¹ Aponyene po uYesu po akanena nu bwinji ubwa banthu na basambiri bakwe. ² Akanena, "Abalembi na bafarisi bikala pa mpando uwa Mose. ³ Ichifukwa chakwe vinthu vyonsi vyo abene bababuzga, muvichite po muvisunje. Kwene mutachite vyo abene bakuchita, pakuti abene bakunena kwene batakuchita. ⁴ Nadi, bakupinya ukatundu uwakung'wama nu wakulisya pakunyamula, nukunyamulira pa vipungo ivya banthu. Kwene abene beka batakwanza ukumufumyapo beka ni nyobe zgabo. ⁵ Kwene bakuchita imbombo zgabo zgonsi ukuti balolechere ku banthu. Abene bakukuzga ubukuru ubwa tumakarata utwa amazwi aga Mulungu ukuti bazwaraje paminso ni nyobe zgabo, nu kukuzga ubuzi ubwakuposa uwa mulubazu mu vyakuzwara vyabo ivitali. ⁶ Bakutemwa amalo aginza aga pa chakulya icha chamabwira ni mipando iyinza iya ntchindi mu masinagogi, ⁷ nu kuneneka mu misika, nu kupundika na banthu ukuti 'Rabi.' ⁸ Kwene imwe mutapundiche ukuti 'Rabi,' pakuti musambizi winyu ali woka, po imwe mwensi mwe bakamu. ⁹ Po imwe mutamupunde aliwonsi ukuti ubaba pansi ya pansi apa, pakuti alipo woka uwene wo Ubaba winyu uwa kumwanya. ¹⁰ Po mutapundiche ukuti 'mwe barongozgi,' pakuti ali woka wo murongozgi winyu, wo Ukhristu. ¹¹ Kwene wo mukuru uwakurusya uwuimwe akwinzu kuba mutumiki winyu. ¹² Po aliwonsi wo akuyikuzga weka, wo akwinzu kuba munsi, kwene wo akuyichefya weka wo akwinzu kuba mukuru. ¹³ Soka kuimwe, mwe balembi na bafarisi, mwe bakupusika! Chifukwa mukwigalira abanthu mubufumu ubwa kumwanya paminso gabo. Pakuti imwe mweka mutakwinjiramo, Po mukubalesya bo bakwinzu kwinjira ukuti batinjiremo. ¹⁴ Soka kuimwe, mwe balembi na bafarisi, mwe bakupusika imwe! Mukupoka uwusambazi ubwa bafwirwe, po muwupusichizi winyu mukuyiputa imphuto izitali ukuti abanthu baben'ye. ¹⁵ Soka kuimwe, mwe balembi na bafarisi, mwe bakupusika! Chifukwa mukujendajenda kunyanja na ku bwalulu ukuti muye muponosye umunthu woka, kwene nanthi ang'anamuka, mukumusenda ukuti wo wakwenelere ukusumbika mu gehena ukurusya imwe. ¹⁶ Soka kuimwe, mwe barongozgi mwe mutakwen'ya, mwe mukuti, 'Aliwonsi wo akulapa nukutambura icharichi, pate chilichonsi. Kwene wo akulapa nukutambura ugolide uwa mu charichi, akuyipinyilira weka.' ¹⁷ Imwe mwe bakupusa na mwe mutakwen'ya, pakuti cho chakurusya cho chili kwii, ka ugolide fwandi pamo charichi cho chikuzerufya ugolide uyo? ¹⁸ Popeso, 'aliwonsi wo akulapa nukutambura iguwa ilya nsembe, pate chilichonsi. Kwene aliwonsi wo akulapa nukutambura ichakupereka cho chili pamwanya pi guwa ilya nsembe, akuyipinyilira.' ¹⁹ Imwe mwe mutakwen'ya! pakuti cho chakurusya choni, ichakupereka fwandi, pamo iguwa ilya nsembe lyo likuzerufya ichakupereka icho? ²⁰ Ichifukwa chakwe, wo akulapa nukutambura iguwa ilya nsembe, inthi alape ilyonyene ni vyapamwanya vyakwe. ²¹ Po wo