¹ Tafara zay le nagnontane Yaveh ty Davida naho nanao ty hoe:" Tokone hiakatre agne amity raike amireo tana i Joda vao raho?" Namale aze Yaveh hoe:" Miakara." Hoe ty Davida hoe:" Agne amity tana aia ro tokone hombako?" Le namale Yaveh hoe:" Agne Hebrona." ² Laha zao le niakatre niarake tamireo valine roe Davida, le i Ahinoama bakagne Jezirelita, vaho Abigaila bakagne Karmela, ty mpivem-bata nenga i Nabala. ³ Ninday reo ndaty ze niarake tamine, ze sambe ninday ty fokone aby, ho agne amireo tana i Hebrona, ze nanomboke nitoboha iereo ty Davida. ⁴ Bakeo niavy reo lahilahy bakagne Joda naho nagnosotre i Davida ho mpanjaka eo amity foko i Joda. Hoe iereo tamy Davida ty hoe:" Reo ndaty Jabesi-gileada ro nandeve i Saoly." ⁵ Laha zao le nagnirake mpinday talily ho agne amireo ndaty Jabesi-gileada ty Davida naho nirehake tamiereo hoe:" Tahie Yaveh nareo, satria nareo le nanoro ze tsy fivaliha zay tamy Saoly tomponareo vaho nandeve aze. ⁶ Amizao haneho fagnen-keam-pilongoa tsy mivalike vaho fatokisa aminareo anie Yaveh. Izaho avao kea le hanoro zay hasoava zay aminareo satria nanao ze zaka zay nareo. ⁷ Ka amizao naho, ao hatanjake ty tagnanareo; managna herem-po fa mate ty Saoly tomponareo, naho ty foko Joda nagnosotre ahy ho mpanjaka eo amiereo." ⁸ Fa Abnera anadahy Nera, mpifehe ty tafike Saoly, le nangalake Isboseta anadahy Saoly naho ninday aze tagne Mahanaima. ⁹ Nanao i Isboseta ho mpanjaka i Gileada, Asorita, Jezirela, Efraima, Benjamina, naho amy Israely iaby re. ¹⁰ Efapolo tao Isboseta anadahy Saoly ro nanomboke nanjaka teo amy Israely, naho nanjaka zisike ty roe tao re. Fa nagnorike Davida ty foko Joda. ¹¹ Fito tao vaho enem-bola ty nadro nanjaka i Davida tamity foko Joda tao Hebrona. ¹² Abnera anadahy Nera, naho reo mpanompo Isboseta anadahy Saoly, le niala tao Mahanaima ho agne Gibeona. ¹³ Naho Joaba anadahy Zeroia vaho reo mpanompo Davida le niakatre naho nifanoje tamiereo teo amity rano Gibeona. Tegne iereo ro nitoboke, ty vondro raike teo agnilane ty rano naho ty vondro raike hafa teo andanene. ¹⁴ Hoe ty Abnera tamy Joaba ty hoe:" Ao hitsanga vaho fifanao eo agnoloantika reo ajalahy." Le hoe ty Joaba ty hoe:" Ao hitsanga iereo." ¹⁵ Le nitsanga vaho nirake nivory reo ajalahy, roe ambifolo bakamy Benjamina vaho Isboseta anagn'i Saoly, naho roe ambinifolo bakamireo mpanompo i Davida. ¹⁶ Ty lahilahy kiraikiraike le sambe nitsepake ty nifanao tamine tamity lohane vaho nanatoke ty mesone teo amity agnila ty mpifanao tamine, naho le niara-tonta iereo. ka le natao tamity rehake Hebreo ty hoe:" Helkata-hazorima" na "Baibo-meso" ze toera zay, zay agne Gibeona. ¹⁷ Tena mafe ty aly tamio andro o naho rese teo agnoloa reo mpanompo Davida i Abnera vaho reo lahilahy Israely. ¹⁸ Teo reo anagn'i Zeroia telo lahy: Joaba, vaho Abisay, naho Asahela. Ty tombo i Asahela le malaky lia manahake ty gazela-lia. ¹⁹ Naho Asahela nagnia marine i Abnera vaho nagnorike aze tsy niotake tamity lalane iaby. ²⁰ Nanente ty tao afara Abnera naho nanao ty hoe:" Riha vao io ry Asahela?" Namale re ty hoe:" Zaho toy." ²¹ Le hoe ty Abnera tamine ty hoe:" Miotaha agne amity ankavananao na ty ankavianao, naho mitsepaha raike amireo ajalahy ka alao ty fialiane." Fa tsy niotake Asahela. ²² Le hoe ndraike Abnera tamy Asahela ty hoe:" Ajanogno ty fagniagna nao ahy. Nagnino raho ro tokone hagnisy anao amity tane? Hataoko akore ty hagnatre-bata i Joaba, rahalahinao?" ²³ Fa tsy nagnenke ty hiotake Asahela, naho le tinombo Abnera ty meson-defone ty vatane, ka niakatre bakao andambosine ty lefo. Nikoropoke naho mate teo Asahela. ka ze ndaty niavy teo amity toera ze nampikoropoke vaho nahafate i Asahela, le nijano vaho tsy nihetreke teo. ²⁴ Fa hinia Joaba vaho Abisay ty Abnera. Laha fa nitsofotre ty masoandro, le niavy teo amity tazoa i Ama, ty agnila Gia eo amoro ty lala mbaeo amity efetre Gibeona iereo. ²⁵ Niarake nivory tao afara i Abnera reo lahilahy Benjamina naho nitsanga teo ambone ty tazoa. ²⁶ Bakeo le nikaike i Joaba ty Abnera naho nanao ty hoe:" Tsy maintsy handrapake zisikezay vao ty meso? Tsy hainao vao fa hafaitse zay agne amity farane? Mbia riha vaho hirehake ty ndatinao mba hijano tsy hagnia ty rahalahine iereo? ²⁷ Le namale Joaba ty hoe:" Laha mboe velo kea ty Zagnahare, laha tsy nirehake zay riha, le ho nagnia reo rahalahigniereo zisike-maray reo miaramilako!" ²⁸ Le nitioke ty anjomara Joaba, naho nijano ty ndatine iaby ka tsy nagnia ty Israely sasy, na nialy kea iereo. ²⁹ Zisike ze haleke zay le nindeha namakivaky i Araba ty Abnera vaho ty ndatine. Nitsake i Jordana iereo, nindeha zisike ty maray iaby, naho le niavy tao Mahanaima. ³⁰ Nihere bake nagnia i Abnera ty Joaba. Namory ty ndatine iaby re, ka i Asahela vaho miaramila sive ambifolo bakamy Davida ro tsy teo. ³¹ Fa reo ndaty Davida le namono 360 lahy tamity ndaty Benjamina ze niarake tamy Abnera. ³² Bakeo le nalae iereo Asahela naho nalevena tao amity kiborin-draene, zay tao Betlehema. Naho Joaba vaho reo ndatine nindeha ty haleke iaby, naho vaho maraim-bey iereo ro niavy tao Hebrona.