¹ Tam'zany fotôna zany, Heroda mpanapaka nandregny ny vaovao momba an'i Jesosy. ² Ozy tam'reo mpanompony hoe: "I Jaona mpagnano batiza zany; nitsangana tamin'ny maty izy. Noho zany de miasa akao amin'azy reo hery reo." ³ Fa Heroda nisambotra an'i Jaona, namatotra an'azy, ary nandefa an'azy taigny an-tragnomaizigna noho i Herodiasy, vadin'i Filipo rahalàny. ⁴ Fa ozy Jaona tamin'azy hoe: "Tsy ara-dalàna ho an'nao ny managna an'azy ho vadinao." ⁵ Naniry ny hamono an'azy Heroda, saingy natatra an'reo vahôka izy, satria noraisin-jareo ôtran'ny mpaminagny izy. ⁶ Fa rafa tonga ny fitsingerenan'ny andro natern'i Heroda, de nandihy takeo am-povôn'reo vahiny nasaina ny zanaka vavin'i Herodiasy ka nafinaritra an'i Heroda. ⁷ Ho setrin'zany, de nampanantegna tamin'ny fianianana izy hagnome an'ze hangatahiny na ino na ino. ⁸ Rafa avy notoroan'ny reniny marika, de ozy hoe: "Ameo anà aketo, agnaty vile, ny lôha'i Jaona mpagnano Batisa." ⁹ Nalaelo mafy nohon'ny fangatany ny mpanjaka, saingy nohon'ny voadiny sy noho reo daôly nisakafo niaraka tamin'azy, de nagnome baiko izy fa tokony ho vita zany. ¹⁰ Nagniraka ka nanapaka ny lôhan'i Jaona takao an-tragnomaizigna izy. ¹¹ Avy akeo nentina tamin'ny vilé ny lôhany ary namena an'le zazavavy ary nentiny takeo amin'ny reniny zany. ¹² Avy akeo de tonga reo mpianagny, niaka an'le faty, ary nandevina an'zany. Tafaran'zany, de nande zareo ary nilaza tamin'i Jesosy. ¹³ Ary rafa nandregny an'zany Jesosy, de niala avy teo amina sambokely raika izy hankaigny amina tôrana mitokana raika. Rafa nandregny an'zany reo vahôka, de nagnaraka an'Azy an-tongotra avy taigny am'reo tanàn-debe. ¹⁴ Avy akeo Jesosy nankeo agnolôn-jareo ary natazagna an'reo vahôka betsaka be. Nangoraka an-jareo Izy ary nagnasitrana ny aretin-jareo. ¹⁵ Rafa tonga ny hariva, de nankeo amin'azy reo mpianany ary nitare hoe: "Ty de tôrana fôana, ary efa tapitra sady ny andro. Alefaso reo vahôka, mbô hafan-jareo mande aigny am'reo tanàna ary hividy sakafo ho an'ny tegnan-jareo." ¹⁶ Fa Jesosy nitare tamin-jareo hoe: "Tsy mila mande lavitra zareo. Amenareo ra hohanina zareo." ¹⁷ Ozy zareo tamin'Azy hoe: "Mofo dimy sy lapia rôy fôgna no hanagnanay eto." ¹⁸ Ozy Jesosy hoe: "Ento aty aminà zany." ¹⁹ Avy akeo Jesosy nibaiko an'reo vahôka mbô hipetraka akeo amin'ny bozaka. Nalainy reo mofo dimy sy lapia rôy. Nendrandra taigny an-dagnitra, de nisaotra Izy ary nanapaka reo mofo ka nameny an'reo mpianatra, ary reo mpianatra nagnome an'zany ho an'reo vahôka. ²⁰ Nihinana avokoa izy daôly ary voky. Avy akeo de nangonin-jareo ny sisan'reo poti-tsakafo ka nafeno rombefolo harona. ²¹ Teo amin'ny dimy arivo lahy teo reo nihinana, ankôtran'reo zaza amam-bevavy. ²² Avy hatraigny de nasainy nankao amin'ny sambokely ary nande hialô an'Azy ho aigny ampita reo mpianany, raha mbôla nandefa reo vahôka Izy. ²³ Tafaran'ny nandefasany an'reo vahôka, de nande niakatra taigny an-tanety rerika Izy mbô hivavaka. Rafa tonga ny hariva, de rerika teo Izy. ²⁴ Ary ny sambo de efa lasa lavitra ny tanety, natopatopan'ny onja, satria nitsoka nanohitra an-jareo ny rivotra. ²⁵ Tamin'ny fembenana faefatry ny alina de nagnatona an-jareo Jesosy, nande taigny ambony ranomasina. ²⁶ Rafa natazagna an'Azy nande tambony ragnomasina reo mpianatra, de raiki-tatra ka niteny hoe: "Matotoa io," ary de nikikika natatra zareo. ²⁷ Fa Jesosy nitare tamin-jareo avy hatraigny hoe: "Mahereza! Za ty! Aza matatra." ²⁸ Namaly an'Azy Petera ka nagnano hoe: "Tompo, raha Anao io, de asaivo magnatona An'nao aigny ambonin'ny rano za." ²⁹ Ozy Jesosy hoe: "Magnatona" ka de niala avy takao amin'ny sambokely Petera ary nande teo ambony rano mbô hagnatona an'i Jesosy. ³⁰ Fa rafa natazagna ny rivotra Petera, de lasa natatra. Raha igny izy nagnomboka nilentika igny, de nikikika mafy izy sady nitare hoe: "Tompo, vonjeo za!" ³¹ Avy hatraigny Jesosy de naninjitra ny tànany, nitana an'i Petera, ary nitare tamin'azy hoe: "Anao ry kely finoana, fa magnino anao no magnahiahy?" ³² Avekeo Jesosy sy Petera nande nihazo ny sambokely, nitsatra nitsoka ny rivotra. ³³ Avy akeo reo mpianatra tao agnaty sambokely nidera an'i Jesosy ary nitare hoe: "Anao marina no Zanak'Andriamanitra." ³⁴ Rafa avy nempita zareo, de tonga taigny an-tanety takao Genesareta. ³⁵ Rafa nafantatra an'i Jesosy reo leila takao am'zany tôrana zany, de nandefa hafatra taigny amin'ny faritra magnodidina daôly, ary nentin-jareo takeo amin'Azy ze ôla narary daôly. ³⁶ Nitalaho tamin'Azy zareo mbô hafahan-jareo mikasika ny oron'ankanjony fotsiny iany, ary betsaka reo nikasika an'zany ka sitrana.