akulapa nukutambura icharichi, inthi Abe wakulapa ubonyene na wo ayikaye munumo, ²² na wo akulapa nukutambura kumwanya, akulapa ni chimpando icha Mulungu na wo akwikala panapo. ²³ Soka kuimwe, mwe balembi na bafarisi, mwe bakupusika! chifukwa mukupereka icha chikhumi icha tumbeyu utwa kanyenze, ni mphiripiri, nu wusambya, nukuleka ivyakung'wama ivya chilamulo, ivyo vyo vyakweruzga umwa wunenesyo nu kubachitira ubwira nu kugomezga. Kwene vila mukenelera ukuvichita ukwamburu kuleka ivi. ²⁴ Mwe barongozgi abamburu kwen'ya, mukusuya inyenyenzi mu vyakung'wera vinyu kwene ngamira mukumira! ²⁵ Soka kuimwe, mwe balembi na bafarisi, mwe bakupusika! chifukwa mukuchapa kunzi ukwa lupindi ni mbale, kwene mukasi mwakwe mwizura ni vyakupoka kwamburu ukuyilema. ²⁶ We mfarisi iwe we wamburu kwen'ya! Wambe usuche mukasi umwa lupindi poka ni mbale, ukuti kunzi kwakwe kubeso kwakuzerupa. ²⁷ Soka kuimwe, mwe balembi na bafarisi, mwe bakupusika! Chifukwa mukuyana na madindi agakupaka u laimu, go gakuloreka aginza kunzi kwakwe, kwene go mukasi gizuye ni vifupa ivya banthu abakufwa ni vibibi vyonsi. ²⁸ Ubonyeneso, imweso mukuloreka mwe balunji kuminso aga banthu, kwene mukasi mwizuye ni lenga nu kwamburu kweruzgika. ²⁹ Soka kuimwe, mwe balembi na bafarisi, mwe bakupusika! chifukwa mukuzenga inyumba izga pa madindi aga baneneri, po mukuyan'ya amadindi aga banthu abalunji. ³⁰ Nukuti, 'Iswe nge twangwikala mu masiku aga mu bababa, te nge tukivwana nabo pa daba uwa baneneri.' ³¹ Aponyene inthi musimichizge mweka ukuti mwe bana aba ibo bo bakagoga abaneneri. ³² Ubonyene mumalizge imbombo yo abababa binyu bakayamba. ³³ Mwe njoka imwe, mwe bakupapwa bana aba chipiri, mulichimbira bulibuli nu kweruzga ukwa gehena? ³⁴ Chifukwa chiichi, yen'ya, inthi inthume kuimwe abaneneri na bamahara na balembi. Bamo muibo mukwinzu kubagoga, po mukwinzu kubapayika; na banjiso mukwinzu kubasyempha mu masinagogi ginyu nu kubayimvya ukufuma mu chikaya choka ukufichira ku chikaya ichinji. ³⁵ Ubonyene wukwinzu kufichira piimwe udaba wonsi wo witika pa charo icha pansi, ukwambira pa daba uwa Abelo wo mulunji, ukwinzu kufichira pa daba uwa Zakariya umwana wa Barakiya, wo mukamugoga pakasi pa charichi na piguwa ilya nsembe. ³⁶ Ine nadi nkhunena niimwe, vinthu vyonsi ivi vkwinzu kufika mu kupapwa ukwa nomba. ³⁷ Ha, Yerusalemu, Yerusalemu, we ukugoga abaneneri nu kubadinya na mabwe bo batumisire kuiwe! Ine nkhanza kalinga kuwunganika abana bako poka, nadi ngati mo inkhuku yikuwunganichira abana bakwe munkhwapa zgakwe, kwene imwe mutakanza awe! ³⁸ Yen'ya, inyumba yinyu yalecheka kuimwe iyambura kalikonsi. ³⁹ Pakuti nadi nkhunena niimwe, mutalinen'yaso ine ukwamba ukwa nomba ukufichira po mulinena, 'Uwakuchindikikwa wo akwinza mwizina ilya Mulungu.'"