¹ Ho amy fahafaha ro nagnafaha an'i Kristy antsika. Mihoregna soa, laha izay ka mety ho ambanigny ziogany fagnadevoza koa. ² Intoy, zaho, Paoly misafa aminareo. Fa lafa mamela gny gnainareo ho tapahy nareo, tsy hampajary anareo amy fomba iaby Kristy. ³ Mijoroa vavolombelo amy gn'olo tsiraikiraiky ze mamela gny gnainy ho tapahy ndraiky fa voatery hagnaraky gny lily iaby i. ⁴ Tafasaraky tamy Kristy nareo ze ta ho hamarigny amigny lily sady tsy misy fahasoava koa nareo. ⁵ Amy alalagny Fagnahy ,aminy finoa ro hiambenatsika fatratsy gny fagnatena gny fahamarina. ⁶ Ao amy Kristy Jesosy tsy midika ino na ino na voatapaky na tsy voatapaky fa gny finoa miasa amy fitiava avao. ⁷ Fa nilainday soa nareo. Ia ro nisaka anareo tamy gny fagnekea gny marina? ⁸ Zay fandresendahatsy zay tsy baka amizay nikaiky anareo. ⁹ Lalivay kely ro nampitombo gny koba iaby. matoky gny Tompo zaho fa tsy handramby fomba fijery hafa nareo. ¹⁰ Fa gny raiky ze mampikorontaky anareo ro hagnefa gny sazy, na ia i na ia ¹¹ Ry rahalahy, la mbo mitory gny amy tapak' agnaky zaho, nagnino zaho mbo nenjehy? Amizay ho afaky tokoa gny fahatafitohia amy fijalia. ¹² Hoandreo ze magnakorontaky anareo. Engane ka hanapaky gny vatany reo! ¹³ Fa nikeha ho amy fahafaha nareo, ry lehilahy. Ka ampiasay amy gny filagny nofo gny fahafahanareo; fa amy gny alalagny fitiava ka mifanompoa. ¹⁴ Gny lily iaby ro tanteraky amy lily raiky; ao amy hoe: " Tsy maintsy mitea gny sakaizanao mitovy amy vatanao iha." ¹⁵ Laha mifagnaikitry sy mifampihina nareo, mitahoa tsony hifandavo. ¹⁶ Ka hoy zaho,mandehana araky gny fagnahy mba tsy hahatanteraky ze fila gny nofonareo. ¹⁷ Fa manohitry gny fagnahy gny filany nofo gny fagniriany fagnahy. Fa mifanohitsy reo, mba tsy hahafahanareo manao ze raha tianareo. ¹⁸ Fa laha tarihigny fagnahy nareo, tsy ho ambaniny gny lily. ¹⁹ Hananizao miharihary gny asany filagn'ny nofo: fijangajanga, fahalotoa, fijejojejoa, ²⁰ fagnompoa sampy, famosavia, fankahala, fifandira, fahasarotam-piaro, fipoahagny fahatezera, fifandrafia, fisarambaza, fizarazara, ²¹ fialogna, fahamamoa, fagnakorontagna ary gny raha mitovy amizay. Mampitandry anareo aho, nanahaky gny fa nampitandremako anareo taloha, fa tsy handova gny fanjakan-Dragnahary reo ze mampanao any raha reo. ²² Fa gny vokatsy gny fagnahy ro fitiava, fifalia, fahareta, hasoam-pagnahy, fagnaovan-tsoa, finoa, ²³ fahamoram-pagnahy sady fahafehezan-tena; tsy misy lily manohitsy raha nanahaky anizay. ²⁴ Reo ze gnan' i Kristy Jesosy ro fa nagnombo gny toera maro fahotany niaraky tamy fahafinaretany sy gny filany. ²⁵ Laha miai amy fagnahy tsika,aoky handeha amy fagnahy avao koa. ²⁶ Aoky tsika tsy ho lasa mpieboebo, mifandragnitsy, sady mifampialo.