Chapita 21
UYesu pakwinjira mu Yerusalemu.
1
Po aponyene po abene po bakati bapalamira ku Yerusalemu po bakafika ku Betefago, kwigamba ilya azitona, po aponyene uYesu akatumizga abasambiri bakwe babiri,
2
po akanena nabo, "Bukaji ku chikaya chira cho mukulorana nacho, po mwayu kuyaga imbunda yo bayipinyiriye, na kana kakwe. Muzisature mwinze nazgo kuine.
3
Munthu nanthi anena akanthu kamo niimwe, mwinze muti, 'UMulungu akuzganza,' po panapo bakwinzu kuzitumizga."
4
Ubonyene po vikachitika ukuti vikwanirisyiche na mazwi aga muneneri, ukuti,
5
"Mumubuzge umwana umwanthanda uwa Ziyoni,
'Yen'ya, Imfumu yako inthi yinze kuiwe,
Uwakufwasa wo akukwera pa mbunda- na pakambunda, umwana uwa nyama iya kunyamula ukatundu.'''
6
Po abasambiri abo banyamuka, po bakachita mo uYesu akababuzizga.
7
Po bakinza nu mbunda na kana kakwe, po abene bakabikapo ivyakuzwara vyabo, po uwene akikala panapo.
8
Po abanthu abinji aba mpingo uwo bakayala ivyakuzwara vyabo panzira, po bamo bakadumura insamba izga makwi, po bakayalaga munzira umo.
9
Ni mipingo yo yikalongolera na yo yikamulandataga, yikapundilizga yikati,
"Hosana ku mwana uwa Deveti!
Uwakuchindikika wo akwinza mwizina ilya Mulungu!
Hosana kumwanya nkhani!"
10
Po aponyene po akinjiraga mu Yerusalemu, ichikaya chonsi chikagwedezeka, bakanena, "Ngapo wuwenu?"
11
Po ubwinji ubwa banthu bukati, "Uyu wo umuneneri wo uYesu uwa ku Nazareti ku Galileya."
12
Po uYesu akinjira mu charichi ilya Mulungu. Po akabafumya bonsi bo bakakazgaga na bakukala amalonda, akagwisya na matebulo aga bo bakasinthaga indalama, na mapando aga bo bakakazgaga inkhunda.
13
Akanena nabo, "Kulembesile, 'Inyumba yane yakupundika ukuti yakuyiputiramo,' kwene imwe mwayisenda ngati mphanji it's bankhungu."
14
Abene po bakaya kwa wuyo ku charichi abamburu kwen'ya na bakulemara ivinama, po bakachizgika.
15
Kwene abansembe abasongo na balembi, po bakati ben'ya ivyakuziziswa vyo uwene akavichita, na bo bakapundilizga mu charichi umo ukuti, "Hosana ku mwana uwa Deveti," po bakakalala nkhani.
16
Po bakanena nawo, "Ka mwivwa vyo bakunena aba?" Po uYesu akanena nabo, "Nadi! Mutaberenzire fwandi, 'Mu malomo aga bana nu twabonda mo mwanozgechera ivyakumuchindika'?"
17
Po uwene akabaleka, po akafuma mukaya nukuya ku Betaniya, ko akaya agona kunuko.
18
Po inzantchi yakwe po uYesu akagaluchiraga ukuya ku Yerusalemu, akivwa inzara.
19
Po pakwen'ya ikwi lyikunyu lyoka munzira, po akajenda paranyene po akaga mute nanthi chimo kwene amatundu geka. Po uwene akati kwi kwi lyikunyu, "Utalipasaso ichipasi nyengo yonsi," Po aponyene ikwi lyikunyu likafota.
20
Po Ubonyene abasambiri bakwe bakati ben'ya, bakazizwa sana, bakati, "Ikwi ilyo likafota bulibuli umwalubiro?"
21
Po uYesu akazgora, akanena nabo, " Ine nadi nkhunena niimwe, nanthi inthi mube ni chigomezgo, mutabe mwe bakukayichira-kayichira, mukwinzu kuchita ichikulu ichakuchira pi kwi lyikunyu, kwene nanthi mukwinzu ukuti na kwigamba bwelere ili, 'Nyamuka uye ugwire munyanja,' chikwinzu kuchitika.
22
Ivinthu vyonsi nanthi mwavyanza mukuyiputa nu kugomezga, mukwinzu kupochelera."
23
Po uwene po akinjira mu charichi, abansembe abasongo na basongo aba banthu po bakaya kwa wuyo po akasambizgaga, po bakanena, "Mukuchita ivi nu wulamuliro uwamutundu buli, wenu wo akabapa uwulamuliro ubwangati ubu?
