¹ Udah nya Yesus alu bejako ngagai urang mayoh enggau ngagai sida murid Iya. ² “Sida pengajar Adat enggau urang Farisi udah di beri kuasa nerangka Adat Musa. ³ Nya alai, kereja sebarang utai ti diajar sida ngagai kita, alu titeh ka ajar nya, tang anang ngereja utai ti dikereja sida, laban sida enda ngereja utai ti diajar sida empu. ⁴ Sida nancang ka ma ti berat, ti mar dibai, ba bau urang bukai, tang sida empu enggai nyukir ka tunjuk mai ma nya. Sida minta diri dipeda urang mayoh leboh sida ngereja semua pengawa sida. ⁵ Sida ngaga lapak kain ti besai endur sida nulih ka jako ari Kitab Suci, alu dilekat ka sida ba kening enggau ba lengan sida, alu rambing puting gari sida panjai. ⁶ Sida rindu duduk ba penuduk ti di atas leboh pengerami makai besai, enggau duduk ba penuduk ti pemadu badas alam sinagoge, ⁷ alu sida rindu ditabi urang ba sebelah pasar, alu rindu di kumbai urang ‘Pengajar.’ ⁸ Tang kita enda tao dikumbai Guru, laban kita semina bisi siko aja Guru, alu semua kita to diri menyadi magang. ⁹ Lalu anang ngumbai urang di dunya to Apai, laban kita semina bisi siko aja Apai, Iya ke di surga. ¹⁰ Lalu kita pen enda mega tao dikumbai kepala, laban kita semina bisi siko aja kepala, iya nya Kristus. ¹¹ Urang ke pemadu besai ba bala kita deka nyadi kuli kita. ¹² Semua urang ke ngeninggi ka diri, deka dikemaruh ka, alu semua urang ke ngemaruh ka diri, deka ditinggika. ¹³ “Tulah meh kita pengajar Adat, kita urang Farisi, kita ke pura-pura ngapa! Kita nutup pintu Perintah surga di mua urang mayoh, tang kita empu enda tama, alu kita nagang urang bukai tama! ¹⁴ Tulah meh kita pengajar Adat enggau kita urang Farisi! Kita to urang ke pura-pura ngapa! Kita ngerampas rumah indu ke balu, alu kita pura-pura ngayan ka diri lama besampi! Nya alai kita deka diberi ukum ti pemadu berat! ¹⁵ “Tulah meh kita pengajar Adat enggau kita urang Farisi! Kita to urang ke pura-pura ngapa! Laban kita belayar meraka tasik, alu ngelangkah mayoh bengkah menua, nguji mai siko urang ngagai agama kita, alu kita ngaga urang nya nyadi peranak neraka dua kali lipat jai age ari kita empu! ¹⁶ “Tulah meh kita pemimpin ke buta, ke nyebut, ‘Enti urang besumpah atas nama Rumah Sembayang, utai nya nadai ngawa, tang enti iya besumpah ngena nama emas ti alam Rumah Sembayang, iya kena tancang sumpah nya.’ ¹⁷ Kita to buta sereta beli! Laban ni ti besai agi, emas tauka Rumah Sembayang ti ngasoh emas nya kudus? ¹⁸ Lalu ko kita, ‘Enti urang besumpah atas nama altar, utai nya nadai ngawa, tang enti iya besumpah atas nama pemeri ti ba altar nya, iya kena tancang sumpah nya.’ ¹⁹ Kita to urang buta! Laban ni ti besai age, pemeri tao ka altar ti ngasoh pemeri nya kudus? ²⁰ Nya alai urang ke besumpah atas nama altar, besumpah mega atas nama altar nya enggau atas nama semua pemeri ti ba atas altar nya, ²¹ alu urang ke besumpah atas nama Rumah Sembayang, besumpah mega atas nama Rumah Sembayang nya enggau atas nama Allah Taala ti diau alam Rumah Sembayang nya, ²² alu urang ke besumpah atas nama surga, besumpah mega atas nama takhta Allah Taala enggau atas nama Iya ke duduk ba takhta nya. ²³ Tulah meh kita pengajar Adat, enggau kita urang Farisi! Kita to urang ke pura-pura ngapa! Laban kita meri sepuluh peratus ari rempah kita, baka telasih, adas maneh, enggau jintan, tang kita enggai ngereja utai ti beguna agi dalam Adat, baka pengelurus, pengasih enggau pengarap. Semua utai nya patut di kereja kita, tang anang ngawak ka utai bukai nya enda di kereja. ²⁴ Kita to pemimpin ke buta! Kita muai lalat ari ai irup kita, tang kita nelan unta! ²⁵ “Tulah meh kita pengajar Adat, enggau kita urang Farisi! Kita to urang ke pura-pura ngapa! Laban kita nuci jalong enggau pinggai kita ari luar, tang dalam nyin sida penuh laban pengamu enggau ati ti semina berunding ka diri empu aja. ²⁶ Kita urang Farisi endang amat buta! Tuci dulu jalong enggau pinggai kita ari dalam, ngambika sida mega bereseh ari luar! ²⁷ “Tulah meh kita pengajar Adat, enggau kita urang Farisi! Kita to urang ke pura-pura ngapa! Laban kita to baka kubur ti udah dicat burak, ti badas gaya di peda ari luar, tang dalam nyin kita penuh laban tulang urang mati enggau semua macam utai ti kamah. ²⁸ Nya alai, di luar gamal kita baka ke lurus, tang dalam nyin kita penuh laban ati ti pura-pura ngapa enggau penyai. ²⁹ “Tulah meh kita pengajar Adat enggau kita urang Farisi! Kita to urang ke pura-pura ngapa! Laban kita begaga ka kubur ti badas ke sida nabi, alu ngelagu tiang pengingat ke urang ke lurus, ³⁰ alu ko kita, ‘Enti sema kami idup leboh maya ake ine kami kelia, kami tentu enggai enggau sida munuh bala sida nabi!’ ³¹ Nya meh jalai kita besaksi ngelaban diri empu, laban kita madah ka diri peturun urang ke udah munuh sida nabi. ³² Nya alai tembu ka meh pengawa ti udah di tumbuh ka bala ake ine kita! ³³ Kita ular-ular, kita anak ular! Baka ni ko kita uleh nagang diri di buai ngagai neraka? ³⁴ Nya alai, Aku ngirum ka ngagai kita bala sida nabi, enggau urang ke bepenemu-dalam, enggau sida pengajar Adat. Sekeda sida deka dibunuh kita, alu di salib ka, sekeda di sipat kita dalam rumah ibadat kita, alu di perinsa ka kita ari nengri sebuah ngagai nengri sebuah, ³⁵ ngambi ka kita di tinggang darah urang ke lurus ke udah di bunuh kita di dunya to, belabuh ari darah Habel ke nadai penyalah, nyentuk ngagai darah Zakharia anak Berekhya ke dibunuh kita ba entara Endur ti Kudus enggau altar. ³⁶ Enggau bendar Aku madah ngagai kita, semua utai nya deka ninggang rebak ti diato!" ³⁷ “Oh Yerusalem, Yerusalem! Nuan munuh sida nabi alu nuko ngena batu bala seruan ke di kirum ka Allah Taala ngagai nuan! Aku suah udah deka ngaul semua nembiak nuan, baka indu manuk ti ngempuru ka anak di baruh sayap iya, tang nuan enggai ngawak ka Aku! ³⁸ Nya alai rumah nuan deka ditinggal ka puang nadai urang nguan. ³⁹ Laban, Aku madah ngagai nuan, berengkah ari diato, nuan nadai age meda Aku nyentuk ngagai maya nuan nyebut, ‘Beberekat meh Iya ke datai dalam nama Tuhan.’ ”