¹ Ty mpitoky sandoke le niavy ama ty ndaty, le ty mpagnanatse lalan-kavelogne sandoke ka le hoavy ama'areo eo. Hibisebiseke raha raty mamotike an-tsaigne ao iareo, le handietse Andriantonpo nivily iareo. Iareo manao hoe io avao ro minday ty raha hanjamagne iareo. ² Maro ty hagnorike ty fitsetotseto iareo, toe ty raha hoe izao mahavy rehake raty ty lala ty maregne. ³ Ty fahatondregnagne ro higegeagne anareo reketse ty rehake vande. Tsy hoela ty hizakagna iareo hoe rey; tsy ho mbiagne ty hampidemodemoke iareo hoe rey. ⁴ Andrianagnahare tsy mitretre ze anjely niota. Fa najo ho ama ty valagny tane iareo hotanagne gadragne am-po ty iegne ao hatra ty hiavia ty fitsaragne iareo. (Fagnamaregnagne: ty fandikagne ilae te taolo agne vakiegne hoe izao te: "Ho fehegne am-po ty lavake maiegne hatra ty hiavia ty fitsaragne.") ⁵ Tsy nagnary ty tane bey toy avao ka Reke. Fa le namonjy Noah, mpitalily ty maregne, mindre ama ty fito hafa, naho nanjamagne ze raty fagnahy ty tanebey toy amy ty safo-drano Reke. ⁶ Andrianagnahare ka le nampanjare lavenoke naho nampidemodemoke ty tanagna i Sodoma naho Gomora amy ty helo'e, manahake ty raha nahazo ty raty fagnahy. ⁷ Lota ndre te ie napijaleagne maregne amy ty findesae vatagne tsy ie fa mitsetotsetoke le norombahen'Agnahare. ⁸ Fa zao lahy maregne nindre ama'iareo andro nao halegne izao, le ndaty tsy manam-pagnahy amo ze raha maregne nihita'e naho ty rey. ⁹ Hay i Andriantompo ty rombake ty soa fagnahy ama ty tso-kevetse, naho ty fomba hitanagne ty ndaty maregne halilo naho fa avy ty andro hitsaragna aze. ¹⁰ Toe le maregne izao hoe ty ndaty mimane orike magniry raha raty ty nofotse naho ty manivativa fahefagne. Loho mahavany naho mihasy ty reha'e iareo. Tsy atahora iareo ndra ty rehake raty o bevoninahitse eo. ¹¹ Lako hery naho fahefagne ty anjely, fa tsy mahavita ty ho tsara naho tivativa ze manohetse iareo amy Andriantompo ao. ¹² Natao ho tsepahegne naho zamanegne ty biby tsy manan-tsaigne. Tsy raha fata iareo ze tivativa iareo, fa ho zamagne iareo. ¹³ Handra'e ty vale ty raha raty nanoe iareo. Manao izao iareo te ty votsotse androany ro haha. Iareo hoe io ro tsivokatse naho hakeo. Tsy mahay avao iareo amy ty asa raty vande iareo naho fa miharo fihinagne ama'areo. [Fagnamaregnagne: Ty fandikagne ilae mivaky hoe izao te: "Tsy mahay avao amy ty asa'e iareo naho fa miharo fihinagne mindre ama'areo amy ty hanem-pilongoagne."] ¹⁴ Tea iareo ampela tsimiriragne eo; tsy mahaeneke ty fo iareo raha raty io. Minday ty fagnahy iareo tsy ho mate ama ty fanoagne raha raty iareo, fa niofagne hagniry ze kila raha ty fo iareo. Ana ty ompa iareo hoe rey! ¹⁵ Nienga iareo lala-kavelogne soa ao. Nitsily nagnorike ty lala i Balama ana i Beora iareo, mipay ty hoaze fa tsy ty maregne. [Fagnamaregnagne: "Ty fandikagne ilae mivaky hoe izao te: "Balama, ana i Bososra."] ¹⁶ Nasiahagne reke amy ty tsy fagnoriha'e lily manokagne. Teo izay birike moagne izay nirehake hoe ndaty nandrara ty ne i mpitoky. ¹⁷ Ty ndaty hoe rey le manahake ty lohantaogne tsy misy oragne. Manahake o rahogne ndese ty tioke bey io. Natokagne hoe iareo ty iem-bey. ¹⁸ Ze fonga raha rehafe iareo. Mitarike ndaty hila ze tea ty nofotse. Mitarike ty ndaty fa milay ty raha ota. ¹⁹ Mampitamà vatagne ho haha avao iareo, mone izao ty vatae le ndevo ty raha veta. Fa ty ndaty ndevo ze raha mahatindry aze. ²⁰ Ndre ia ndra ia afake ama ty raha ota ty tanebey toy amy ty fahafantaragne Andriantompo naho Jesosy Kristy Mpandrombake, le mbe miheregne amy ty raha ota ka, le mbe handako ze raha ho nisy voaloha'e ty raha hisy afara. ²¹ Ty nisoa'e iareo ndra ty nahafantatse ty lala maregne naho te ie mahafantatse izao ro hivalike ama ty lily masigne nimeagne iareo. ²² Maregne hoe iareo ty fagnoharagne toy te: "Ty amboa ro miheregne amy ty loa'e. Ty agnombe fa nalio ro niheregne niandro fotake ey."