24
Po uYesu akabazgora, akati, "Ine nane imbabuzgeko ibuzgo lyoka. Imwe nanthi inthi mumbuzge, Ine nanenso inthi imbabuzge uwulamuliro wo nkhupanjira ivi.
25
Ububabatizo ubwa Yohane, bufumiye kwii? Bufumiye kumwanya pamo ku banthu?" Abene po bakamba ukubuzan'ya wamwabo nu wamwabo, ukuti, "Nanthi twati, 'Kumwanya,' uwene inthi ayinze ati kuiswe, 'Choni cho mutakamwivwira haa?'
26
Kwene nanthi twati, 'Ku banthu,' tukunyira ubwinji ubwa banthu ubo, pakuti bonsi bakamusenda uYohane ukuti muneneri."
27
Po bakamuzgora uYesu, bakati, "Iswe tutakumanya." Uweneso po akanena nabo, "Inenso nthe imbabuzge uwulamuliro wo ndinawo wo nkhupanjira ivi.
28
Po inthi muti buli? Umunthu akaba na bana babiri. Akinza kumwana uwa kwamba akati, 'We mwana iwe, ilero bukaga uwombe imbombo ku mugunda uwa mphesa.'
29
Kwene uwene akakana akati, 'Ine nthakwanzako,' kwene pisinda lyakwe po akivwa ubwira, po akajenda.
30
Po akajendaso ku wachibiri, po wope akamubuzgaso ubonyene. Po uwene akazomera akati, 'Inthi njende, baba,' kwene atakajenda.
31
Wenu uwa babiri aba wo akachita ichete ukwanza ukwa baba wabo?" Abene po bakanena, "Uwakwamba uyo." UYesu akanena nabo, "Ine nadi nkhunena niimwe, ukuti abamusonkho na banthanda aba uhule bakulongolera kuimwe ukwinjira mubufumu ubwa kumwanya.
32
Pakuti uYohane akinza kuimwe munziya iya wunenesyo, imwe mutakamwivwira, kwene abamusonkho na banthanda aba mu uhule po abene bakamwivwira. Po imwe , po mukati mwen'ya, mutasinsite pisinda lyakwe ukuti mumwivwire.
33
Mwivwisye ichiyerezgero ichamwabo. Pakaba umunthu umwenecho uwa nyumba, wo akalima umugunda uwa mphesa, akazinjirizga ulubaga, akabana ichiliba ichakupuliramo imphesa, po akazenga ibanza, po akabazimya abakulima umugunda. Po akaya ku charu ichinji.
34
Inyengo iya vipaso yikati yapalamira, akatumizga abazga bakwe ku bakulima umugunda uwo ukuyu ukupochelera ivipaso vyakwe.
35
Po abakulima abo bakasenda abazga bakwe, po bakamukoma woka, po uwamwabo bakamugoga, po yumo bakamusumba na mabwe.
36
Po akatumizga abazga abanji, abinji abakuchira abakwamba, bope bakabachitira ngati abakwamba.
37
Kwene pisinda lyakwe, po akatumizga umwana wakwe, akati, 'Bakwinzu kumuchitira intchindi umwana wane.'
38
Kwene abakulima abo bakati bamwen'ya umwana uyo, bakanena uwamwabo nu wamwabo, 'Uyu wo wakwinjira. Uyu zaji tumugoge po iswe twinze tusende ichakwanzikwa chakwe.'
39
Po abene bakamusenda, bakamutajira kunzi ukwa mugunda, po bakamugoga.
40
Nomba nanthi ayinza umwenecho wa mugunda, inthi ayinze abachitire abakulima abo ichoni?"
41
Abene bakanena nawo, "Uwene inthi ayinze abananje umwabukuru nkhani abakwananga abo, umugunda uwo inthi ayinze abape abakulima abanji, bo inthi binze batwale ivipaso ivyo panyengo yakwe."
42
UYesu po akanena nabo, "Ka mutaberenzire mumalemba,
'Ibwe lyo uwakuzenga inyumba akalikana ilyonyene lyo likaba lya pamulyango uwa pa ngodya.
Ichi cho chikafuma ko kwa Mulungu, Ka ichi chakuziziswa muminso gitu'?
43
Ichifukwa chakwe nkhunena niimwe, ubufumu bwa Mulungu bukwinzu kubafumirapo piimwe, bukwinzu kuperecheka ku banthu bo bakupasa ivipasi vyakwe.
44
Po uwene uwakugwa pibwe ili akwinzu kufwanthika. Kwene pa wuyo wo inthi linze limugwire, inthi ayinze adinyinkhane ngati lutukumbwi."
45
Po abansembe abasongo poka na Bafarisi, pakwivwa iviyerezgero vyakwe, bakinza bamanya ukuti akubanena.
46
Po aponye po bakanzaga ukumulema, bakanyira ubwinji ubwa banthu, chifukwa bakamusenda ukuti umuneneri.