¹ Niditra Jesosy ary nandalo an'i Jeriko. ² Indro, nisy leila ze nantsovina hoe Zakaiosy takeo. Izy de lehiben'ny mpamory hetra sady nanagn-karena. ³ Niezaka ny hitazagna izy hoe iza Jesosy, kanefa tsy afaka natazagna tao agnaty vahôka, satria foika izy. ⁴ Ka niazakazaka nelô reo ôla izy ary nagnanika hazon'aviavy raika mbô hatazagna an'Azy, satria handalo am'zany lalana zany Jesosy. ⁵ Nony tonga takeo am'le tôrana Jesosy, de niandrandra Izy ka nitare tamin'azy hoe: "Ry Zakaiosy, midigna malaky, fa gniany de tsy maintsy hijanona akao an-dragnonao Za." ⁶ De nidigna malaky izy ary nandray an'Azy tam-pifalena. ⁷ Rafa natazagna zany ny daôly, de nitaraina avokoa, nitare hoe: "Niditra hitsidika leila ze mpanota Izy." ⁸ Nitsangana Zakaiosy ka nitare tamin'ny Tompo hoe: "Jereo, ry Tompo, ny antsasaky ny fananako de ameko ho an'ny mahantra, ary raha ôtra ka nisy ra nagnambakako ôla, de honerako avo efatra heny." ⁹ Jesosy nitare tamin'azy hoe: "Gniany ny famonjena no tonga akato am'ty tokantragno ty, satria izy kô de zanak'i Abrahama. ¹⁰ Fa ny Zanak'ôla de tonga mbô hitady sy hamonjy ny very." ¹¹ Raha naregny zany ra zany zareo, de nanohy nitare Izy ary nagnano fagnoharana raika, satria takeo akaikin'i Jerosalema Izy, ary zareo nieritreritra fa hibôgna teo noho eo ny fanjakan'Andriamanitra. ¹² Noho zany Izy de nitare hoe: "Nisy tandapa raika nande taigny an-tany lavitra mbô hahazo fanjakana ho an'ny tegnany ary hiverina avy akeo. ¹³ Nagnantso folo lahy tam'reo mpanompony izy, ary nagnome farantsa folo an-jareo, ary nitare tamin-jareo hoe: 'Magnanôva raharaham-barotra mandra-piviregnako." ¹⁴ Kanefa reo vahôkany nankahala an'azy ary nandefa solontegna nagnaraka an'azy, nitare hoe: 'Tsy ilainay ny hanjakan'io leila io aketo aminay.' ¹⁵ Ary rafa niverigna izy, ary nandray ny fanjakana, de nandidy reo mpanompony ze nameny vola mbô hankeo amin'azy izy, mbô hafantarany ze tombony azon-jareo tamin'ny fagnanôvana raharaham-barotra. ¹⁶ Tonga takeo agnolôny ny vôlôny, nitare hoe: 'Tompo, ny farantsanao de nahazo tombony farantsa folo mihôtra.' ¹⁷ Nitare an'azy le tandapa hoe: 'Tsara zany, ry mpanompo tsara. Noho anao nahatoky tamin'ny kely de kely, de hanam-pahefana amin'ny tanàna folo anao.' ¹⁸ Tonga le faharôy, nitare hoe: 'Ny farantsanao, Tompo, de nahavita farantsa dimy.' ¹⁹ Ary nitare tamin'azy le tandapa hoe: 'Hiandraikitra tanàna dimy anao.' ²⁰ Tonga ny raika hafa, nitare hoe: 'Tompo, indro ny farantsanao, ze notehiriziko tsara takao agnaty lamba, ²¹ fa natatra an'nao za, satria leila maseka anao. Ka maka ze tsy napetrakao, ary mijinja ze tsy nafafinao.' ²² Nitare tamin'azy le tandapa hoe: 'Amin'ny teninao manokana no hitsarako an'nao, anao ry mpanompo ratsy fanahy. Fantatrao fa za de leila maseka, maka ze tsy napetrako, ary mijinja ze tsy nafafiko. ²³ Ka magnino ma no tsy napetrakao taigny amin'ny mpitahiry vola ny volako, ka rafa niverigna za de ho nandray zany niaraka tamin'ny zanany?' ²⁴ Le tandapa nitare tam'reo ze nitsangana teo ankeiky teo