¹ Olusiku lw'e Pentekoste, boshi baliri haguma. ² Oku liguma, olwamo lwarhenga oku nkuba luli nka lwa mpusi ekomere, lwayunjula enju balirimo. ³ Babona orhwengezi rhuli nka ndimi za muliro, rhwachigaba,rhwalema rhwagwira oku rhwe lya ngasi muguma. ⁴ Boshi bayunjula Muka Ochere, barhondera okushambala ezindi ndimi, nkoku Muka Ochere alemaga ababwira. ⁵ Nabo eri e Yerusalema eli abantu balemaga bayoboha Nyamuzinda,barhengaga omu mahanga goshi g'egulu. ⁶ Oku lwamo lwabaga, engabo y'abantu yayinja yalibirha. Basomerwa bulala ngasi muguma alemaga ayunva baderha omu lulimi lwage. ⁷ Bayoboha boshi, basomerwa mpu: k'abala bantu baherhe baderha barhali b'e Galilaya boshi? ⁸ Na gurhe rhulirhwa bayunva ngasi muguma, omu lulimi lwage? ⁹ Abaparti, Abamedi, Abelamiti, abantu balama e Mezopotamiya, ab'e Yudeya, e'Kapadochiya, e'Poti, e'Aziya, ¹⁰ e'Frijiya, e'Panfiliya, e'Misiri, echihugo ch'e Libiya chiba omu lubibi n'e Chireneya, n'aba rhengaga e'Roma, Abayahudi n'abashimbulizi. ¹¹ Abacreti n'Abaharabu, gurhe rhuli rhwabayunva baderha omu ndimi zerhu ebirhangazo bya Nyamuzinda? ¹² Baba eri basomerwe boshi, buzira kumenya eby' okugerereza, balema babwirana baguma oku bandi: lero kw'okuderha gurhe oku? ¹³ Aliko abandi balema babashekera, n'okuderha: balalukire n'erivayi ly'omurhobo. ¹⁴ Lero Petero, ayimanga haguma na balala ekumi na muguma, ayakuza n'omulenge, ababwira ntya: mwe bantu b'e Yudeya, na nenyu mweshi b'enola Yerusalemu, mumanye, murhege n'okurhwiri kw'eyi myazi yani! ¹⁵ Aba bantu barhali balalwe, nk'oku muchikeberwe, bulala zichiri saa esharhu z'ezuba. ¹⁶ Aliko ebi by'ebya derhagwa n'omulebi Yoweli: ¹⁷ Omu siku zizinda, Nyamuzinda oderhere ko, njinalumiza Omuka gwani oku bantu boshi; bagala benyu na bali benyu nji baleba, abasole benyu nji babonekerwa, n'abashaja benyu nji babona ebilorho. ¹⁸ Nechi, mw'ezo siku, nji nalumiza Omuka gwani, oku bambali bani n'oku bambalikazi bani, nji baleba. ¹⁹ Nji najira ebisomezo elira nyanya omu malunga n'ebisomerene hano shishi oku gulu, oku shagama, oku muliro, n'empusi y'omusisi; ²⁰ Ezuba njilyahindamuka mwizimya, n'omwezi gube shagama, embere lw'okuyinja kw'olusiku lwa Nyamuzinda, lw'olusiku lukulu lw'erenge. ²¹ Ago mango, ngasi yeshi wahema ezino lya Nyamuzinda nj'achira. ²² Bene Israeli, muyunve eyi myazi! Yesu w'e Nazareti, olala muntu wayerekanaga obuhamiriza embere zenyu omu bisomerene, ebisomezo n'ebimanyiso ajiraga ahagarhi kenyu, nk'oku nenyu murhanahabire. ²³ Oyo muntu, wahanagwa nkoku byalirhegekerwe n'oku bulonza n'obumanye bwa Nyamuzinda, mwamuhanika oku musalaba, mwamuyirha omu fune y'abapagani. ²⁴ Nyamuzinda amufula, omukucha emigozi y'olufu, bulala