¹ Inyengo iyonyene uYesu akajenda isiku ilya sabata pakasi pa magunda aga tiligu. Po abasambiri bakwe bakaba ni nzala po bakambu ukupulura amatwe aga tiligu aga kuwumaliro, po bakambu ukulya. ² Pakwen'ya ichi, abafarisi bakanena nawo, "Yen'ya, abasambiri binyu bakuchita ichinthu cho te chakuzomerezgeka pisiku ilya sabata." ³ Uwene po akanena nabo, "Ka mutaberenzire cho uDeveti akachita, po uwene na banavuli bo akaba nabo inzara po yikabababa? ⁴ Mo akinjilira munyumba iya Mulungu po bakalya ababuledi abakulolesya, ichinthu cho chikaba chamburu kuzomerezgeka ukuti uwene alye, olo bo akaba nabo, kwene abansembe bekabeka. ⁵ Pamo mutaberenzire mu malamulo, ukuti isiku ilya sabata abansembe mu charichi bakubifya isiku ilya sabata, popenyene bate nu mulandu nanthi wumo? ⁶ Kwene nkhubabuzga ukuti umukulu uwakulusya ni charichi ali apanyene. ⁷ Popenyene mube mwe bakwivwisya iching'anamulo ichi, 'Nkhwanzu ubwira, insembe awe,' te nge mukaberezga abamburu kwananga. ⁸ Pakuti umwana uwa munthu wo Imfumu iyisiku ilya Sabata." ⁹ Akati afuma pa malo gala, akinjira mu sinagogi lyabo. ¹⁰ Nomba yen'ya, umwanavuli uwakulemara inyobe, ubonyene bakamubuzichizga ukuti, "Ka chakuzomerezgeka ukuti mumuchizge pa Sabata?" Mwakuti bamupe umulandu. ¹¹ Uwene akanena nabo, "Munthu wuli pakasi pinyu, wo ali ni mberere yoka wo nanthi yagwira muchibonga pisiku ilya sabata, wo angaleka ukuyilema nu kuyifumyamo? ¹² Ubonyene umuthu wakuzirwa ukulusya imberere! Ubonyene chakuzirwa ukuchita ichinthu ichinza pa Sabata." ¹³ Po akati ku mwanavuli yura, "Golosyi inyobe yako." Po akayigolosya, po yikaweleramo, po yikaba ichete bulo ngati inyobe yamwabo. ¹⁴ Kwene abafarisi bakafuma, po bakapangana ukuti bamugoje. ¹⁵ Ubonyene akati amanya ichi, uYesu akafumako kura. Abinji bakamulandata, Po akabachizga bonsi. ¹⁶ Po akababuzga umwamaka ukuti batamuvumbule. ¹⁷ ukuti chinze chichitiche cho chikaneneka nu Yesaya umuneneri , ukuti, ¹⁸ "Yen'ya, umutumiki wane wo nkhamuseba; wo mutemwizwe nkhani, wo umoyo wane wukukondwa nawo. inthi mbiche Umuzimu pa wuyo, ubonyene inthi alongozge uwulunji ku mitundu. ¹⁹ Ate alimbanepo nu munthu, nesi ukupundilizga; olo nu munthu nanthi woka ukuti ayivwe amazwi gakwe mu zganzira izikulu. ²⁰ Itete ilyakulepuka ate ayinze alipyole; ni nyali iyakwaka atakwinzu kuyizimya,ukufichira ukwinza ukunena uwunenesyo, ²¹ nadi mwizina lyakwe imitundu yikwinzu kugomezga." ²² Po bakamwinzira nu mwanavuli wo akaba ni vibanda, akaba uwanthonkho nu chinunu. wopenyene akamuchizga, ubonyene umwanavuli uchinunu akambu kunena nukwambu kwen'ya. ²³ Po ubwinji ubwa banthu bukambu kuzizwa, bakanena, "Asi uyu mean wa Deveti?" ²⁴ Kwene Abafarisi pakwivwa, bakati, "Uyu atakufumya ivibanda, kwene na maka gakwe aga Bulezebule, usongo uwa vibanda." ²⁵ Po uYesu akamanya amaghanighani gabo, po akanena nabo, "Uwufumu wuliwonsi uwakugabinkhana wukubanga bwakumala, ni chikaya chilichonsi ni nyumba iyakugabinkhana yitakwinzu kubapo. ²⁶ Umwakuyana bulo, waje usatana akufumya usatana, ubonyene ko kuti agabinkhana. Po ubufumu bwakwe inthi wimilire bulibuli? ²⁷ Nanthi ine nkhufumya ivibanda na maka gakwe aga Bulezebule, abana binyu bakufumya na maka gawenu? Chifukwa chakwe bakwinzu kuba abakweruzga binyu. ²⁸ Kwene nanthi nkhufumya ivibanda na maka gakwe aga Muzimu uwa Mulungu, ubonyene Uwufumu uwa Mulungu winza umwakubachenuchizga bwelere. ²⁹ Ngapo umunthu anginjira bulibuli