¹ Tiako ho fantatrareo, ry rahalahy, fa ireo iabantsena die tao ambanin'ny rahogna aby ary namakivaky ny ranomasina. ² Ny abiaby die natao batisa hômin'i Mosesy tao amin'ny rahogna sy tao amin'ny ranomasina, ³ ary ny abiaby die samby nihinagna hanim-pagnahy mitovy. ⁴ Ny abiaby die nisotro ranom-pagnahy mitovy. Fa areo die nisotro tamin'ny vatolampim-pagnahy ijay nagnaraka an-dreo, die Kristy ijane vatolampy ijane. ⁵ Fa Andriamanitra die tsy nankasitrake tsara ny ankabetsahan-dreo, ary ny fatin-dreo die naely tagne agn'efitre. ⁶ Amin'ijao fotôgna iregne raha iregne die ohatre hôntsena, mba tsy hagniriantsena raha-ratsy hôtran'ny nilan-dreo. ⁷ Aja manompo sampy, hôtran'ny saragne tamin-dreo. Ijane die arak'ijay vôsoratra hoe: ''Ireo olo nitoboke mba hihinagna sy hisotro, ary nitsangagna mba holalao.'' ⁸ Ôka antsena tsy hijangajanga, hôtran'ny namboarin'ny rahabe tamin-dreo. Tao agnatin'ny indraika andro, die olo telo arivo sy roa aligna ny maty nohon'ny amin'ijane. ⁹ Ôka mandy koa antsena tsy hitsapa an'i Kristy, hôtran'ny namboarin'ny rahabe tamin-dreo ka naringagn'ireo menaragna. ¹⁰ Aja mimenimenigna mandy koa, hôtran'ny namboarin'ny rahabe tamin-dreo ka naringagn'ireo anjelin'ny fahafatesana. ¹¹ Ary iregne raha iregne no nihatra tamin-dreo mba ho ohatre hôntsena. Nisoratana mba ho fampenarana antsena ijy iregne--- ho amintsena ijay nevian'ny fara-andro. ¹² Noho ijane ôka ijay mieritreritra ny tegnane ho efa mijoro mitandrigna tsara mba tsy ho lavo. ¹³ Tsy nisy fakam-pagnahy nahatratra anareo ijay tsy erahan'ny olombelogna abiaby. Fa koja, Andriamanitra die mahatoky. Tsy hagnavela anareo halaim-pagnahy mihôtra ijay jakanareo Ijy. Miaraka amin'ny fakam-pagnahy die hagnome anareo ny làlagna hilefana mandy koa Ijy, mba hafahanareo miaritre ijane. ¹⁴ Noho ijane, ry malalako, milefà lavitra ny fanompôn-sampy. ¹⁵ Mijaka aminareo hôtran'ny olo manan-tsaigna iaho, mba hafahanareo mitsara ijay vorianiko. ¹⁶ Ny kapôkan'ny fisôrana ijay isôrantsena, moa ve ijane tsy fiombognana amin'ny ràn'i Kristy? Ny mofo ijay silahintsena, moa ve ijane tsy fiombognana amin'ny vatagn'i Kristy? ¹⁷ Satria raike mandy ny mofo, antsena ijay rahabe die vatagna raike. Antsena abiaby die mandray amin'ny mofo raike mandy. ¹⁸ Jahay ireo fokon'olon'Israely: moa ve ireo ijay mihinagna ireo fagnatitre tsy mpandray anjara eo amin'ny alitara? ¹⁹ Ino ary ny hivorianiko? Hoe tsy misy dikany ve ijane ny sampy? Sa ny hanina ijay natao fagnatitre tamin'ny sampy no tsy misy dikane? ²⁰ Fa mivoria mahakasikan'ny raha ijay ataon'ireo Jentilisa mpanompo sampy fagnatitre iaho, fa omen-dreo an'ireo demonia iregne raha iregne fa tsy an'Andriamanitra. Tsy tiako anareo ho mpikambagna amin'ny demonia! ²¹ Tsy afake misotro ny kapôkan'ny Tompo sy ny kapôkan'ny demonia anareo. Tsy afake miray eo amin'ny latabatry ny Tompo sy ny latabatr'ireo demonia anareo. ²² Sa magnano ijay mahasaro-piaro ny Tompo ve antsena? Mahery noho Ijy ve antsena? ²³ ''Ny raha abiaby die ara-dalàna,'' fa tsy ny raha abiaby no mahasoa. ''Ny raha abiaby die ara-dalàna,'' fa tsy ny raha abiaby no mampandroso ny olo. ²⁴ Tsy misy tokone handremby ny tombotsoane manokagna. Fa koja, ny kiraidraike die tokone handremby ny tombotsoan'ny nekamane. ²⁵ Afake mihinagna ijay abiaby amidy egne an-tsena anareo, fa aja magnontany ny fieritreretana. ²⁶ Fa ''An'ny Tompo ny tany, sy ijay abiaby misy amin'ajy eo.'' ²⁷ Laha misy tsy mpino mangaike anareo hihinagna, ka te handeha anareo, die hoano ijay abiaby mitoboke eo alohakanareo ka aja mametra-pagnontaniana ny amin'ny fieritreretana. ²⁸ Fa laha misy mijaka aminao hoe: ''Itiky hanina itiky die avy amin'ny fagnatitry ny mpanompo sampy,'' die aja mihinagna ijane. Ijane die hôn'ilay nampahafantatre anareo, sy hôn'ny fieritreretana. [Fagnamarihana: Ny dika-teny talohaka saragne die magnampy hoe: ''Fa ny tany sy ny raha abiaby ao amin'aje die an'ny Tompo.'' Fa ny dikan-teny tsara indrindra die tsy misy ijane.] ²⁹ Tsy mijaka iaho hoe ny fieritreretanao manikagna, fa ny fieritreretan'ny olo-kafa. Nagnino ny fahafahako no tokone hitsarain'ny fieritreretan'ny hafa? ³⁰ Laha mandray anjara amin'ny hanina am-pankasitrahana iaho, nagnino no jakajakaina amin'ijay nagnomejako fisôrana? ³¹ Noho ijane, na mihinagna na misotro anareo, n'ino n'ino amboarinareo, die amboaro ho voninahitr'Andriamanitra aby. ³² Aja magnome fanafintohignana ny Jiosy na ny Grika, na ny fengonan'Andriamanitra. ³³ Miejaka ny hahafaly ny olo-abiaby amin'ny raha abiaby iaho.Tsy mandremby ny tombotsoako iaho, fa ny an'ny rahabe. Amboariko ijane mba ho vôvonjy areo.