lurhalikwanene lumuhime. ²⁵ Bulala Daudi aliderhere yenyine oku: Nabwene bwinjinja Nyamuzinda embere zani, bulala ali ekulyo kwani, li ntadundaganaga. ²⁶ Kandi omurhima gwani guli omu bushagaluke, n'olulimi lwani omu busime, n'omubiri gwani gwahumuka haguma n'obulangalire, ²⁷ Bulala orhankaleka omuka gwani gwabera e kuzimu, orhankanayemera omuchesibwa wawe abolera omu shinda. ²⁸ Wanyerekere enjira y'akalamo, nji wanyunjuza bushagaluke olusiku nakubona. ²⁹ Bene berhu, muleke mbabwire n'obwalagale enyanya za shokulu Daudi: afire, anabishwa, n'okw'eshinda yage henachiba eno mwerhu kugera zene. ³⁰ Nk'oku aliri mulebi, n'oku alimenyere oku Nyamuzinda alimulaganyire okuyikala oku chichumbi ch'obwami bwa bashokuluza. ³¹ Buli bufuke bwa Kristu alirheganyize n'oku bumanyisa, omu kuderha oku arhankalekwa omu kuzimu n'okw'omubiri gwage gurhakabola. ³² Oyo Yesu, Nyamuzinda afulaga; na rhweshi rhuli bahamirizi b'okola. ³³ Akuzizwe n'okulyo kwa Nyamuzinda, ahabwa n'Eshe Muka Ochere alaganyaga, anamurhuma. Nk'oku muherhe mwabona n'okumuherhe mwayunva. ³⁴ Bulala Daudi yewe arharheremeraga omu mpingu, aliko aderha yenyine, ntya: Nyamuzinda abwirire Nahano: ³⁵ Yikala ekulyo kwani, kuhika abashombanyi bawe mbayandaze oku magulu gawe. ³⁶ Kusiga bene - Israeli boshi bamanye bwinja bwinja oku olala Yesu muzindi hanika oku murhi, Nyamuzinda amujirire Nahano na Muchunguzi. ³⁷ Bamalire yunva eyo myazi, balumwa omu mirhima yabo; babwira Petero n'ezindi ntumwa, bene berhu, gurhe rhujirage? ³⁸ Petero abashubiza: muhungame na ngasi muguma abatizibwe oku zino lya Kristu, ly'ababalirwa ebyaha byage, na ntyo muhabwe eshokano ya Muka Ochere. ³⁹ Bulala amalaganyo gali genyu, n'abana benyu na ngasi boshi bali hale, balala boshi Nyamuzinda werhu nj'ahamagala. ⁴⁰ N'oku yindi myazi erhali migeke, abahereza obuhamirizi anabakomereza: murhenge mw'eri burha libi. ⁴¹ Abayemeraga omwazi gwage badubikwa, n'olo lusiku, oluganjo lw'abashimbulizi lwayushuka hofi bihumbi bisharhu by'abantu. ⁴² Bashimbulira enyigirizo z'entumwa, omu chinyabuguma, omu kubega omugati, n'omu mahuno. ⁴³ Obuba bwafarha ngasi muguma, n'ebirhangazo n'ebisomerene binene byajiragwa n'entumwa. ⁴⁴ Abemezi boshi balichishwekere haguma, n'ebyabo byoshi bakazagi bishangira. ⁴⁵ Bakazagi guza amashwa n'ebintu byabo, n'oku gabana engulo boshi, ngasi muguma nk'oku analagirire. ⁴⁶ Ngasi lusiku n'omurhima muguma, bayenega okulema baja omu ka-Nyamuzinda, balema babega omugati omu mwa babo, n'okulya ebiryo byabo omu bushagaluke n'omu burhonzi b'omurhima. ⁴⁷ Bakazagi kuza Nyamuzinda, n'olubaga loshi lwali basimire. Na Nyamuzinda akazagiyushula, ngasi lusiku, abemezi omu kanyamuzinda.