¹ Teako hofanta areo ty habe ty aly nataoko ho anareo, hoe iareo a Laodikia agne, hoe iareo maro mbe tsy nahita ty tareheko amy ty nofotse. ² Miasa raho mba hampahery ty fo iareo amy ty fampitraofagne iareo mindre amy ty fiteavagne naho ze kila hareagne amy ty fahalalagne atokisagne, ho amy ty fahaizagne ty fahamarinan'Andriagnahare, i Kristy zay. ³ Amy ty fanagna ty fahendreagne ao naho ze kila hilala mietake. ⁴ Mitalily zay raho mba tsy hisy hitory zaka handrese lahatse anareo. ⁵ Ndra ie tsy mindre ama'areo amy nofotse ao aza raho, le mindre ama'areo amy Fagnahy ao. Malio fo raho mahatrea ty filamina'areo soa naho ty tanja ty finoa'areo i Kristy. ⁶ Naho mandrae i Kristy Tompo nareo, le mandehana ama'e ao. ⁷ Mifotora ama'e soa, mioregna ama'e ao, mioregna amy ty finoagne ao fa nampianaregne anareo zay, le magnomea fisaoragne avao. ⁸ Miambena mba tsy ho mete ondaty hosamboregne amy ty alala ty filozofia ndra ty fitake ata'ondaty, ie magnorike ty raha atao ze kila tane, fa tsy arake i Kristy. ⁹ Fa ama'e ao te miambesatse ty hasoa ty vatan'Andriagnanahare aby. ¹⁰ Feno ama'e ao nareo. Ie ty loha ty hery naho ze kila fahefagne. ¹¹ Tama'e ao avao ka nareo te nasavatse, savatse tsy manahake ty natao ty ndaty amy ty fanampahagne ty nofotse amy ty vatagne, fa tama ty fanavara i Kristy. ¹² Nindre nalevegne tama'e amy ty batisa nareo, le tama'e tao ka ro nanaganagne anareo tama ty alala ty finoagne maherin'Andiagnanahre, ie nampijangagne aze tama iareo ze mate. ¹³ Tamy nareo mate ama o hakeo reo naho ty tsy fahavita ty nofo'areo savatse, ie ro namelogne anareo nindre tama'e naho namela antika amy ty hakeo aby. [Fagnamarenagne: misy dikan-drehake taloha manao te hoe: "le namotsotse ty hakeotika aby."] ¹⁴ Nifora'e ty taratasy ty trosam-pahafahagne naho ty lily nifanipake amantika. Nafaha'e abike zay raha zay abike , nifatsihe'e amy ty hazonajale eo. ¹⁵ Nala'e o hery reo naho o fahefagne reo, nampiboake ka reke, le i reke nanmpiboa-draha a maso'ondaty maro eo am'iareo, nadrese nadilatse am'iareo tamy ty hazonajale. ¹⁶ Le, ko apoke hisy hitsara anareo ndre amy ty fihinanagne ndre amy ty finoagne, ndre amy ty andro fete ndre amy ty volagne vaovao, ndre amy ty andro sabata. ¹⁷ Izao ty alokalo ze raha hoavy, fa ty tena ie le i Kristy. ¹⁸ Ko angagne hisy ndra ia ndra ia mipalia ty fiambanean-tegna naho ty fiantsa ty anjely hitsara anareo le tsy hahazoa'areo ty loka areo. Ty ndaty manahake zay le miditse amy ty raha hita'e le manjare mibohaboha amy ty fisaigna ty nofo'e. ¹⁹ Tsy mitagne loha'e reke, zay le avy amy ty loha'e ie namean'Andriagnanahare ty vatagne iaby amy ty tsempa-taola'e iaby naho ty oza'e magnomey le manjitse iareo aby, le mitombo zay mindre amy ty fampitomboagne nomein'Andriagnanahare. ²⁰ Naho nindre mate am'i Kristy nareo tama ty sare ty tane toy, nagninogne eo nareo'o miaigne hoe ndaty voaporetse amy ty tane toy io: ²¹ "Ko miviombiogne, ko magnandragne, ko midosy? ²² Ze kila raha iaby zao le hoe ty fahalovagne, ty toro lalagne naho ty fanoroagne ndaty. ²³ O lily reo abike le managne ty fahendrea'e ty fomba fivavahagne, ty fiambaneagne ty natao'e ambata'e le fanosoragne ty vata'e. Fa nareo le tsy misy dika'e amy tyfanoheragne o fandeferagneo amy ty fila ty nofotse.