¹ Rhumala lekana nabo, n'okusikul'obwarho rhwagenda kuger'e Kosi, buch'esezi rhwager'e Rondo, na kurhengayo rhwager'e Pataro ² rhwabugan'obwarho buli bwaj'e Foyinike na kuger'e Foyinike rhwajamo rhwagenda. ³ Rhumali bon'e Chipuro, rhwachileka oku lunda lwamalembe, rhwabalama kuger'e Suriya rhwayandagala kuger'e Tiro, kubona okw'obwarho bwahanulirwa h'ebikunga byage. ⁴ Rhumala bugan'abigirizwa, rhwaberayo siku mushanvu n'abo babwira Paulo oku misi ya Muka Ochere oku amenye akazamuk'e Yerusalema. ⁵ Rhwabere rhuyenez'ezo siku, rhwarhenga, rhwachigendera, n'abantu boshi haguma n'abakazi n'abana babo, barhuherekeza kuger'embuga w'echishagala, rhwafukama omusiko rhwahuna. ⁶ Rhwasezerana rhwaj'omu bwarho, nabo bagaluk'emwabo. ⁷ N'amango rhwamalag'olugenzi lwerhu rhwarheng'e Tiro, rhwager'e Tolemayi, rhwalamusa bene berhu, rhwabera haguma nabo lusiku luguma. ⁸ Buch'esezi rhwarhenga, rhwager'e Kayizariya, rhwaj'omu nju ya Filipo muyalagazi gw'Omwazi g'obuholo, aliri muguma wabala mushanvu, rhwabera ahamwage. ⁹ Oyu muntu aligwerhe banyere bane, bababikira, baliri balebi. ¹⁰ Rhwabere rhuchiyiker'eyo siku zinene mulebi muguma mpu ye Agabo ayandagala kurheng'e Yudeya. ¹¹ Arhugerera, arhol'omukaba gwa Paulo achishwek'amagulu n'amaboko gage yenyine anaderha mpu: Muk'ochere aderhere ntya; ntya kw'Abayuda b'e Yerusalema bashweka nyina guno mukaba, n'oku muhana omu maboko g'abapagani. ¹² Lero rhwabere rhuyunv'eyo myazi, rhwabonana n'abantu baho, rhwamushigirira arhazamukag'e Yerusalema. ¹³ Okubuzinda Paulo ashubiza: bichi muli mwanjirira okulaka n'okunvun'omurhima? Nyono nchirheganyize, arhali kushwekwa kwonyine aliko n'okufa omu Yerusalema enyanya w'ezino lya Nahano Yesu. ¹⁴ Aber'alahira empanulo zerhu rhwasira, rhwaderha: obulonza bwa Nahano bujirike. ¹⁵ Ahanyuma w'ezo siku, rhwachirheganya, rhwarhol'ebikunga byerhu rhwanazamuk'e Yerusalema. ¹⁶ Abigirizwa baguma kurheng'e Kayizariya bajirhuyerek'omuntu mpu ye Nasoni muntu w'okuchizimba ch'e Chipuro mwigirizwa wa mira mpurhuhande ahamwage. ¹⁷ Amango rhwabere rhuger'e Yerusalema beneberhu barhuyegerez'oku bushagaluke. ¹⁸ Kuch'esezi Paulo aja haguma nerhu emwa Yakobo, n'abashamuka boshi baliriyo. ¹⁹ N'enyuma z'okubalamusa bashambalirabo emyazi yoshi muguma oku muguma Nyamuzinda ajirire omu bapagani kugerer'emikolo yage. ²⁰ Nabo, babere bayunva, bakuza Nyamuzinda, bamubwira: mwene werhu, oben'ebihumbi bingana byabayuda byamalire kuyemera nabo boshi bagwerh'akahinda kanene enyanya w'erhegeko. ²¹ Nabo barhubwirir'engani yawe mpu wayigiriz'abayuda boshi balamir'omu bapagani mpu baleke Musa, oli wababwira mpu barha kembulag'abana babo, mpu barhana kulikirag'emigenzo yerhu. ²² Kurhe