¹ Pa nyengo yiranyene ubufumu bwa kumwanya bwayu kuba bwakuyerezgera na banamwali teni bo bakanyamura inyale zgabo, bakafuma ukuyu kumupochelera umwenecho uwa wukwati. ² Po bamo fayivi bakaba bakupusa, po na banji fayivi bakaba bakuchenjera. ³ Pakuti abakupusa abo, po abene bakasenda inyale zgabo, batakayisenderaso amafuta. ⁴ Kwene abamahara abo bakayisendera amafuta mu vyakusendera vyabo, poka ni nyale zgabo. ⁵ Po aponyene po umwenecho uwa wukwati akati achedwa, bonsi bakasipura po bakagona. ⁶ Kwene pakasi pa wusiku pakaba ukupundilizga, 'Yen'yi, umwenecho wa wukwati! Mufume muye mukumane nawo.' ⁷ Po aponyene bakanyamuka abanamwari bonsi, po bakakozga inyale zgabo. ⁸ Abakupusa bakanena na bamwabo abakuchenjera, 'Mutugabireko amafuta ginyu chifukwa inyale zgitu zikuzima.' ⁹ Abakuchenjera bakazgora bakati, 'Iswe amafuta gitu gatangatukwanira iswe niimwe, kwene nkhaninkhani muye ku bo bakukazga aga malonda, muye muyikalire imwe mweka.' ¹⁰ Po abene po bakajendaga pakuyu kukala, umwenecho wa wukwati akinza, bo bakanozgeka bakinjira nawo poka mu wukwati, po bakigalira pamulyango. ¹¹ Po pisinda lyakwe bakinzaso abanamwari abanji bara, bakati, 'Mulungu, Mulungu, mutwigulire iswe.' ¹² Kwene uwene akazgora akati, 'Ine nadi nkhunena niimwe, nthabamanyire.' ¹³ Chifukwa chakwe mulindilire, pakuti mutakumanya isiku lyakwe pamo ni nyengo yakwe. ¹⁴ Nomba pakuti ngati umunthu wo akujenda pawulendo, akabitizga abazga bakwe, akabalechera ichuma chakwe. ¹⁵ Po nomba woka akamupa indalama izga matalenti fayivi, nu wamwabeso zibiri, nu wamwabeso yoka. Po aliwonsi akamupa umwakuyanana na maka gakwe, uwene po akajenda. ¹⁶ Po aponyene uyu wo akapoka indalama fayivi po akabuka nazgo ukuyu ukuyikalira amalonda, akapinduraso indalama zgamwabo fayivi. ¹⁷ Umwakuyananaso bulo nu wandalama zibiri, wope akapindura izgamwabo zibiri. ¹⁸ Kwene wo akapoka indalama yoka akajenda, akaya abana pansi, akayizgika indalama iya bwana wakwe. ¹⁹ Pakati pajenda inyengo iyitali, akinza ubwana wabo uwa bazga bara, akaberenjera nawo poka. ²⁰ Po uyo wo akapoka indalama fayivi zira akinza ali ni ndalama izinji fayivi. Akanena, 'Bwana, mukampha indalama izga matalenti fayivi. Yen'ya, napinduraso izinji fayivi.' ²¹ Ubwana wakwe akanena nawo, 'Wachiti chete, we muzga we mwinza uwakugomezgeka! Ukaba we wakugomezga pa tunthu utunsi. ndikwikazga iwe pa vinthu ivinji. Yinjira iwe mu chikondwelero icha bwana wako.' ²² Po wope uwa ndalama bibri yura po wope akinzaso akati, 'Bwana, mukampha ine indalama zibiri. Yen'yi, napinduraso indalama izgamwabo zibiri.' ²³ Ubwana wakwe po akanena nawo, 'Wachiti chete, we muzga we mwinza uwakugomezgeka! akaba we wakugomezga pa tunthu utunsi. Ndikwikazga iwe pa vinthu ivinji. Yinjira iwe mu chikondwelero icha bwana wako.' ²⁴ Po wopeso wo akapoka indalama yoka akinza akati, 'Bwana, nkhakumanya iwe ukuti we wakugoma umoyo. Uwakugobora po mutalimire, uwakuwunganika ko mutapesire. ²⁵ Nkhanyira ine, nkhajenda nkhayizgika indalama