¹ Tafara atoy le mate ty mpanjaka ty vahoake Amona, naho lasa mpanjaka teo amity toerane ty Hanona anadahine. ² Hoe ty Davida hoe:" Hanao soa amy Hanona ana i Nahasy raho, manahake ty nagnanovan-draene soa tamiko." Ka le nandefa reo mpanompone hagnamafe i Hanona mikasike ty raene ty Davida. nilitre tao amity tane ty vahoake Amona reo mpanompone. ³ Feie hoe reo mpitarike ty vahoake Amona tamy Hanona tompo iereo hoe:" Midineke vatane vao riha fa magnomea hasy ty raenao ty Davida satria nandefa reo mpanompone hagnamafe anao re? Tsy le fa nandefa reo mpanompone taminao vao ty Davida mba hagnente ty tana, hijilo zay, mba handrava zay?" ⁴ Ka tsinepa Hanona reo mpanompo Davida, hinarane ty antsasa ty volombava iereo, tinampane zisikegne amity foto-pene ty akanjo iereo, naho rinoane. ⁵ Laha fa nagnazava zay tamy Davida iereo, le nandefa ndaty hanalaka iereo re, satria afa-baraka vatane reo lahilahy. Hoe ty mpanjaka hoe:" Mitoboha ao Jeriko mandram-pitiry ty volombavanareo ndraike, naho miheregna bakeo." ⁶ Laha fa hisa ty vahoake Amona fa lasa mangily holitre amy Davida iereo, le nandefa mpinday talily ty vahoake Amona naho nagnarama reo Syriana bakao Beti-rehoba vaho Zoba, miaramila nindeha antomboke roe ale, vaho lahilahy arivo tamity mpanjaka Maka, naho lahilahy roa arivo vaho ray ale tamireo ndaty Toba. ⁷ Laha fa naharey zay ty Davida, le nandefa i Joaba vaho ty tafike miaramila iaby re. ⁸ Niavy reo Amonita naho nilahatre hialy teo amity filira teo amity vavahady ty tana iereo, laha mboe nitsanga teo amity baibo malalake reo Syriana bakagne Zoba vaho Rehoba, naho reo ndaty bakagne Toba vaho Maka. ⁹ Laha fa nahisake reo fahavalo teo agnoloane vaho tao afarane ty Joaba, le nifily ty ilane tamireo ze mahay mialy vatane re naho nandamy iereo hialy amireo Syriana. ¹⁰ Laha ty amireo tafike sisa tavela, le nitolorane ho baikoe Abisay rahalahine, ka nalahane hialy amity tafike Amona iereo. ¹¹ Hoe ty Joaba hoe:" Laha mafe loatre ho ahy reo Syriana, le riha, Abisay, ro tsy maintsy magnavotre ahy. Fa laha mafe loatre ho anareo ty tafike Amona, le ho avy raho hagnavotre anareo. ¹² Maherea, naho andao tika hanoro ty ozantika ho ahy ty vahoantika vaho reo tana ty Zagnaharentika, satria Yaveh le hanao ze soa ho ahy ty fagniriane." ¹³ Ka nindeha ty Joaba vaho reo miaramila tao amity tafine mba hialy handietre reo Syriana, ze lasa nilay teo agnoloa ty tafike Israely. ¹⁴ Laha fa nahisake reo miaramila ty Syriana nilay ty tafike Amona, le nilay i Abisay kea iereo naho nihere tao amity tana. Bakeo ty Joaba nihere bakagne amity vahoake Amona naho nihere tagne Jerosalema. ¹⁵ Laha fa hisa reo Syriana fa ho rese Israely iereo, le nivory niarake ndraike iereo. ¹⁶ Bakeo Hadadezera nampikaike ty Syriana bakagne andafe ty Rano Eofrata. Niavy teo Helama niarake tamy Sobaka, ty mpifehe ty tafike Hedadezera loha iereo iereo. ¹⁷ Laha fa nirehafa zay Davida, le namory ty Israely iaby re, nitsake Jordana, naho niavy tagne Helama. Nilahatre hialy handietre Davida reo Syriana naho nialy tamine. ¹⁸ Nilay Israely reo Syriana. Namono miaramila mpinday kalese fitonjato vaho mpitiki-tsoavale efatrale ty Davida. Naafere ty Sobaka mpifehe ty tafike iereo naho mate tagne. ¹⁹ Laha fa hisa reo mpanjaka iaby ze mpanompo Hadadezera fa rese Israely iereo, le nanao filongoa tamy Israely iereo ka lasa mpanompone. Laha zao reo Syriana le natahotre ty hagnampe ty vahoake Amona.