¹ Ndji utugha muaba wa wadi, wagha mu bula bua bamubutileta ghi balongi bandji bamulandula. ² Ditangu di sabatu gha dielamaneta, wadi mu ulongasa mu sunagoga, Batu babuki bamughatanga, ghi badi bakama. Bamagha mbo:«Ama malongashi umetaleta kuni?» «Nani umuambighe lungieni alolu?» «Bishima biakanani bia ghasanga ghi miewu miandji?» ³ «Awu ka muati ghu mabaya, muana ghu Maliya, muanaba ghi Yakobo, Jose, Yuda ghi Simona? Bana babawu ba baghetu mughatshi muitu amu ani?Ghi badi bawupila ghudi Yesu. ⁴ Ndji Yesu ubamagha mbo:«Mupropheta udi ghi luzumu miaba miekina, buwelu mu bula mubawu, mu ndzu mubawu ghi udi bana babawu» ⁵ Wadi ghi disaghasagha di usa maghambu manani maboyi, bu utentegha muewu a mitu mi babezu, ⁶ mitshima mibawu mighala mimukamiseta. Ndji wagha mu mabula mengana bu ulongasa. ⁷ Ndji ubila bayidi bandji disangi ghi buela, ubatuma buela-buela, ubambigha maniagha gha mitu mi misusu mibibi, ⁸ Ndji ubalesa bua kabavueti kitu kiengana nansha kimushi bu wagha mu luendu, ani muibi, kanuvueti bugha, nansha lutayi, nansha fualanga mu bibombi binu, ⁹ kadi nuvueti bisabata, kanuvueti bilamba biela. ¹⁰ Ndji ubamagha mbo:«Mizangu miekina amia nuingila mu ndzu nusadi munana too ghi ditangu nualupughana mu muabana». ¹¹ Kadi tshie kabanuakididi mu bulana ani kabanuyi, Nutuyi muabana, nushughumuni mânu minu mu makama muinu bua bisadi bu kimaninu wa badi. » ¹² Batugheta ghi bagheta mu uyisa udi batu bua balakadi maghambu mabibi. ¹³ Babingeta ba Demona baki, ghi batu babuki badi ghi mabezu mu ubitshila mâji babeloyi. ¹⁴ Mughalengi Pelode ugheta luzumu luna, bualu dijina di Yezu diadiedi diwibibu. Bamushi badi bamanga mbo:«Yowanese Mubatiza wisughe ghu lufu, ke kayi maniagha ma bishima mighela wa badi.» ¹⁵ Ababa mbo:«Eliya» Benga mbo:«Udi Muprofeta muadi baprofeta ba tsunda» ¹⁶ Kadi Ditangu dia Pelode ghugheta maghambu mana, umagheta mbo:«Yowanese wa nabatuiseta mutu wisughela» ¹⁷ Bualu ghumisua misu Pelode wadi uwatisa Yowanese, ghi umubangiseta mishinga mu Buloko anu bu kilumbu ki Elodiase (Mughaji ghu muanaba Filipoyi), bualu umupunieta ghu dibawu.) ¹⁸ Bualu Yowanese usuengeleta Pelode mbo: «Kabishi biboyi upununa mughaji ghu muaninu.» ¹⁹ Kadi Helodiase wadi ghendji lukinu, ghi dijinga diwudiagha, kadi kawaneta to, ²⁰ Bualu Pelode utshinetanga Yowanese; wadi uwimba mbo Mutu ghu kijila, ghi mutu ghuboyi, wadi ghumudinda bipatshi. Maghambi makina ma Yowanese mamusuengeletange Yowanese, madi mamusankisa bibuki. wadi umugha ghi disanka. ²¹ Ndji ditangu dielamana dia Pelode ghadi ulongololu Difesto diendji di diledibua, ndji ulongololu udi ghi tulamba tuandji ghi tupita tuandji tu basalayi, ghi Bafumu ba Glelela. ²² Muana mushigha ghu Pelode wingila utuadiza uyina mayina ghumisu ghubawu, Pelode ghi beni bandji bakina basaghasagha bu bayina ma muana. Mughalengi umagha muana mbo:«Kilombu kijimina kia waka nawambigha.» ²³ Uditshipa umisu wandji mbo:«Kijimina kia ukilombu, nawambigha, nansha kitshini ki Ditunga dieni.» ²⁴ Utugha, wazozu nguandji mbo:«Binani bia nadikulombu» Nguandji mbo:«Mutu ghu Yowanese» ²⁵ Anana-anana wingila pasheshi udi Mughalengi