¹ Tamy ty taogne folo lime ambe nanjakà i Tiberie Kaisara - ty tamy Pontio Pilato mbe governora i Jodia, le Heroda ty mpandily ta Galilea, le i Filipo rahalahie ro tamy ty faritse Itoria naho Trakonitisy, le i Lysania le nandily ta Abilena, ² nandritse ty fisorognam-bey i Aniasy naho Kaiafa - le niavy ama i Jaona anadahy i Zakaria andiolio agne ty saontsin'Agnahare. ³ Nandeha amy ty tanagne magnodidigne i Jordana Reke, le nitaogne ty ndaty hiandro naho hiova havelogne ho fagnahagne ty hakeo. ⁴ Naho ty sinoratse amy ty boke Isaia mpitoky tihoe: "Nisy feo raike nikoike mafe boake andanitse agne manao tihoe: 'Vonogno ty lala i Andriantompo, ano'o mahitsy ty lalagne omba'e.' ⁵ Hototofagne iabike ze tonda, ze vohitse ambone handivagne, ze lalagne mihilagne le ho amboaregne hahitsy, ze toeragne mikorontagne le hampanjaregne ho lalagne, ⁶ ze nofotse le hahatrea ty tretrean'Agnahare." ⁷ Le nagnombara ze ndaty niavy hiandro tihoe ty Jaona: "Inareo foko i bajigny! Ia ty nandrara anareo hilay ty habosehagne ho avy? ⁸ A izao, le mambolea voa fagneva ty fiovan-kavelogne, ko manao izao ty agn'arofo areo te: 'Izahay fa managne i Abrahama ho rà'ay,' fa zao ty ataliliko anareo, Andrianagnahare le afake mampanjare ty vato maro toagne ho ana i Abrahama. ⁹ A hinane zao ty fekogne fa mipake amy ty foto ty hatà. Le ty hata tsy mamokatse voa soa le hotapahegne hatorake amy ty afo." ¹⁰ Le nanao izao ty ndaty iaby teo te: "Inogne areke ty hatao ay?" ¹¹ Izao ty natoi'e te: "Naho misy ndaty managne akanjo lava roe, le eva ty hizara amy ty raike tsy managne reke, le ze managne hanegne ka le hanao ho'e zay avao." ¹² Ndre ty mpitake karatse le niavy hiandro, le nanao tihoeke: " O mpampianatse, hein ty hatao ay?" ¹³ Nanao izao reke te: "Ze nampitakeagne anareo avao ro takeo fa ko mangalake ty ambone izay." ¹⁴ Le miaramila maromaro ka ty nagnontane aze, nanao tihoe: "A ty miomba anay? Hein ty hatao ay?" Joany nanao izao ama iareo te: "Ko manao dramotse fa maliova fo amy ze karama areo." ¹⁵ Naho fa sambe nadigny ty fiavia i Kristy ty ndaty, le sambe nametsevetse agn'arofo'e mahakasike i Jaona, te reke vao ke tsy reke o Kristy zao. ¹⁶ Jaona nanoigne tihoeke tamy iareo: "Naho ty amako, le rano avao ro ampiandroako anareo, fa agne ze ndaty mandako ahy ty hery'e zay, ndre ty hagnaha ty taly amy ty fandia'e le tsy magneva ahy. Hampiandro anareo amy ty Fagnahy Masige naho ty afo Reke. ¹⁷ Amy ty fita'e eo ty fikororohagne hagnaliovagne soa ty fanalakagnam-bare naho ty fijiniagne ty vare ho amy ty hisy aze, fa ho horoa'e amy ty afo tsy mete ho vonoegne ty akofa." ¹⁸ Maro ty faganaragne nindese i Jaona nagnombara ty talily soa ho e ty ndaty iabike. ¹⁹ Heroda mpandily naho fa nagnaregne amy ty fanambaliagne ty valin-drahalahi'e Herodiasy, naho ze raha maro nivita'e, ²⁰ ama ty raha manao hoe izao, le nahili'e amporozo agne ty Jaona. ²¹ Le, naho fa nivita fampiandro iabike ty ndaty teo, le nampiandroagne ka ty Jesosy, a naho mbe nivavake reke, le nisokake lanitse ey, ²² le ty Fagnahy Masigne nizotso le nanao sare voro mahilala, le nisy feo boake andanitse agne nanao tihoeke: "Ihe ro anako, teako. fale raho noho ty amao." ²³ Naho fa nanao ty asa fitorognagne ty Jesosy, le nitelom-polo taogne tey avao Reke. I Reke ro anadahi'i (naho ty vetsevetse) Josefa, ²⁴ ana i Matata, ana i Levy, ana i Melky, ana i Janay, ana i Josefa. ²⁵ Josefa le ana i Matitia, ana i Amosa, ana i Nahoma, ana i Elsy, ana i Nagay, ²⁶ ana i Mata, ana i Matatia, ana i Samey, ana i Joseka, ana i Joda. ²⁷ Joda le ana i Joanana, ana i Rase, ana i Zerobabela, ana i Sealtiela, ana i Nery, ²⁸ ana i Melky, ana i Ady, ana i Kosama, ana i Elmadama, ana i Era, ²⁹ ana i Josoa, ana i Eliezara, ana i Joreima, ana i Matata, ana i Levy. ³⁰ Levy le ana i Simeona, ana i Joda, ana i Josefa, ana i Jonama, ana i Eliakima, ³¹ ana i Melea, ana i Mena, ana i Matata, ana i Davida, ³² ana i Jese, ana i Obeda, ana i Boaza, ana i Salmona, ana i Nahasona. ³³ Nahasona le ana i Aminadaba, ana i Adimina, ana i Arny, ana i Hezrona, ana i Fazera, ana i Joda, ³⁴ ana i Jakoba, ana i Isaka, ana i Abrahama, ana i Tera, ana i Nahora, ³⁵ ana i Seroga, ana i Reo, ana i Palega, ana i Ebera, ana i Sela. ³⁶ Sela le ana i Kenana, ana i Arpaksada, ana i Sema, ana i Noa, ana i Lameka, ana i ³⁷ Metosela, ana i Enoka, ana i Jareda, ana i Mahalila, ana i Kenana, ³⁸ ana i Enosa, ana i Seta, ana i Adama, anan'Agnahare.