¹ Po pakaba po uYesu akamalizgaga ukunena amazwi agonyene, akafuma ku Galileya, akinzaga kuwumaliro ubwa Yudeya kwisyira lira ila Yordani. ² Po ubwinji ubwa banthu po bakamba ukumulandata, po Uwenu akabachizga ukonye. ³ Po abafarisi bakinza kwa wuyo, bakamuyezga, bakanena, "Ka chakuzomerezgeka ukuti munthu amuleche umwanthanda wakwe pachifukwa chilichonsi?" ⁴ Po uwene akabazgora akati, "Ka mutaberenzire ukuti uwene wo akalenga abanthu pakwamba akapera umwanavuli nu mwanthanda? ⁵ akati, 'Ichifukwa chiichi umwanavuli akwinzu kuleka ubaba wakwe nu mama wakwe po bakwinzu kuba poka nu mwanthanda wakwe, po abanthu babiri aba inthi babe mubibi woka'? ⁶ Ubonyeneso te banthu babiri, kwene mubiri woka. Ichifukwa chakwe ichi cho uMulungu akachipinya poka, umunthu atachilesan'ye." ⁷ Po abene po bakanena nawo, "Chifukwa buli cho uMose akalamulira ukupereka ukalata uwa kulekanira nu kumufumyapo?" ⁸ Po Uwene akanena nabo, "Chifukwa chakugoma amoyo ginyu, uMose akabazomerezga ukubaleka abanthanda binyu, kwene pakwamba te mo vikabera. ⁹ Ine po nkhunena niimwe, aliwonsi wo amuleka umwanthanda wakwe ukwambura ichifukwa icha uhule, nukusendaso uwamwabo ko kuti apanga ubuhule; po wope wo akumusenda wo bamuleka uyo, wope akupanga ubuhule." ¹⁰ Abasambiri bakanena nawo, "Nanthi umulandu uwa munthu nu mwanthanda wakwe wuli bunubu, te chinza ukusenda." ¹¹ Uwene po akanena nabo, "Aliwonsi atangapochelera ichakunena ichi, kwene ku beka bo chaperecheka. ¹² Pakuti balipo bo batakupapa, bo abene bakapapwa ubonyene mu Kasi umwa bamama babo, balipo bamo abambura ukupapa mukwanza ukwa banthu, pali abambura ukupapa bamo chifukwa icha kwanza beka chifukwa icha bufumu ubwa kumwanya. Wo angakwanisya ukuti achipochelere ichi, achipochelere." ¹³ Aponyene po bakamwinzira nu tubana ukuti uwene abiche inyobe yakwe pa tubana, nu kuyiputa, kwene abasambiri bakabasusya. ¹⁴ Kwene uYesu akati, "tuleche utubana, mutatukanizge kwinza kuine, chifukwa ubufumu ubwa kumwanya buli ngati bwa tubana." ¹⁵ Po uwene akabika inyobe yakwe pa tubana, po akafumapo. ¹⁶ Nomba yen'yi, umunthu akaya kwa wuyo, akati, "Musambizi, ichinza cho chili kwii cho intchite ukuti imbe nu umoyo uwa muyirayira?". ¹⁷ Uwene po akanena nawo, "Choni cho ukumbuzichizga izga chinthu ichinza? Alipo woka wo mwinza, nanthi ukwanza ukuti winjire mu wumoyo, usunje amalamulo." ¹⁸ Uwene po akanena Nawo, "Aga bulibuli?" Po uYesu akati, "Utagoje, utapanje uhule, utibaje, utabe we kaboni uwilenga, ¹⁹ uchindiche ubaba wako nu mama wako, utemwe uwamwinyu mo ukuyitemwezezwa iwe weka." ²⁰ Umunyamata uyo po akanena nawo, "Vyonsi ivi nkhavisunga. Po nkhusoberaso ichoni? ²¹ UYesu akanena nawo, "Nanthi ukwanza ukuti ube we wakufichirapo, bukaga, kakazge vyonsi vyo uli navyo, ubape abakavu, po inthi wube ni chuma kumwanya; po uye winzeso, undandate." ²² Kwene umunyamata uyo akati ayivwa ukunena ukuti ubonyene, akafumapo umwachitima, pakuti akaba nacho ichuma ichinji nkhani. ²³ Po uYesu akanena na basambiri bakwe, po nadi ine nkhunena niimwe, ukuti umunthu umwenecho uwa chuma akwinzu kwinjira umwakuyimbira mubufumu ubwa kumwanya. ²⁴ Ine po nkhunenaso niimwe, ukuti chapapipi ukuti ingamira yinjire pi lyinso ilya sindano ukulusya ukuti umwenecho uwa chuma ayinze ayinjire mubufumu ubwa kumwanya." ²⁵ Po abasambiri po bakati bivwa, bakazizwa nkhani, bakanena, "Wo inthi ayinze apone wuwenu?" ²⁶ Po uYesu akabenerezga, akanena nabo, "Ichi chitangachitika na banthu, kwene ivinthu vyonsi vyakuchitika nu Mulungu." ²⁷ Po aponyene uPetro akazgora, akanena nawo, "Yen'yi, iswe tukaleka vyonsi nu kubalandata imwe. Nomba ubonyene tukwinzu kusyara ni choni?" ²⁸ UYesu po akanena nabo, "Ine nadi apa po nkhunena niimwe, mukulengaso, nanthi Umwana wa Munthu ayinza ayikala pa mpando wakwe uwa ulemelero, imwe mwe mwandandataga namwenye mukwinzu kwikala pa mipando teni ni yamwabo yibiri, nu kweruzga amafuko teni na gamwabo gabiri aga Israyeli. ²⁹ Po bonsi bo baleka inyumba, pamo nabakamu, pamo nu mama, pamo nu baba, pamo ni migunda chifukwa chizina lyane, bakwinzu akupochelera ivyakuwezezga ivyinjivyinji bulo. Po bakwinzu kwinjira mu umoyo uwa muyirayira. ³⁰ Kwene abinji abakwamba bakwinzu kuba bawumaliro, po bo bakaba bawumaliro bakwinzu kuba bakwamba.