hoe: 'Esory amin'azy ny farantsa, ary ameo an'le managna ny farantsa folo.' ²⁵ Ary ozy zareo tamin'azy hoe: "Tompo, managna farantsa folo izy.' ²⁶ 'Za mitare aminareo, fa ze daôly managna de hamena mihôtra, fa ze tsy managna, na de ze anagnany aza de ho alaina. ²⁷ Fa reo fahavaloko, reo ze tsy nagniry anà hanjaka aketo amin-jareo, ento aty zareo ary vonoy aketo agnolôko.'" ²⁸ Rafa avy nilaza an'reo ra reo izy, de nande nelô, niakatra ho aigny Jerosalema. ²⁹ Ary nony tonga takeo ankekin'i Betifaga sy Betania Izy, takeo amin'ny tendrombotra antsovina hoe Oliva, de nagniraka ny rôy tam'reo mpianany Izy, ³⁰ nitare hoe: "Mandiana aigny amin'ny tanàna magnaraka. Rafa miditra anareo, de hatazagna zana-boriky raika mbôla tsy nitikinan'ôla mintsy. Vahao zany de ento aty aminà. ³¹ Raha misy magnontany an'nareo hoe: 'Magnino ma no vahanareo io?' de lazao hoe: 'Misy ilàn'ny Tompo an'azy.' ³² Reo ze niràna de nande ary natazagna le zana-boriky araka ny nolazain'i Jesosy tamin-jareo. ³³ Raha teo am-pamahana ny zana-boriky zareo, de ozy reo tompony tamin-jareo hoe: "Magnino ma no vahanareo ny zana-boriky?" ³⁴ Nitare zareo hoe: "Misy ilàn'ny Tompo an'azy." ³⁵ Nentin-jareo taigny amin'i Jesosy zany, ary napetrak'zareo takeo ambonin'ny zana-boriky ny lambany ary nametraka an'i Jesosy teo amboniny. ³⁶ Raha nande igny Izy, de novelarin-jareo takeo amin'ny lalana ny lamban-jareo. ³⁷ Ary rafa nagnakaiky an'le tôrana fidirana amin'ny tendrombotr'Oliva Izy, de nagnomboka nifaly reo mpianany maro be ary nidera an'Andriamanitra tamin'ny feo mafy nohon'ny asa lehibe daôly ze hitan-jareo, ³⁸ nitare hoe: "Deraina anie ny mpanjaka ze avy amin'ny agnaran'ny Tompo! Fiadanana aigny an-dagnitra ary voninatra aigny amin'ny avo ndrindra!" ³⁹ Ny Fariseo sasagny takeo amin'ny vahôka de nilaza tamin'azy hoe: "Mpampianatra ô, tineno mafy reo mpianatrao." ⁴⁰ Namaly Jesosy ary nitare hoe: "Lazaiko aminareo, fa raha mangina reo, de hikikika ny vato." ⁴¹ Rafa nagnantona ny tanàna Jesosy, de nitomany an'azy, ⁴² nitare hoe: "Raha mbô fantatrao mantsy am'zao andro zao, iôny anao, reo ra ze mitondra fiadanana ho an'nao! Nefa am'zao fotôna zao regny de miafina amin'ny masonao. ⁴³ Fa ho avy aminao reo andro, ze hananganan'ny fahavalonao manda magnodidigna an'nao, ary hanodidigna an'nao, ary hanery an'nao amin'ny lafiny daôly. ⁴⁴ Zareo de handavo an'nao amin'ny tany miaraka amin'ny zanakao. Tsy hamela na de vato raika mifanovogna aza zareo, satria anao tsy nafantatra zany fony Andriamanitra niezaka ny hamonjy an'nao." ⁴⁵ Niditra takao an-tempoly Jesosy ary nanomboka nandrôka reo ze nivarotra, ⁴⁶ nitare tamin-jareo hoe: "Efa vôsoratra hoe: 'Ny tragnoko de natao tragno fivavahana,' fa anareo kosa magnano zany ho zohy fisitrifan'reo jiolahy." ⁴⁷ Ka de nampianatra isan'andro takao an-tempoly Jesosy. Reo lôhan'ny mpisorogna sy reo mpagnora-dalàna ary reo mpitarika ny vahôka de nitady hamono an'Azy, ⁴⁸ fa tsy nahita fomba hagnanôvana zany zareo, satria nazoto nitaino an'Azy ny vahôka daôly.