¹ Raha tao Ikonioma i Paoly sy Barnabasy da niara-nitsoky tao amè Synagogan'ny Jiosy sady nikoraha fa gne vahôka maro be Jiosy sy Grika koa sa da nino. ² Fa gne Jiosy tsy nagneky da nagnakorotagny gne fisian'gne Jentilisa ka nahatonga andreo hanohitry gne rahalahy. ³ Da nipetraky ela be teo indreo, sady nizàka tsisy tahatry niaraky tame herin'i Tompo tamè nagnomezany porofo mikasiky gne fahasoavany. Izany gne naniny tamè alalan'gne famatara sy fahagagà tamindr'i Paoly sy Barnabasy. ⁴ Kanefa da gne akamaroan'olo teo amè tanà da nizarazara: gne sasany niaraky tamè Jiosy ary gne sasany niaraky tamè Apostôly. ⁵ Raha nagnandra nandresy lahatry gne mpitariky endreo gne Jentilisa sy gne Jiosy mba hamono an'i Paoly sy Barnabasy, ⁶ da lasa nifiny indreo sady nilefa nalakilaky tagny amè tanàn'i Lykaonia, Lystra, Derbe sy gne tanà magnodidy gne faritry, ⁷ ka tagny indreo gne nitory gne filazatsara. ⁸ Nisy lehilahy raiky zay nipetraky teo Lystra, kilemaigny latagny atrokin'iendriny sady efa tsy nahay nandeha atram'zay. ⁹ Rèn'io lelahy io i Paoly raha nizaka. Niperitry enazy tsara teo amè masony i Paoly ka nahita fa olo mana finoa sady ho sitragny izy. ¹⁰ Nizàka taminazy tamè feo mafy be izy hoe: "Mitsangàna amè tombonao anao." Raha avy teo da nitsambikimbiky izy sady nandeha tegny amè magnodidy tegny. ¹¹ Raha nahita gne nanin'i Paoly gne vahôka maro be tao da nikoikoiky mafy nizaka tamè jaka Lykaonia hoe: "Da itoa gne Andriamanitry nijotso avy akaboa agny nidigny amitsika sady niseho amè endrik'olo. ¹² Fa i Barnabasy da nangiandreo hoe "Jopitera," satria mpikabary izy. ¹³ Io mpisoron'i Jopitera io gne nitondra aomby sady nofieziny gne lohany teo amè vavahady, fa gne Tempoly koa sa da teo akeky gne tanà teo avao, sady koa gne vahôka maro da nagniry gne hagnome raha atao soro." ¹⁴ Gn'Apôstoly Barnabasy sy Paoly, raha vatany naharè izany avy da nanetry gne lambany indreo sady da raoky niazakakazaky malaky hagnato gne vahôka nitretre sady nizaka hoe: ¹⁵ "O Rony e, ino ity raha naninareo ty me? Iahay toa koa sa da olo mitovy aminareo evakoa sady mahafantatry anizany. Matoa iahay mitondra gne filazatsara aminareo mba elànareo amè raha ratsy sady hitodihanareo amin'Andriamanitry zay nagnano gne lanitry sy gne tany ary gne ranomasy sy gne raha aby. ¹⁶ Tamè andro taloha sa, Izy raiky evao gne nibeko gne firenè rehetra nandeha amè tandrify enazy aby. ¹⁷ Kanefa sa, izy da tsy nagneky gne tegnany tsy ho hisy vava velo, ary da hita tamizany fa nagnano gne tsara izy ary nagnome rikandro anareo avy an-dagnitry ary koa da nagnome fotoa hamokaranareo amzay gne fonareo voky sakafo sady falifaly." ¹⁸ Ndre da teo aby izany zaka maro zany, i Paoly sy Barnabasy tsy nijano gne nitazo gne vahôka maro be mba tsagnano soro hoandreo. ¹⁹ Gne Jiosy sasany avy agny Antiokia sy Ikonioma da avy tagny ary nadresy lahatry gne vahôka. Io olo io gne nitora-bato an'i Paoly sy nitariky enazy hiala gne tanà tamizay, sady nieritreritry indreo fa maty izy. ²⁰ Raha mbola nitsanga nagnodidy anazy teo gne mpianatry da nitsanga izy sady niditra tao amè tanà. Gn'omarain'igny, da raoky izy nandeha agny Derbe niaraky tam'i Barnabasy. ²¹ Raha avy tagny indreo da mbola nagnanbara gne filazatsara tamin'io tanà io sady da mbola nahazo mpianatry maro koa, avy eo nipody tagny Lystra, tagny Ikonioma sy tagny Antiokia. ²² Tam'zay indreo da nankahery gne fanahin'gne mpianatry tao sady nandrisiky andreo mba hanohy gne asa ao amè finoa sady nizaka hoe: "Ambarako aminareo eto sa fa tsy maintsy amè fahoria maro be gne afahatsika hiditry am'zany fanjakàn'gne lagnitry zany." ²³ Raha nanendry loholo ho andreo isam-pengona indreo sady nivavaky tamè fotoa fifadiha hany, da natolitr'ndreo ho an'i Tompo izany, izay da ninoan-dreo tokôtry. ²⁴ Nandalo tam'i Pisidia indreo ka avy tagny Pamfylia. ²⁵ Raha nitory tao Perga indreo tonga da raoky nidigny agny Atalia. ²⁶ Avy tagny indreo gne nandray sambo handeha ho agny Antiokia, izay tanà nandresan-dreo gne fahasoavan'Andriamanitry ho an' gne asa vitan-dreo. ²⁷ Raha vatany avy tagny Antiokia indreo, avy da niaraky tamè fengona nagnano tatitry gne raha vitan' Andriamanitry tamindreo sy gne fomba nanokafany varangara gne finoa ho an'gne Jentilisa. ²⁸ Da nidobòky nahadigny ela be teo niaraky tamè mpianatry indreo.