¹ Le zay ty angataheko ama'areo, ry rahalaheko, noho ty famahàn'Agnahare, le ty mba hagnomezagne iareo ty vata iareo hatao sorom-belogne, masigne, eken'Andrianagnahare. 'Zay ro tokoe ho fagnompo'areo arake ty tokoe ho ie. ² Ko manahake ty tane aby toy, fa miovà amy ty fagnovan-tsai'areo. Ano'o zao hahafantara areo ty maregne, azo orihegne, le zotosoa an'Agnahare. ³ Fie ataliliko, noho ty fahasoavagne nameagne ahy, tsy tokoe hanagna'iareo iaby ty mivetsevetse hagnambone ty vatae mihoatse ze tokoe hovetsevetse'e. Fie, tokoe hivetsevetse amy ty hilala iareo, manahake ty nagnomeezan'Agnahare ty finoagne bey hoe ty tsikiraike . ⁴ Fa managne fizaragne tsy efa amy ty vatantika tika, fie tsy hambagne iaby ty asa'o fizaragne reo. ⁵ Manahake zay, ntikagne tsiefao le vantagne raike avao naofa amy Kristy, le managne ty fizarae manokagne ka amy ty tsikiraike. ⁶ Sambe managne ty fagnomezan-kasoa'e iaby ntika arake ty ny soa nomegne antika. Naho ty fitokiagne ro fagnomezagne hasoa ty raike, le ano'o mifagnorikea amy ty habey ty finoae. ⁷ Naho fagnopoagne ty fagnomezan-kasoa ty raike, le adogno reke hanompo. Naho nisy raike nahazo fagnomezan-kasoa hampianatse, le adogno reke hampianatse. ⁸ Naho fapaherezagne ro fagnomezan-kasoa ty raike, le adogno reke hampahere. Naho magnomey ro fagnomezan-kasoa ty raike, le adogno reke hatarike. Naho hitarike ro fagnomezan-kasoa ty raike, le adogno ho vita am-pitahoagne. Naho ty fiferegnesagne ro fagnomezan-kasoa ty raike, le adogno zay ho vita amin-kafaleagne. ⁹ Ao ty fitea tsy hoatao soa miatreke. Malaigna ty raty; tano mafe ty soa. ¹⁰ Naho ty mahakasike ty hatea ty mpirahalahy, mifankateava ama areo aby tsikiraike. Naho mahakasik ty fagnomeagne voninahitse, mifampihasia. ¹¹ Naho ty mahakasike ty filofosagne, ko misalasala. Naho mahakasike ty fagnahy, tokoe hahere arofo. Mahakasike i Andriantompo, Tompo'o Reke. ¹² Mifalea amy ty fitokisagne ze amao mahakasike ty hoavy. Miareta amy ty fahavoazao. Mivavaha avao. ¹³ Mifampizarà amy ze paiavy ty mpino. Mipaliava hevetse maro hampiantragnoagne ndaty. ¹⁴ Misaora amy ze magnenjeke azo; misaora le ko magnozogne. ¹⁵ Mindreza mifale amy ze mifale; mindreza mitagne amy ze mitagny. ¹⁶ Mitovia hevetse amy ty maro. Ko mametsevetse amy ty fomba fisengesenge, fa magnekea ty ndaty ambany. Ko mihevetse ty vatao ho hendre. ¹⁷ Ko mamale raty amy ty raty. Manoa raha soa tsiefa amaso ondaty maro. ¹⁸ Naho mete, le arake ze azo'o atao, milongoa amy ty ndaty iaby. ¹⁹ Ko mamale raty amy ty tegna areo, ry longo, fa omeo lalagne ty havigniran'Aganahare. Fa nivoasoratse te hoe: " Ahike ty vali-fate; Raho ro hamale, hoe ty Andriantompo." ²⁰ Fa naho kere ty fahavalo'o, omeo hanegne reke. Naho mangetaheta reke, omeo rano ho nomi'e. Fa naho manao hoe zay reke, le hamory baik'afo amy ty lohae." ²¹ Ko mete ho rese'e amy ty raty, fa reseo amy ty soa ty raty.