¹ Paoly, apostolin'i Kristy Jesosy araky gny sitrapon-Dragnahary, ho agny reo olo masin-Dragnahary agny Efesosy, zay mahatoky ao amin'i Kristy Jesosy. ² [Fanamariha: Misy fandika sasany mangala gny hoe:"Ao Efesosy" nefa mety ao amy gny taratasin'i Paoly tamy gny voalohany izay.] Ho aminareo gny fahasoava sy fiadana baka amy Ndragnahary Babantsika sy Jesosy Kristy Tompo. ³ Deray anie Ndragnahary sy Baban'i Jesosy Kristy Tompontsika, zay nitahy antsika tao amin'i Kristy tamy gny fitahia mpanahy iaby baka agny an-danitry ao amin'i Kristy. ⁴ Ndragnahary nifily antsika tao aminy nanomboky tamy fiatomboha gny zao rah iaby zao, mba ho masi sy tsy manan-tsiny anatrehany tsika. ⁵ Ndragnahary ro nifily antsika mialoha ho amy gny fanangana ho gnanaky tamy gny alalan'i Jesosy kristy, araky gny sitrapony. ⁶ Gny fanangana antsika ro nanday amy gny fidera gny fahasoavany be vonihitry zay nomeny antsika maimaimpoa tao amy gnazy Raiky zay tiany. ⁷ Ao amin'i Jesosy kristy ro ahazoa fanavota amy gny ràny sy gny famela keloly tsika, araky gny harem-pahasoavany. ⁸ Narotsaky tamintsika tamy gny fahendrea sy fahalala iaby izay fahasoava zay. ⁹ Nataon-Dragnahary haintsika gny raha mivony amy gny sitrapony, araky zay teany, sy izay natorony tao amin'i Kristy, ¹⁰ niraky tamy gny fandahara zaiky amy gny fahafenoa gny fotoa,hanangona ny raha iaby, etoy an-tany sy an-danitry any, ho loha raiky,na Kristy aza. ¹¹ Voatendry ho mpandova tsika ao amin'i Kristy. Nofilia mialoha araky fandahara gnazy mampiasa gny raha iaby araky gny tanjo gny sitrapony tsika. ¹² Ndragnahary nanendry antsika ho mpandova mba ho tsika ro mana fahatokia voalohany ao amin'i Kristy, mba ho fidera gny voninahiny tsika. ¹³ Tao amin'i Kristy, gnareo koa, lafa mahare gny safa gny fahamarina, io gny filazantsara gny famonjea anareo, ka nino Azy gnareo sady voatomboky tamy gny Fanahy Masina nampanatenai, ¹⁴ zay antoky ho agny gny lovantsika mandraky ahazoantsika iaby izay, ho fidera gny vonihatriny. ¹⁵ Noho izay antony zay, hatramy gny naharezako gny finoanareo gny Tompo Jesosy miaraky gny fitiavanareo reo olo masy iaby, ¹⁶ ro tsy nitsahatry gny nisaotry an-Dragnahary zaho noho gny aminareo sady tiaroko am-bavaky gnareo. ¹⁷ Mivavaky zaho mba Ndragnaharign'i Jesosy Kristy Tompontsika, gnazy Baba gny voninahitry, hanome anareo gny fanahin'gny fahendrea sy fanambara amy gny fahalala Azy. ¹⁸ Mivavaky zaho mba hazavay gny maso gny fonareo, mba hahaizanreo gny toky zay nikehany anareo sy gny hare gny voninahitry gny lovany eo amy reo olo iaby masin-Dragnahary. ¹⁹ Ao amy gny fivavako ro managataky zaho mba hahaizanareo gny fihoara gny habevata gny tanjakiny ao amintsika zay mino, araky gny fiasa gny heriny bevata. ²⁰ Izay hery zay avao ro nampesain-Dragnahary tamin'i Kristy lafa nantsangany tamy gny maty I sady napetrany tan-tagnany ankavana tan-danitry tany. ²¹ Kristy ro napetrakiny ho anabony gny lily sy gny anara iaby zay misy. Hanapaky Kristy, tsy henaniky zao avao fa amy andro zay ho avy koa. ²² Napetraky Ndragnahary ho ambany gny tombokin'i Kristy gny raha iaby sady natorony ho loha gny raha iaby ao amy gny fiangona I. ²³ Gny fiangona no vatany, gnazy fahafenoa Gnazy mameno gny raha iaby amy gny endriny iaby.