¹ Sahala reo fatin-dalisy zay mahamembo gny raha magnisy, dra manahaky anizay koa gny ahafahan'gny fahamola keliky mandresy gny fahende vo gny fakatoava. ² Gny fon'gny olon-kendry dra mirona miakavana, fa gny fon'gny mola mirona miakavia. ³ No fa mandeha mizoso egny an-dala gny mola, dra sy apy say izy, magnamary amin'gny olo aby fa mola izy. ⁴ No miakasy manohisy anao gny fiheseham-pon'gny panapaka, ka manenga gny asanao. Gny fitonia dra afaky mapisigny hahoria lahibe. ⁵ F a misy gny rasy zay hitako teo ambany masoandro, karaza hadisoa boakamin'gny panapaky: ⁶ Reo mola dra nome toeram-pitahiriza, vo reo olo mahomby nome toera ambany. ⁷ Nahita andevo nitikisy sovaly zaho, vo reo olo mahomby nandeha tomboky tegny amin'gny tany manahaky gny andevo. ⁸ Ze iaby mihaly lavaky dra mety hilavo amin'izay ao, vo ndre ombia ndre ombia misy olo mandripaky fefy dra mety ho hifarin'gny bibilava izy. ⁹ Ze iaby manapaky vato dra mety ho voaratrin'izay, vo gny olo ze manapaky hazo dra talion'izay izy. ¹⁰ No domo gny lelan'gny vy, vo gny olo sy mandragnisy anizay, dra sy mainsy mapiasa gny heriny bebe kokoa izy, fa gny fahendre dra magnome tombony ho amin'gny fahombiaza. ¹¹ No magnifasy mialohan'gny nahamasy aoly gny bibilava, dra sy misy tombony ho an'gny panao aoly. ¹² Reo zakan'gny olon-kendry dra hasaram-pagnahy, fa gny sogny gny mola da mitly anazy avo. ¹³ Manahaky gny zaka manomboky mikoria boakeo am-bavan'gny mola, gny hiboahan'gny hamola, vo amin'gny farany gny vavany dra hioria fahaverezan-say rasy. ¹⁴ Gny mola mapitombo zaka, fa gny sy misy mahafatasy ze ho avy. Ia gny mahay ze ho boakao afarany? ¹⁵ Gny firokafan'gny mola dra magnavesasy andreo, ka sy fatany aby ndre dra gny lala magnagny an-tanan-dahibe aza. ¹⁶ Loza ho anao, ry tany, no tovolahy gny pazakanao, vo no manomboky manao firavoravoa amin'gny maraindray reo pitariky anao! ¹⁷ Fa sambays hanao, ry tany, no gny zanadahin'ireo magneva haza gny pazakanao, dra mihina amin'gny fotoany reo pitariky anao, ho tazaky, fa sy ho amin'gny hamamoa! ¹⁸ Fa nohon'gny hakamoa gny mapilasaky gny tafo, vo nohon'gny fahalegnan'gny tagna gny mapitete gny tragno. ¹⁹ Magnoma hany ho amin'gny fihomeheza gny olo, gny divay manday fakafiza fiaigna, vo gny vola mameno gny filan-draha aby. ²⁰ Ka magnozo gny pazaka, ndre dra an-sainao aza, sady ka magnozo gny olo pagnarivo ao amin'gny efisy fandrianao. Fa gny voron'gny lagnisy mety handay reo zakanao: ze iaby managn'elasy dra afaky magnaparitaky gny raharaha.