¹ Inogne'o ty hoambarantika? Ty mimane ty fanagnan-kakeo vao ty hitomboa ty fazahoam-pitahiantsoa? ² Hisy aia zay nao izao. Tika fa nimaten-kakeo, le mbe manao akore ka ty mbe hiheregnatika amy'zay ndraike? ³ Tsy hai'areo vao te ze natao batisa tami'i Jesosy Kristy ao le fa natao batisa tame ty havilasi'e? ⁴ Ao, voalevegne, nindre Amae amy ty alala ty batisa amy ty fahafatesagne tika. Nisy zay hanahaky ty nivanognam-belo i Kristy mbam'ty voninahy ty Ray, ty handenantika amy ty fiainam-baovao ka. ⁵ Fa naho magnorik'Aze manahake ty nivilasia'e tika, le hiharo amae amy ty hivelomae ka. ⁶ Haintika zay, te ty vatantika ka fa nifinatsike nindry ama'e, mba holioven-kakeo. Nisy zay tsy hahandevo hakeo'o antika. ⁷ Fa i Reke nivilasy, le notsaragne te maregne naho malio hakeo. ⁸ Naho niarake nivilasy am'i Kristy tika, le hindre havelogne Amae ka. ⁹ Fantatika te nivagnom-belogne ty Kristy, le tsy homate sasa Reke. Naho le tsy hanan-kery amae ty havilasy. ¹⁰ Fa naho ty mikasiky ty havilasy le homate amy ty hakeo Reke, nimate indraike hoantika aby Reke. Fa ie, hiaigna'e hoan'Andrianagnahare ty havelo'e. ¹¹ Hoe zay avao ka , le manòa ty tegna areo fa nimate tam'o hakeo ka nareo, fa velogne hoan'Andrianagnahare am'i Jesosy Kristy. ¹² Naho izay le ao ty vata'areo mete mate tsy handesy ty hakeo hagnoriky ty filàn-draty. ¹³ Ko mangala-kakeo hoe ty tegna'areo, ho fitaovagne amy ty raha tsy maregne. Atoloro an'Andrianagnahare ty tegna'areo, manahaky ty nampivanognam-belogne nivelogne henane'eo. Atoloro aze ty tegna'areo ho fitaovagne hampesagne hoe ty raha maregne. ¹⁴ Ko mangalake hakeo hoe ty vata'areo. Tsy raha ambane lily nareo, fa ambane ty fitahiantsoa. ¹⁵ Inogne areke? Ao le hangala-kakeo zane fa tsy ambane lily, fa ambane ty fitahiantsoa? Tsy hisy naho zay reke. ¹⁶ O'tsy hai'areo vao te iraike nitolora'areo ty tegna'areo ho mpanompo'y le iraike ho hasigne'areo, i hekae hohasigne'areo'oy? Maregne zay ndre te ie behakeo hinday amy ty fahafatesagne nareo, ndre te ie mpihasy hoamy ty raha maregne. ¹⁷ Le isaoragne ty Andrianagnahare! Ndra te ie behakeo nareo, fa ie nihasy tamy ty fiai'areo ty fomba fampenaragne ze nomeagne anareo. ¹⁸ Nilioven-kakeo nareo, le hatao mpanompo ty raha maregne. ¹⁹ Misaontsy manahake ty ndaty raho amy ty havotroa ty vata'areo. Satria vao notoloara'areo ho ndevo ty haratiagne naho ty negne ty vata'areo nareo, le manahaky zay ka zao, le atoloro ho ndevo ty fahamarinagne amy ty fihasiagne ka ty vata'areo. ²⁰ Tamy nareo mbe ny behakeo, le niafake tamy ty fahamarinagne. ²¹ Henan'eo, ao inogne areke ty vokatse niazo'areo tamy zay raha mahamegnatse anareo zay? Satria ty voka raha zay fate. ²² Fa henan'eo naho fa niliovegne ty hakeo'areo le niavy ho mpanompon'Andrianagnahare, le eva'ty fihasiagne. Havelogne hatramparae ty voka'e. ²³ Fate hoe ty behakeo, fa havelo hatramparae am'i Kristy Jesosy Andriatompotika ao ty fampitaman'Andrianagnahare.