¹ Tafara zay le nanafike reo Filistina ty Davida ka naharese iereo. Laha zao le nalae Davida tsy ho eo amity fifehea reo Filistina ty Gata vaho reo anabohine. ² Le naharese ty Moabita re ka nanao ty ndaty iereo tamity folese tamity fampandrea iereo teo amity tane. Nanao indroe ty folese re mba hamonoa, naho indraike avao mba hitana ho velo. Ka le lasa mpanompo Davida reo Moabita naho nanomboke nandoa hetra tamine. ³ Ka le rese Davida ty Hadadezera ana i Rehoba, ty mpanjaka Zoba, laha lasa nampoly ty fanjakane teo amoro ty Rano Eofrata ty Hedadezera. ⁴ Nangalake kalese 1.700 vaho miaramila antomboke roe ale bakamine ty Davida. Trinengo Davida iaby ty kalesen-tsovale iaby, fa nanoka ze tokone ho ampe ty kalese zato tamiereo re. ⁵ Laha fa niavy hagnampe i Hadadezera mpanjaka Zoba ty Syriana bakagne Damaskosy, le namono lahilahy Syriana roa arivo vaho roa ale ty Davida. ⁶ Bakeo Davida nametrake miaramila tagne Syria agne Damaskosy, naho lasa mpanompone ka nandoa hetra tamine ty Syriana. Nampaharese Davida tegne amiaby ze nombane ty Yaveh. ⁷ Le nalae Davida ty ampinga volamena ze tagne amity mpanompo i Hedadezera ka nientene tagne Jerosalema reo. ⁸ Bakeo Davida mpanjaka le nangalake varahy maro le maro bakao Beta vaho Berotahy, tana i Hadadezera. ⁹ Laha fa rey Toy, mpanjaka Hamata, fa naharese ty tafike Hadadezera iaby ty Davida, ¹⁰ le nirahe Toy ho agne amy Davida mpanjaka ty Jorama anane mba hanalama aze vaho hitso-drano aze, satria Davida nialy tamy Hadadezera ka naharese aze, naho satria Hadadezera le nialy tamy Toy. Gorama le ninday zaka vita tamity volafoty, volamena naho varahy niarake tamine. ¹¹ Davida mpanjaka le nanoka reo zaka reo ho ahy Yaveh, niarake tamity volafoty vaho volamena reo firene iaby ze resene__ ¹² bakamity Syria, Moaba, reo ndaty Amona, reo Filistina, vaho ty Amalekita, niarake tamireo enta iaby voarobake tamy Hadadezera ana i Rehoba, mpanjaka Zoba. ¹³ Hay laza ty agnara Davida laha fa baka nangalake ty Syriana tagne amity baibon-tsira, niarake tamireo lahilahy valo arivo vaho ray ale iereo. ¹⁴ Nametrahane miaramila magnera Edoma iaby, naho ty Edomita iaby le lasa mpanompone. Naho Yaveh nampaharese i Davida tegne amiaby ze nombane. ¹⁵ Nanjaka teo amy Israely iaby ty Davida, naho ninday ty rarene vaho ty fahitia tamity ndatine iaby re. ¹⁶ Joaba ana i Zeroia ro mpifehe ty tafife, naho Josafata ana i Ahiloda ro mpikarakara. ¹⁷ Zadoka ana i Ahitoba vaho Ahimeleka ana i Abiatara ro mpisoro, naho Seraia ro mpanora-dala. ¹⁸ Benaia ana i Joiada ro nita reo Heretita vaho reo Paletita, naho reo ana i Davida ro mpagnomea hevetre ty mpanjaka.