¹ Zaho tsy maintsy mieboebo, fe tsy misy na ino na ino azo baka amin'izay. Fa zaho ro hanohy gny amy reo fahita sy reo fanambara baka amy gny Tompo. ² Mahay lehilahy ao amin'i Kristy aho zay fatry amby folo tao lasa zay__gna ao amy gny vata gna amonto gny vata, zaho tsy mahay, Andriagnanahary mahay__nalay niakatry tany amy gny lanitry fahatelo. ³ Sady haiko fa io lehilahy io__gna ao amy gny vata, gna amonto gny vata, zaho tsy mahay ,Andriagnanahary mahay__ ⁴ ka nalai tao amy gny paradisa sady nahare raha zay tena masy mare amy gny olo gny hivola azy. ⁵ Amy gny anara gny olo manahaky izay ro hieboebo aho. Fa amy gny agnara gny vatako ro tsy hieboebo aho, afa tsy gny momba reo fahalemeko. ⁶ Laha te hieboebo aho, tsy ho adala aho, fa te hivola gny marina. Fa hifehy vata amy gny fieboeboa aho, mba tsy hisy gna ia gna ia hihevitry ahy ho anabo noho zay hita amiko na re baka amiko. ⁷ Hifehy vata amy gny fieboeboa avao koa aho noho reo karaza fanambara miavaky reo. Noho zay, mba tsy ho feno fieboeboa aho, ka nasia fatiky gny nofotsiko, gny mpanday hafatr'i Satana hanakoronta ahy, mba tsy hieboebo loatry aho. ⁸ Intelo aho ro nisoloho tamy gny Tompo gny momba izay, mba hamafany anio amiko. ⁹ Ka hoy I tamiko hoe: "Ampy ho anao gny fahasoavako, fa gny hery ro natao ho lafatra ao amy gny fahalemea". Aleoko mieboebo mare gny amy gny fahalemeko, mba hipetraha gny herin'i Kristy amiko ato. ¹⁰ Noho izay lavariaky noho i Kristy ao amy gny fahalemea, amy gny fanevateva, amy gny koronta, amy gny fanenjeha sady ao amy gny fotoa sarotry aho. Fa na ombia na ombia malemy aho, dia matanjaky. ¹¹ Lasa adala zaho! Gnareo ro nanery ahy amy zay, fa zaho ro tokony noderainareo. Tsy ambany mihitsy zaho noho reo zay ikehy hoe Apostoly anabo reo, ka na tsinontsino aza aho. ¹² Reo famantara marina gny maha Apostoly ro notanterahy taminareo tamy gny fahareta, famantara sy fahagaga voho asa mahery. ¹³ Fa manino nareo ro tsy manan-danja noho reo fiangona sasany, ankoatry gny tsy maha vesatry aho ho agnareo? Manenga ahy noho izay fahadisoa izay! ¹⁴ Zao! Vonona ho avy fanintelony agny aminareo aho. Tsy ho vesatry ho anareo aho, fa zaho tsy mila izay aminareo. Gnareo ro ilaiko. Fa tsy gny agnaky ro tokony hihary ho agn'ireo ray aman-dreny. Fa koa, reo ray aman-dreny ro tokony hihary ho agny reo agnaky. ¹⁵ Zaho ro ho faly tanteraky handany sy ho lania ho agny gny fanahinareo. Laha mitea mare anareo aho, ka hotiavy ke va aho? ¹⁶ Ka na manahaky izay aza, tsy gnanavesatry anareo aho. Fa, satria aho fetsifetsy mare, ka zaho gnazy raiky zay nahazo anareo tamy gny fitaky. ¹⁷ Sa moa gnanararaotry anareo tamy gny alala gny olo zay nalefako tamy nareo aho? ¹⁸ Gnaniraky malaky agn'i Titosy ho agny aminareo aho, sady nalefako niaraky tamy gny reo rahalahy sasany. Sa moa gnanararaotry anareo i Titosy? Sa moa tsy miaraky lala ntsika? Sa moa tsy miaraky lia ntsika? ¹⁹ Sa moa mieritreritry gnareo fa nanomboky zay fotoa iaby zay ro niaro gny vatanay taminareo zahay? Eo alohan'Andriagnanahary, no ivolananay tao amin'i Kristy gny raha iaby mba ho fampahereza anareo. ²⁰ Ka mavozo aho tsony lafa avy aho ka tsy hahita anareo araky gny fanantenako. Matahotry aho tsony tsy ho hitanareo araky gny fanantenanareo. Matahotry aho fa tsony mety hisy fifamalia, fialona, fireheta gny siaky, fikasa amy gny fitiava tena, fifosa, fiheboheboa sady fikorontana. ²¹ Matahotry aho tsony lafa mimpoly, ka hanetry ahy eo anilanareo gny Andriagnanahariko. Matahotry aho tsony mety halahelo gny amy reo maro nanota taloha teo, ka mbo tsy nibebaky tamy gny fahalotoa sy gny fijangajanga sady gny fijejojejoa feno faniria raty zay natao ndreo.