¹ Naho laha fa niavy ty lohatao, amity andro ze fandehana reo mpanjaka hialy, le nirahe Davida ty Joaba, mpanompone, vaho reo tafike Israely iaby. Nandrava ty tafike Amona naho nanao faherano i Raba iereo. Feie nijano tagne Jerosalema ty Davida. ² Tamy niavy ty hariva le nifoha teo ampiroroane ty Davida naho nindeha tagne amity tafo ty lampane. Bakegne re ro nahisake ampela raike ze teo ampiandroa, naho vatane soa hentea ty ampela ao. ³ Laha zao le nandefa vaho nagnontane ndaty ze mahay ty miomba ty ampela ty Davida. Nisy ndaty raike nanao ty hoe:" Tsy i Batseba, anakampela Eliama vao zay, naho tsy ty valy Oria Hetita vao re?" ⁴ Le nandefa mpinday talily Davida naho nangalake aze; le niavy tagne amine re, naho niarake-niroro tamine re( satria vaho baka nagnalio ty vatane tamity falim-bola re). Bakeo le nihere tagne antragnone re. ⁵ Nibevoka ty ampela, naho nagnirake vaho nirehake Davida re; hoe re ty hoe:" Bevoka raho." ⁶ Bakeo Davida nagnirake tagne amy Joaba nanao hoe:" Alefaso amiko atoy ty Ora Hetita." Le nalefa Joaba tagne amy Davida ty Oria. ⁷ Laha fa niavy Oria, le nagnontane aze ty Davida hoe nanao akore Joaba, nanao akore ty tafike, naho nanao akore ty fandeha ty aly. ⁸ Le hoe Davida tamy Oria hoe:" Mizotroa agne amity tragnonao, naho sasao ty tombonao." Ka le niala tao amity lampa ty mpanjaka ty Oria, naho nandefa fagnomea ho ahy Oria ty mpanjaka tafara ty nindehanane. ⁹ Fa niroro teo ambaravara ty lampa ty mpanjaka niarake tamireo mpanompo ty tompone iaby Oria, naho nimbaeo antragnone re. ¹⁰ Laha fa nirehake tamy Davida iereo hoe:" Tsy nizotro tane antragnone Oria", le hoe Davida tamy Oria hoe:" Tsy baka nindeha vao riha? Nagnino riha ro tsy nindeha nizotro tagne antragnonao?" ¹¹ Namale Davida ty Oria hoe:" Ty tomabile, vaho Israely naho Joaba le mijano ao amireo tragno, naho Joaba tompoko vaho tompo reo mpanompoko le nitobe tagne ambaibo. Ino are ro hahafahako mbaeo antragnoko mba hihina vaho hino naho hiroro hiarake amity valiko? Laha mboe velo vatane riha, le tsy hanao zay raho." ¹² Ka hoe ty Davida tamy Oria hoe:" Mijanogna eto aloha androany, fa hamaray riha hengako hindeha." Ka nijano tao Jerosalema tamio andro o vaho ty maraigne ty Oria. ¹³ Laha fa nikaike aze ty Davida, le nihina vaho nino teo agnoloane re, naho nimamoe Davida re. Ty hariva ty Oria le niakatre mba hiroro miarake amireo mpanompo ty tompone eo ampandreane; tsy nindeha nizotro tagne antragnone re. ¹⁴ Naho tamy maray le nanoratre taratasy ho ahy Joaba ty Davida, naho nandefa zay tamity alala ty tagna Oria. ¹⁵ Davida nanoratre tao amity taratasy nanao ty hoe:" Atoboho eo agnoloa ty aly mafe vatane ty Oria, naho miala amine eo bakeo, mba mete ho voafofoke vaho voavono re." ¹⁶ Ka laha nanao faherano tamity tana Joaba, le nanendre i Oria tamity toera ze nahaiane reo miaramila fahavalo mafe vatane hialia re. ¹⁷ Laha fa niakatre reo lahilahy ty tana naho nialy tamity tafike Joaba, le lavo ty ilane tamireo miaramila Davida , naho Oria Hetita avao kea le vinono tagne. ¹⁸ Laha fa nandefa rehake tagne amy Davida miomba ty zaka mikasike ty aly Joaba, ¹⁹ le nandily ty mpinday talily re, nanao hoe:" Laha fa voarehanao amity mpanjaka ty zaka iaby mikasike ty aly, ²⁰ ty mete hisy le hoe ho meloke ty mpanjaka, ka hirehake aminao re hoe:' Nagnino ro niharine loatre ty tana riha ro nialy? Tsy hainao vao fa mete bakegne amity manda iereo ro hitifitre? ²¹ Ia ro namono i Abimeleka ana i Jerobeseta? Feie tsy ampela raike vao ro nandefa vato fikoseham-bare tamine bakegne amity manda, ze namono aze tagne Tebeza? Nagnino riha ro tegne amize marineke ty manada ro nindeha?' Naho tsy maintsy hamale riha hoe:" Oria Hetita mpanomponao avao kea le mate."' ²² Laha zao le lasa ty mpinday talily naho nideha tagne amy Davida vaho nirehake tamine ty zaka iaby ze nagniraha Joaba aze ho rehafe. ²³ Naho hoe ty mpinday talily tamy Davida hoe:" Nimafe noho zahay ty fahavalo tagne amboalohane; niakatre nimbaeo aminay teo ambaibo iereo, fa rinoanay nihere tagne amity filira amity vavahady. ²⁴ Bakeo nitifitre tagne amireo miaramilanao bakegne amity manda ty mpitify iereo, naho mate ty ilane tamireo mpanompo ty mpanjaka, naho mate avao kea Oria Hetita mpanomponao." ²⁵ Le hoe Davida tamity mpinday talily hoe:" Ambarao Joaba zao:' Ko atao mahameloke anao toy, fa ty meso le handany raike vaho raike hafa. Mafeo kea handiera ty tana ty alinao, ka ravao zay,' naho arisiho re." ²⁶ Ka laha fa rey ty valy Oria fa mate ty Oria valine, le nandala vatane ty valine re. ²⁷ Laha fa niafake ty alahelona, le nagnirake vaho nampoly aze tagne amity lampane ty Davida, ka lasa valine re naho niterake ajalahy tamine. Kanefa tsy nitea Yaveh ty natao Davida.