¹ Ka mitsara mba tsy ho tsarahy koa nareo. ² Fa araky gny fitsara ataonareo ro hitsara anareo, araky gny refy ataonareo ro handrefesa anareo. ³ Magnino iha mijery gny ravinakata eo amin'gny mason'gny rahalahinao kanefa gny eo amin'gny handrinao tsy hitanao? ⁴ Sady manao akory gny hisafagnanao amin'gny rahalahinao hoe: ao fa halaiko gny ravin'akata eo amin'gny masonao, ⁵ kanefa io gny handry eo amn'gny masonao, fa amin'izay vo hitanao soa gny hangalako gny ravin'akata eo amin'gny mason'gny rahalahinao. ⁶ Ka omea gny alika gny masina sady ka atoraky gny amin'gny kisoa gny vatosoanareo, tsony hagnitraky i ka hifototry, hamiravra anareo. ⁷ Mangataha fa homea nareo, mila fa hahita nareo, mandondogna fa hosokafa nareo. ⁸ Fa izay mangataky ro mahazo voho zay mila ro mahita sady zay mandondona ro hosokafa. ⁹ Fa ia aminareo laha angatahin'gny anaky mofo ka hagnome azy vato? ¹⁰ Na koa angatahany fia ka hagnome azy bibilava? ¹¹ Ka ndra raty aza nareo, mahaiza magnome raha soa ho an'gny anakinareo, voamaiky va Babanareo zay agny andagnitry ro hagnome raha soa hoan'gizay mangataky aminy? ¹² ka noho zay ndra ino ndra ino ro tianareo hataon'olo aminareo, ataovo aminy koa manahaky an'izay, ka zay ro lalana voho mpaminany. ¹³ Milira amin'gny varavara toy nareo, fa bevata gny varavara voho malalaky gny lala zay mandea magnagny amin'gny fahavereza ka maro gny militry agny. ¹⁴ Fa etoy gny varavara, sady mahifitry gny lala magnagny amin'gny fiaigna ka vitsy ro mahita azy. ¹⁵ Mitandrema nareo, tsony ho voafitaky gny mpaminany sandoky zay mandalo aminareo amin'gny fisiky gn'ondry kanefa gny ao agnatiny amboa ly ta hamiravira. ¹⁶ Gny vihiny ro ahaiza nareo azy. Mioty voaloboky amin'gny fatiky va gn'olo ro mahazo aviavy amin'gny songosongo? ¹⁷ Manahaky an'zay iaby gny hazo , gny hazo soa mamoa vihiny soa fa gny hazo raty mamoa vihiny raty. ¹⁸ Gny hazo soa tsy mety mamoy vihiny raty sady gny hazo raty tsy mety mamoy vihiny soa. ¹⁹ Gny hazo iaby zay tsy mamoy vihiny soa ro tapahy voho atao agny amin'gny motso. ²⁰ Fa gny vihiny ro ahaizanareo azy. ²¹ Tsy izay misafa amiko hoe: Tompoko, Tompoko ro hilitry amin'gny fanjaka gny lagnitry, fa zay manao gny sitrapon'gny Babako zay agny an-dagnitry. ²² Maro gny hisafa amiko amin'gny andro zay hoe: Tompoko Tompoko, tsy fa naminany tamin'gny agnaranao va zahay? Tsy fa namoaky devoly tamin'gny agnaranao va zahay? Sady tsy fa nanao asa bevata maro tamin'gny agnaranao va zahay? ²³ Hosafagniko aminy marina hoe: Tsy mahay anareo zaho ela zay; miala amiko nareo tsy mpanao gny marina. ²⁴ Ndra ia ndre ia mahakasa gny safako ka magnaraky azy, ka hohariko amin'gny johary manan-tsay I, zay nagnory gny tragnony teo agnabon'gny vatolampy. ²⁵ Lafa latraky ora ka nisy riaky bevata sady nirivodrifotry gny tsioky ka namango an'gny tragno io kanefa tsy nilavo ntragno igny satria fa naory tagnabon'gny vatolampy. ²⁶ Fa izay mahakasa an'ireosakafo reo kanefa tsy magnaraky azy, ka hohariko amin'gny johary adala zay nagnory gny tragnony agnabon'gny fasiky. ²⁷ Lafa latrak'ora ka nisy riaky bevata sady tsioky mare ka namango gny tragnony, ka lavo i sady loza gny faharavany. ²⁸ Vatany vo vitan'i Jesosy zay safagnin'zay, ka tseriky gny fokonolo tamin'gny fampianarany, ²⁹ satria nampianatry andreo sahala gny manam-pahefa I, fa tsy manahaky gny mpanora-dala tamindreo.