¹ Pakuti ubufumu ubwa kumwanya bukuyanana nu munthu umwenecho uwa nyumba wo akafuma inzantchi ukuyu ukulembera abambombo mumugunda wakwe uwa mphesa. ² Po aponyene po akapangana na bambombo ukubapa indalama iya dinari lyoka pisiku, po akabatuma ku mugunda wakwe. ³ Po akafuma izuba likati lyakwera, po aken'ya bamo bimilira bwelere panzi. ⁴ Uwene po akanena nabo, 'Imwe namwe, bukajiso ku mugunda, po nkhwinzu kubapa cho chakubenelera.' Po bopenyene bakajenda. ⁵ Popenyene akafuma umusanya Napa chamabwira, pope akapanga ubonye. ⁶ Po nomba po chikaba ichamabwira, akabaga bamo bimiliye, akanena nabo, 'Choni cho mwimilira bulo uku umusanya wonsi?' ⁷ Abene po bakanena nawo, 'Chifukwa pate wo akatulemba.' Uwene akanena nabo, 'Namwenyene jendaji mumugunda buranyene uwa mphesa.' ⁸ Po ukufika pa chamabwira, umwenecho uwa mugunda akanena nu kapitawo wakwe, 'Kabite abambombo, ubape na malipiro gabo, wambire ku bo bame abawumaliro, umalire bo bame abakwamba. ⁹ Po abene bo bakalembeka panyengo iya chamabwira bakati binza, umunthu aliwonsi akupochelera idinari lyoka. ¹⁰ Ubonyene abakwamba bakati binza, bakatinji inthi bapoke aginji, kwene bopenyene bakapochera amalipiro aga dinari lyoka. ¹¹ Bakati bapoka, bakadelerw ku mwenecho uwa nyumba. ¹² Po bakati, 'Abawumaliro aba babomba imbombo inyengo iyakuchepa bwelere, nangabuli mwabayanisya bwelere niiswe, see twapilira nukubabwa ukwa lusanya na mo likuwochezga.' ¹³ Kwene uwene akazgora akati ku woka wabo, 'We wamwitu, ine nthakunanjiyepo. Asi twangwivwana idinari lyoka? ¹⁴ Senda bwelere cho chako ujendaje. Nkhwanza mpe uwawumaliro umwakuyanana niiwe. ¹⁵ Ka te chakuzomerezgeka kuine ukuchita cho nkhwanza pa vinthu vyane? Pamo ilyinso lyako lyabipa chifukwa chakuti ine ndiri chete?' ¹⁶ Ubonyene uwawumaliro akwinzu kupochelera umwakwamba, po uwakwamba akwinzu kuba uwawumaliro." ¹⁷ Po ubonyene po uYesu akakweraga ku Yerusalemu, akasenda abasambiri bakwe teni na babiri akajenda nabo pabeka, po panzira akanena nabo, ¹⁸ "Yen'ya, inthi tukwere ku Yerusalemu, umwana uwa Munthu inthi aperecheke mu nyobe izga bansembe abakuru na balembi, po abene inthi bamweruzge ukuti umwene imfwa yo yakumwenelera, ¹⁹ bakwinzu ukumutwala ku banthu aba kunzi ukuti bamuyimvye nukumuchapa, nu kumupayika. Po uwene akwinzu kunyamuka pisiku ilya chitatu." ²⁰ Aponyene po bakinza kwa wuyo umama wakwe uwa bana aba Zebediya na bana bakwe bonsi. Bakamufugamilira nu kumulaba akanthu. ²¹ Uwene po akanena nawo, "Ukwanzachi?" Po uwene akanena, "Mulamulire ukuti abana bane babiri aba binze basyale, yumo kunyobe yinyu ndyero, uwamwabo kuya kumongo, mubufumu winyu." ²² Kwene uYesu akazgora akati, "Imwe mutamanyire cho mukulaba. Ka mungang'welera mulupindi ulwakuti nkhwinza ukung'welera ine?" Abene bakanena nawo, "Iswe tungang'welera." ²³ Uwene akanena nabo, "Ulupindi lwane muling'welera nadi, kwene ukwikala kunyobe yane iya ndyero ni ya kumongo te kwane ukupereka, kwene kuli ku bo kwabanozgechera nu Baba wane." ²⁴ Po bakati bivwa teni abo, bakafulwa na bamwabo babiri abo. ²⁵ Kwene uYesu akabitizga, akati, "Mukumanya ukuti amafumu aga banthu gakubaponderezga abanthu babo, po abasongo abakurukuru bakulongozga amaka gabo ku banthu abo. ²⁶ Chitaliba uwonyene kuimwe awe. Kwene aliwonsi wo ayanza ukuti abe usongo kuimwe, akwinzu kuba umutumiki winyu, ²⁷ Po aliwonsi wo akwanza ukuti abe wakwamba muimwe, akwinzu kuba umuzga winyu, ²⁸ ngati umwana uwa Munthu atakinza ukuti abanthu bamutumichire, kwene ukutumichira, nukupereka umoyo wakwe ukuba ichakuponosezga abanthu abinji." ²⁹ Po aponyene po abene bakafumaga mu Yeriko, ubwinji ubwa banthu bukamba ukumulandata. ³⁰ Nomba yen'ya, abanthu abamburu kwen'ya babiri bakikala mulubazu munzira. Po bakati bivwa ukuti uYesu akuchilingan'ya, bakapundilizga bakati, "Mutchitire iswe ubwira, imwe we mwana wa Deveti." ³¹ Po ichigulu icho chikabakanizga, ukuti baleche ukupundilizga, abene po bakapundilizga nkhani, bakanena, "Mulungu, mutchitire ubwira, imwe we mwana wa Deveti." ³² Po uYesu akimilira, akabitizga akati, "Mukwanza imbachitiri choni?" ³³ Po bakanena nawo, "Mulungu, ukuti aminso gitu twen'ye." ³⁴ Po uYesu ubwira bukamulema, po akabakwamfya aminso gabo, po aponyeneso aminso gabo gaken'ya, po bakamulandata.