munyumba iya munthu uwa maka nukumupoka ukatundu wakwe, nanthi atangamupinya umunthuyo ichakwamba? Po panapo po inthi asende ukatundu wo ali munyumba. ³⁰ Wo ate kulubazu lwane akunkhana, wo atakuwunganika poka niine akuvulungan'ya. ³¹ Chifukwa chakwe nkhunena niimwe, ukunanga konsi nukunena ukwamutafu konsi kukwinzu kugobochereka ku banthu, umutafu uwa pavilumba pa Muzimu Mutuba pate kugobochereka. ³² Aliwonsi wo angamunenera Umwana wa munthu ivinthu vibibi, akwinzu kugobochereka. Kwene aliwonsi wo anganenera Umuzimu Mutuba ivinthu vibibi, atakwinzu kugobochereka munyengo iyinye na yo yikwinza. ³³ Ikwi lyakwe nanthi lyinza ichipaso chakwe chikuba chakunona, nanthi ikwi lyakwe libibi ichipaso chakwe chope chikuba chibibi, ikwi likumanyikwa ni vipasi vyakwe. ³⁴ Mwe bakupapwa imwe mwe banjoka, munganena bulibuli ivyinthu ivyinza, po imwe mwe abanthu ababibi? Pakuti mulomo wukunena vyo vili mukasi mu moyo. ³⁵ Umunthu umwinza akufumya ivinthu ivyinza mu chuma chakwe chinza, nu munthu wo mubibi akufumya ivinthu vibibi muchuma chakwe cho chibibi. ³⁶ Po nkhunena niimwe ukuti amazwi gonsi go gamwalwemwalwe go abanthu bakwinzu kunena, bakwinzu kugaberenjera umulandu wakwe pisiku ilya kweruzga. ³⁷ Po wukwinzu kuba we mulunji na amazwi gako, na mazwi gako ukwinzu ukususyika nago." ³⁸ Po aponyene abalembi na Bafarisi abanji bakamuzgora bakati, "Musambiri, tukwanza twen'ye ichimanyikwiro chinyu." ³⁹ Uwene akabazgora akati, "Abakupapwa mu bwamalaya bakulondora ichimanyikwiro. Po batakwinzu kubapa ichimanyikwiro kwene ichimanyikwiro icha Yona umuneneri. ⁴⁰ Pakuti mo Uyona akabera mukati aka chinsomba cho chikaba chikulu umwa masiku gatatu na mawusiku gatatu, umwabunubo Umwana uwa Munthu akwinzu kuba pansi nkhani pacharu icha pansi amasiku gatatu na mawusiku gatatu. ⁴¹ Abanthu aba you Ninive bakwinzu kunyamuka ukuba mucheruzgo poka nu muwiro uwu po bakwinzu kuwususya. Chifukwa abene bakalapa izgakwananga zgabo chifukwa icha kulalichira ukwa Yona, kwene yen'ya, uwakulusya uYona ali panapa. ⁴² Imfumu iyanthanda iya kumwera inthi yinze yinyamuche mucheruzgo poka na banomba, po yikwinza ukuwususya. Chifukwa uwene akafuma kuwumaliro uwa charu icha pansi ukwinzu ukwivwa amahara aga Solomoni, nomba lola, uwakulusya pa Solomoni ali panapa. ⁴³ Malinga imphepo zibibi zgafumamo mwa munthu, zikuya amalo go gate na minzi Po zikulondora amalo agakutuzizgapo, po zitakugaga. ⁴⁴ Aponyene po zikunena, 'Ndigaluchira ukuya kunyumba yane kuranyene ko nkhafumako.' Po pakufika, zikuyaga iyamwazi kwene yipyelesire ichete kweneso iyakuyemba. ⁴⁵ Po panapo zikujenda ukuyu kusenda izgamwabo fayivi ni zgamwabo zibiri, zibibi nkhani izgakulusya mo uwene abeleye, Po nanthi zginjira mukasi, po zikwikara munumu. Po uwumaliro bwakwe ubwa munthuyo inthi wube wubibi nkhani ukulusya na mo akambira. Ubonyene mo vikwinzu kubera na mutundu uwa nomba. ⁴⁶ uYesu po akaba wakunena na magulu aginji aga banthu, yen'ya, umama wakwe na bakamu bakwe bakimilira panzi, bakanzaga banene nawo. ⁴⁷ Po umunthu akanena nawo, "Lola, umama wako na bakamu bako bimiliye panzi, bakwanza banene nawo." ⁴⁸ Akamuzgora akati, "Abamama bo bawenu, po abazuna bane bo bawenu? ⁴⁹ Po akagolosya inyobe yakwe ku basambiri bakwe, akati, "Yen'ya, Abamama na bakuru na bazuna bane! ⁵⁰ pakuti aliwonsi wo akuchita ukwanza ukwa Baba wo ali kumwanya, uyo wo umukuru nu muzuna wane, wo umuyemba wane nu mama wane."