umumagha mbo:«Nakanga upuambiyi Mutu ghu Yowanese gha dilonga.» ²⁶ Mughalengi ubungameta bighala, kadi anu bu uditshipa wandji ghumisu ghu beni ba ghabidiji, kadi ghi mushindu ²⁷ ghu ubila ulombu ghu muana mughetu. Ndji mughalengi utuma musalayi wandji bua ghamutuadidi mutu ghu Yowanese. Musalayi wagheta, umubatula mutu mu buloko. ²⁸ Ndji wigha yendji gha dilonga, wambigha muana ghu baghetu, ndji muana mughetu wambigha nguandji. ²⁹ Ndji bayidi bandji beta musapu, bigha bawata kitshini kisaleta, ndji bagha jigha. ³⁰ ji bayidi badisangisa umisu ghu Yezu, bamulanduishila bijimina bia baseta ghi bia balongaseta, ³¹ Ndji ubamagha mbo:«Yaghilani ghu tsatsa muaba udi winda batu, nuandji zunda ghatse.» Bualu batu badi mu utambaghana, ghi kabadi ghi ditangu di wudi to. ³² Ndji bingila mu buatu, bagha mu lusegha. ³³ Kadi gha bamonue wisugha, batu babuki bamuiba, ndji bakoku lutshini bakina ghu makama, matunga makina, ndji batula ghumisu ubawu. ³⁴ A batulugheta gha kibumbu, umonu biwuta bi batu, ndji luningu lumuwata, bualu badi bu bapanga binda mulami. Ndji utadiza ubalongasa maghambu mabuki . ³⁵ Ditangu diumana zamba, Balongi bandji bigha wa ghadi, bamagha mbo:«Kawua muaba ubumu, ditangu dingilela, ³⁶ Batumi mu mabula bua bayi tala biwudi.» ³⁷ Ubandamuna mbo:«Bambiyeni biwudi.», Bamuandamuana mbo:«Ndenalio kama yela tudi mua kusumba ghiya biwudi ani?» ³⁸ Ubamagha mbo:«Nudi yi bitshini buku bukani? andjeni ya kika.» A bazozueta, ndji bamuandamuna mbo:«Bitshini bitanu, ghi Bibala biela.» ³⁹ Usuengela batu bakina bua babuayidi mu kiwuta, mu bitshitshi (mashinda). ⁴⁰ Basaghama mua ghabamagheta, aba lughama, aba masangi matanu. ⁴¹ Uwata bitshini bitanu, ghi bibala biela, ukika mu diulu, ubibensa, ubibatula, ndji wambi balongi bua bananini batu. Ndji bababanina bibala biabiela. ⁴² Badieta bakina, buwuta. ⁴³ Bisaleta, banonu bisagha disangi ghi biela. ⁴⁴ Badiete badi balunga Binunu bitanu. ⁴⁵ Anana-anana, wingisa balongi bandji mu buatu bu wagha dishimu di kibumbu mu Beteseda, gha ghadi mu umuanga batu. ⁴⁶ A bagheta, ndji wagha ghu muwindji bu usambila. ⁴⁷ Sheshigha yelamana, ghibuatu buadi aghatshi gha mashi, usala yendji munana. ⁴⁸ A ghamonuete mbo badi ghi lutatu wendesa buatu bualu bu mufungu. Biedi mu ditangu dinayi di busuwu, wigheta wa badi mudiendela gha mashi, ndji ujinga mu ubazambila utsatsa. ⁴⁹ Kadi gha bamumonuela wendela gha mutu gha mashi, bata meji bu muzodi, ndji bata bakamu, ⁵⁰ bualu gha bamumonueta, batuadizeta uzaghama. Muzangu umushi, ubamagha mbo:«Nughaji yi mutshima ughala! mema! kanutshini!» ⁵¹ Wingila iba mu buatu, ndji mufungu ubatama. Bakameta bighala. ⁵² Bualu kabadi bugha dijimbu di bitshini bitanu, bu mitshima mibawu mighala. ⁵³ A basabugheta, batula mu Genezaleta ndji bayitshigha buatu. ⁵⁴ Batugha mu buatu, Ndjiedile bamuiba. ⁵⁵ Ndji bakoku lutshinu mu bula bu umutuadila bu umutuadila babezu gha biata, muaba mujimina wa ghaywtanga. ⁵⁶ Mu ditunga diekina dia ghadi wingila, ghi bimenga, wadi ushighetange babezu mu bisalu, babezu badi bamulombua bua badindi nansha ghu kilamba kiendji. Ghi batu bajimina bamudindeta, badi babelogha.