¹ Na Paulo, alola abakulu bendeko aderha : Bene berhu, ndamire haguma na Nyamuzinda n'entanya zikomere bwenene kuhika na zene. ² Na Ananiya omudahwa mukulu abwira balala bali hofu naye akushurha oku bunu bwage. ³ Honaho Paulo amubwira : Nyamuzinda akushurha w'oyo, olugurhu lushigirwe erangi ly'omweru. W'oyo wayikere akuchira olubanja oku marhegeko, nawe wagomere amarhegeko omu kuderha mpu nshurhwe ? ⁴ Nabola bali yimangire hofu baderha : Wamajachira omugala mukulu wa Nyamuzinda ? ⁵ Paulo aderha : Ntalimenyere, bene berhu oku yewe ali mudahwa mukulu; bulala biyandikirwe : Orhanderheraga amabi enyanya z'omukulu w'abantu bawe. ⁶ Aliko amango Paulo amenyaga oku baguma babo bali Bafarisayo n'abandi Basadukayo, ayama omulenge omu ndeko : Bene berhu, nyono ndi Mufarisayo, mwana wa Mufarisayo, nyono na mahanwa enyanya z'obulangalire b'okufuka kwa bafu. ⁷ Anamalire derha ntyo, entambala ya rhengerera omu kagarhi ka Bafarisayo na Basadukayo, n'olubaga bachigabamo. ⁸ Bulala Abasadukayo baderha mpu ntakufuka kubaho, na nta malayika na nta Muka ochere; aliko Abafarisayo bayemerere byoshi. ⁹ Haliri olwamo lunene. Abandisi bw'okulunda lwa Bafarisayo bayumanga, baja buhaka, badehra : Rhurhabwene omwazi gubi kw'oyu muntu, aliko akaba Muka ochere changwa malayika aderhere naye, rhurhayabiranaga na Nyamuzinda. ¹⁰ Amango entambala ya baga nene, omukulu w'enfola miherho ayoboha oku Paulo arhaberaga nabo, ahana obulenganjira oku enfola miherho bayandagale kumukula omu kagarhi kabo oku misi, n'oku mulerha omu nju y'enfola miherho. ¹¹ M'obo budufu Nahano ayimanga haguma naye, aderha : Ochihe omurhima bulala nka kulala wa mpamiririzaga omu kagarhi k'e Yerusalema, na ntyo bikuhunire oku mpamiririziza ntyo ntyo omu kagarhi k'e Roma. ¹² N'amango g'ezuba, Abayuda bayunvikana, bachishweka oku ndahiro oku barhalya barhanalya kuhika bayirhe Paulo. ¹³ Nabo balahira ntyo balirhalukire makumi mane. ¹⁴ Buzinda baj'emwa bakulu b'abadahwa n'abashaja, baderha : Rhwa chiswekere oku ndahiro enene ntacho rhugezage kuhika rhuyirhe Paulo. ¹⁵ Na ntyo lero mwabo haguma na bashaja b'endeko mubwire omukulu w'enfola miherho, amulerhe eshishi lyenyu, oku mwalonza mu menye emyazi yage bwenene; nerhu rhuli duba oku muyirha naye arhazihika. ¹⁶ Aliko nalume wa Paulo aliyunvirhe emyazi oku baherhe bamulinga, ayinja aja omu nju y'enfola miherho, abwira Paulo emyazi. ¹⁷ Naye Paulo ahamagala omukulu w'enfola miherho aderha : Olerhe oyu musole em'omukulu; yeherhe omwazi gw'oku kubwira. ¹⁸ Na ntyo amurhola , amulerha em'omukulu, amubwira : Paulo, olala mushwekwa alimpamagere,amalonza kukulerhera oyu musole ye herhe omwazi g'oku kubwira. ¹⁹ Ola mukulu amugwarha okuboko, aja naye emusike, amudosa okwihwe : Oherhe emyazi michi y'okumenyisa ? ²⁰ Aderha: Abayuda bayunvikene oku huna olerhe Paulo eshishi omusezi omu ndeko kuguma nka kulonza okudosa emyazi yage bwenene. ²¹ Na ntyo, w'oyo orhayemeraga bulala bantu banene nka makumi mane bamulingire, bachishwekere oku ndahiro y'okurhalya, chiro n,oku rhanywa kuhika bamuyirhe, nabo bakala bachirheganyize, yi balinga oku wayemera. ²² Na ntyo, oyola mukulu aleka oyo musole achigendera, amulagiza: Orhabwiraga muntu oku wanyerekere eyi myazi. ²³ Ahamagala bakulu babiri b'enfola miherho, aderha: Mubike duba omukagarhi k'esaa esharhu z'obudufu enfola miherho magana mabiri bagenda e Kaisariya, n'enfola miherho za genda n'e farasi makumi gali mushanvu, n'abamachumu magana mabiri. ²⁴ Ababwira barheganye punda banyegeze Paulo n'oku muheka n'omurhula emwa Filiki,murhambuzi. ²⁵ Ayandika amaruba gali ntya: ²⁶ Klaudio Lusia emwa Filiki, murhambuzi w'obukenge, mahyo ! ²⁷ Oyu muntu agwarhagwa n'Abayuda, aba hofu kuyirhwa nabo, nagenda haguma n'enfola miherho, n'amurhabal'amango na yunvaga emyazi okwali muroma. ²⁸ Nalonzaga menye bichi byarhumaga bamusidaka, na muyandagaza n'oku muheba emalangambere g'endeko. ²⁹ Nabona oku bamusidakire enyanya y'emyazi ya marhegeko gabo, nabo arhasidakirwe n'omwazi guhunirwe okufa changwa oku shwekwa. ³⁰ Kurhenga mbwen'emyazi oku Abayuda bajirire ehwe libi enyanya zoyo muntu, oku liguma na mamurhuma emwawe, n'okuhuna abo bamusidakire baderhe emyazi yage emalangambere gawe naye. ³¹ Na ntyo, ezola nfola miherho barhola Paulo nk'oku banabwirwaga, bamuheka kuhika Antipatini obudufu. ³² Esezi lyaho baleka abagenda n'efarasi bagenda haguma naye, nabo bachigalukira n'okuja omunju y'enfola miherho. ³³ Nabo amango bahikaga Ekaisariya, baha omurhambo amaruba, baheba Paulo emalangambere gage. ³⁴ Naye eyamala kusoma amaruba, abadosa: Oyu muntu ali wa chihugo chihe ? Eri yamenya oku yewe ali muntu w'eKilikiya, ³⁵ aderha: Na yunvirhe emyazi yage amango abakusidakire bayinjaga: Aderha alangwe omunju ya Herode.