raiky, lelahy hendry hita tao amin'gny tana, zay nagnavosy gny tana tamin'gny fahendreny. Nefa tafara keliky tatiky, dra sy nisy nahatadidy iho lelahy iho sasy. ¹⁶ Ka feheziko amin'gny ho: " Soa loasy gny fahendre noho gny tazakay, kanefa nahy sinosino gny fanendren'gny olo-mahatra, vo sy re reo zakany." ¹⁷ Gny zaka malefaky gny hendry dra re soa loasy noho gny fitreroman'ize panapaky eo amin'gny mola. ¹⁸ Gny fahendre dra soa loa noho reo fitova-pialia amin'gny aly, kanefa gny panota raiky dra mety handrava soa maro.