rhujirage? Buzira kahinda engabo yabuganana buno bamenyer'oku wayinjire, ²³ chechirhumire ojir'oku rhwakubwira. Rhugwerhe bantu banene hano bashwekerhwe oku chiragane. ²⁴ Rhol'abo bantu ochichese haguma nabo onabajuhire, bagembw'amarhwe gabo kuderh'okw'abantu boshi bamenye oku ebibabwiragabo enyanya zabo byali byabubeshi. ²⁵ Aliko enyanya w'emyazi y'abapagani, rhwamalire kuyemera rhwanamalire kuyandika n'okurhegeka oku barhakulikirag'eyindi myazi aliko bachilange bonyine n'ebintu bya rhulagwa ntulo y'eshushanyo n'eshagama n'echintu baniguzaga(banyongolezaga), n'obuhushi. ²⁶ Lero Paulo arhola abo balume n'olusiku lwage lwakabiri achichesa haguma nabo baja omu shengengero, ahamiriz'okuyenezwa k'olusiku lokucheswa, kugerer'entulo yarhulwag'enyanya wa buli muguma. ²⁷ Lero ezo siku mushanvu zabere zaba hofi kuyenera, Abayuda barhenga baj'e Azia bamubona omu shengero, bagush'engabo, bamufarha. ²⁸ Babanda akalulu: Balume b'e Israel, murhabale! Oyu y'olala muntu olema ayigiriz'abantu boshi ngasi hoshi kukengula Abayuda n'amarhegeko ga Nahano. Kandi enyanya w'eyo myazi ahir'Abayuda omu kanyamuzinda azingisa hano hachere. ²⁹ Bulala babonaga Torofimo w'Efeso haguma naye omu chishagala bamenya mpu nkabaga Paulo ajire haguma naye omushengero. ³⁰ Echishagala choshi chagaya bashimanana dubaduba bafarha Paulo bamukululir'embuga w'eshengero, honaho enyunvi zachingwa. ³¹ Babere bali balonz'enjira y'oku muyirha engani yagerer'omukulu w'enfola miherho okw'e Yerusalema yoshi yajire mw'akavulindi. ³² Okuliguma arhol'enfola miherho na bachirongozi abayandagalira duba. Babere babon'omukulu w'enfola miherho baleka okushurha Paulo. ³³ Nanty'omukulu amuyegera, omufarha, aderh'oku bamushweke magufu mabiri, abaza: olinde, bichi wajirire? ³⁴ Abaliri omuchigusho baband'akalulu, balibaderha ntya n'abandi ntya, agambwa kumenya okuli kw'emyazi enyanya w'olwamo arhegeka oku bamulerhe omu kagombe. ³⁵ Babere bagera ahalengerere bya rhegekwa okwahekwe n'enfola miherho enyanya w'okurhindibuzwa n'echigusho. ³⁶ Bulal'echigusho ch'abantu chali mukulikire chiri chaband'akalulu: mumukuleho! Ayirhwe! ³⁷ N'amango bahiraga Paulo omunju nkulu, abwir'omukulu w'enfola miherho, omp'obulenga njira nganir'omwazi, naye aderha: oyinji echi giriki? ³⁸ Arhali woyo w'ola mumisiri ochizindire heka bihumbi bine by'enfola miherho by'abagomi omu mpinga? ³⁹ Paulo ashubiza; Nyono ndi muyahundi, muntu w'e Tarso, chishagala ch'e Kilikiya, muntu w'omu chishagala chirha zambire. Nkuhunir'omp'obulenganjira nganire n'abantu barhulage. ⁴⁰ N'amango amuhag'obulenganjira, Paulo ayumanga ahalengerere, abalambulira okuboko, haba akahuzo, aderha nabo omu lulimi lw'echi Hebraniya: