¹ Pengudah hari Sabat, tumu pagi hari Minggu, Maria Magdalena enggau Maria ti siko nya, mansang ngagai kubur. ² Tekala nya tanah alu balat amat berenyang, laban siko malaikat Tuhan nurun ari surga, datai alu ngaring ka batu ari mua kubur nya, alu duduk ba batu nya. ³ Gamal malaikat nya baka kilat, alu gari iya burak baka seleju. ⁴ Bala penyaga balat amat takut ka iya datai ke sida nyau getar-getar alu baka urang ke mati. ⁵ Tang ko melikat nya bejako ngagai indu dua iku nya, “Anang takut. Aku nemu seduai ngiga Yesus, ke udah disalibka. ⁶ Iya nadai dito laban Iya udah diangkat ka ari mati, munyi ti udah dipadah ka Iya. Datai kito, alu peda endur alai Iya gali. ⁷ Udah nya mupuk seduai enggau jampat, alu padah ka ngagai sida murid Iya, ‘Iya udah diangkat ka ari mati, alu Iya diato mansang ngagai Galilea dulu ari kita. Din kita deka meda Iya!’ To pesan aku ngagai seduai.” ⁸ Seduai iya alu beguai-guai mupuk ari kubur nya, takut tang gaga ati, alu belanda madah ka sida murid Iya. ⁹ Tekala nya Yesus betemu enggau seduai iya, alu bejako, “Tabi ke seduai.” Seduai iya alu mansang ngagai Iya, megai kaki Iya, alu nyembah Iya. ¹⁰ Lalu ko Yesus bejako ngagai seduai iya, “Anang takut. Mupuk meh seduai, alu asoh bala menyadi Aku mupuk ngagai Galilea. Din sida deka meda Aku.” ¹¹ Leboh indu dua iko nya benung di rantau jalai, sekeda sedadu ke nyaga kubur nya mansang ngagai nengri, alu madah ngagai sida tuai imam pasal semua utai ti udah nyadi. ¹² Leboh sida tuai imam udah baum enggau sida tuai bansa, sida alu meri duit ngagai sida sedadu nya. ¹³ Ko sida, “Padah ka ngagai urang mayoh, ‘Sida murid Iya datai leboh malam hari, alu ngencuri bangkai Iya, leboh kami tinduk.’ ¹⁴ Lalu enti tuan gubernur ninga pasal pekara to, kami deka bejako ngagai iya, ngambi ka kita enda kena penusah laban nya.” ¹⁵ Bala sedadu alu ngambi duit nya, alu ngereja niteh ka asuh sida, alu jerita nya ditabur ka ngagai urang Yahudi nyentuk ngagai sari to. ¹⁶ Murid ke sebelas iko alu mupuk ngagai menua Galilea, ngagai bukit sige ti udah dipadah ka Yesus ngagai sida. ¹⁷ Leboh sida meda Iya, sida lalu nyembah Iya, tang sekeda sida kakang ati. ¹⁸ Yesus mansang ngagai sida alu bejako, “Semua kuasa di surga enggau di dunya udah diberi magang ngagai Aku. ¹⁹ Nya alai, bejalai kita ngagai semua bansa alu gaga sida nyadi murid Aku, maptis sida dalam nama Apai, Anak enggau Roh Kudus, ²⁰ alu ajar sida ngasika semua pesan ti udah diberi Aku ngagai kita. Lalu ingat, Aku deka seruran enggau kita nyentuk ngagai pengujung dunya.”