¹ “Anang ngakim, ngambi ka kita nda di akim. ² Laban cara kita ngakim, deka dikena ngakim kita, alu takar ti dikena kita nakar deka dikena nakar utai ke kita. ³ Nama kebuah kita betilik ka empeleman ba mata menyadi kita, tang nda bedulika lumpung kayu ti ba mata kita empu? ⁴ Tao ka, baka ni ko kita nyebut ngagai menyadi kita, ‘Awakka aku muai empeleman ari mata nuan,’ tang kita bisi lumpung kayu alam mata kita empu? ⁵ Kita to urang ke pura-pura ngapa! Buai dulu lumpung kayu ari mata kita empu. Nya baru mata kita lansik, alu kita uleh muai empeleman ari mata menyadi kita. ⁶ “Anang meri utai ti kudus ngagai uduk, alu anang nibarka batu mutiara ngagai jane, enggai ke sida ngelunjak utai nya, alu mutar ngamuk kita. ⁷ “Pinta meh, alu kita deka nerima. Giga meh, alu kita deka nemu. Tekung meh, alu utai nya deka dibuka ke kita. ⁸ Laban genap iko urang ke minta, deka nerima, alu urang ke ngiga, deka nemu, alu ke urang ke nekung, utai nya deka dibuka ke sida. ⁹ Kati kita ke apai meri batu ngagai anak kita enti iya minta roti? ¹⁰ Tao ka meri iya ular, enti iya minta ikan? ¹¹ Enti kita ke jai nemu meri utai ti badas ngagai anak kita, Apai kita ti di surga tentu nemu agi meri utai ti manah ngagai urang ke minta ari Iya! ¹² "Nya alai, kereja ngagai urang baka ke di kedeka ka kita kereja urang ngagai kita, laban nya reti Adat, enggau ajar sida nabi. ¹³ “Tama nengah pintu ti sempit, laban pintu ti besai enggau jalai ti luas nuju ngagai pengerusak, alu mayuh urang nengah jalai nya. ¹⁴ Tang pintu ti sempit, enggau jalai ti mar, nuju ngagai pengidup, alu semina mimit aja urang tetemu ka iya. ¹⁵ “Bejaga ari nabi ti pelesu, ke datai ngagai kita baka bedus, tang iya ti bendar sida nya uduk kampung. ¹⁶ Kita deka ngelala sida ari buah sida. Kati buah anggur diambi ari madang duri, tao ka buah ara ari madang emperingat? ¹⁷ Baka nya mega kayu, semua kayu ti galak mansut ka buah ti badas, tang kayu ti nda galak mansut ka buah ti nda badas. ¹⁸ Kayu ti galak nda uleh mansut ka buah ti nda manah, alu kayu ti nda galak nda uleh mansut ka buah ti badas. ¹⁹ Kayu ti nda mansut ka buah ti badas deka di tebang, alu dibuai ngagai api. ²⁰ Nya alai, kita deka ngelala sida ari buah sida. ²¹ “Ukai semua urang ke ngangau ka Aku ‘Tuhan, Tuhan’ deka tama ngagai Perintah surga, tang semina urang ke ngereja peneka Apai Aku ti di surga. ²² Leboh Hari penudi nya ila mayoh urang deka nyebut ngagai Aku ‘Tuhan, Tuhan! Kati kami udah nusi pesan Allah Taala alam nama Nuan, alu muru antu alam nama Nuan, alu ngereja mayoh kereja ajih alam nama Nuan?’ ²³ Udah nya Aku deka bejako ngagai sida, ‘Aku nda ngelala kita. Rari ari Aku, kita ke ngereja penyai.’ ²⁴ “Nya alai, semua urang ke ninga jako Aku alu ngasi nya baka urang siko ke pintar, ke niri ka rumah iya ba atas batu. ²⁵ Alu ari ujan, ai bah, alu ribut bepuput alu mangka ngagai rumah nya, tang rumah nya enda tumbang, laban iya didirika ba atas batu. ²⁶ “Tang tiap urang ke ninga jako Aku, alu nda ngasi, nya baka urang ke beli, ke nirika rumah iya ba pasir. ²⁷ Alu ari ujan, ai bah, alu ribut bepuput alu mangka ngagai rumah nya, alu rumah nya tumbang. Balat amat rumah nya jai.” ²⁸ Lebuh Yesus udah nyebut jako nya, urang mayoh alit ati ke ajar Iya, ²⁹ laban Iya ngajar sida baka urang ke bekuasa, alu nda baka sida pengajar Adat.