yinyu. Yen'ya, asi iyi yinyu.' ²⁶ Kwene aponyene ubwana wakwe akazgora, akamuzgora akati, 'We muzga we mubibi iwe we mukata, ukamanya ukuti nkhugobora po nthapesire nu kuwunganika ko nthapesire. ²⁷ Ichifukwa chakwe nge ukatwara indalama yane ku bakukongola indalama, ine pakwinza nge nkhasenda indalama zgane ni phindu lyakwe. ²⁸ Ichifukwa chakwe sendiko indalama iyo kwa wuyo muyitware ku bo bali ni ndalama teni. ²⁹ Pakuti aliwonsi wo ali nazgo, kuliperecheka, po uwene aliba nazgo izginji nkhani. Kwene ku wo ate nazgo, kulipocheka nacho ame nacho. ³⁰ Po mumusumbire umuzga uyo uwamburu phindu ku chisi icha kunzi, ukonyene ko kukwinzu kuba kulira nukusya amino.' ³¹ Po Umwana wa Munthu akwinzu kwinza mu bulemelero bwakwe na bangelo bonsi poka nawo, po aponyene akwinzu kwikala pa chimpando chakwe icha kulama. ³² Po abanthu aba mitundu yonsi bakwinzu kuwungana paminso gakwe, po uwene akwinzu kubalesan'ya uwamwabo nu wamwabo, ngati mo umubusa akuzilesan'ya imberere ni mbuzi. ³³ Akwinzu kubika imberere ku nyobe yakwe iya ndyero, kwene imbuzi kunyobe iya kumongo. ³⁴ Aponyene po Imfumu iyo yikwinzu kunena na bo bali kunyobe yakwe iya ndyero, 'Zaji uku, mwe bakutumbikika mwe bakwa Baba wane, mwinjire mubufumu bo bukabanozgechera imwe ukwambira apa kwikhazikisya ukwa charo icha pansi. ³⁵ Pakuti nkhaba ni nzala po mukampha ine ukurya; Nkhaba ni nyota po mukang'wesya; Po nkhaba ne mulendo po mukamphochelera ichete; ³⁶ Ne wankhule ine po mukanzwika; Po nkhalwara po mukinza pakwizga niine; Po nkhaba munyumba iya ndende po mukinza kuiine.' ³⁷ Po aponyene abalunji bakwinzu kumuzgora uwene ukuti, 'We Mulungu, tukaben'ya lii ukuti muli ni nzara nu kubaryesya? Pamo ni nyota nu kubang'wensya? ³⁸ Po tukaben'ya lii ukuti mwe balendo nu kubapochelera ichete? pamo wankhule nu kubazwika? ³⁹ Po imwe tukaben'ya lii ukuti mukalwara pamo munyumba iya ndende po tukinza kuimwe?' ⁴⁰ Po Imfumu iyo yikwinzu kuzgora ukuti, 'Ine nadi nkhunena niimwe, chifukwa mukachita ichi mu woka uwa mukamu wane uwa mu bakuchepa aba, mukantchitira ine.' ⁴¹ Po aponyene Uwene alinena na bakunyobe it's kumongo, 'Fumiko kuine, mwe bakutembeka imwe, muye mu moto uwamburu kumara uwa kumunozgechera usatana na bangelo bakwe, ⁴² Pakuti nkhaba ni nzara, po mutakampha ine ukurya; Nkhaba ni nyota, po mutakang'wensya ine; ⁴³ Nkhaba ne mulendo, mutakamphochelera ine; Ne wankhule po mutakanzwika ine; Po nkhalwara na munyumba iya ndende, po mutakinza ukunen'ya.' ⁴⁴ Po aponyene bope bakwinzu kuzgora ukuti, 'Mulungu, tukaben'ya lii ukuti muli ni nzara, pamo ukuti muli ni nyota, pamo ukuti mwe balendo, pamo ukuti muli nkhule, pamo ukuti mukalwara, pamo ukuti muli munyumba iya ndende, po iswe tutakabatumichira imwe?' ⁴⁵ Po aponyene Uwene alibazgora ukuti, 'Ine nadi nkhunena niimwe, chifukwa mutachitiyepo ichi nayumo uwa bansi aba, mutakaba uwakuntchitirapo ichi nalumo.' ⁴⁶ Po aponyene bakwinzu kufumapo nukuya ku wuyimvi uwa nyengo yonsi, kwene abalunji ku wumoyo uwa nyengo yonsi."