¹ Enam hari udah bekau nya, Yesus mai enggau Iya Petrus, Yakobus enggau menyadi Yakobus ke benama Yohanes, niki ngagai bukit sigi ti tinggi, kediri sida aja. ² Sida alu meda gamal Iya berubah. Mua Iya mancar baka mata hari, alu gari Iya bebali beperencing burak. ³ Sida alu tekala nya meda Musa seduai Elia, pansut alu bejako enggau Iya. ⁴ Lalu ko Petrus bejako ngagai Yesus, “Tuhan, badas kitai diau dito! Enti Nuan deka, awak ka aku ngaga tiga buah langkau kain dito, sebuah nge Nuan, sebuah nge Musa, alu sebuah nge Elia.” ⁵ Leboh Petrus agi benung bejako, site remang ti terang ngayung sida, alu nyawa bisi di dinga bejako ari alam remang nya, “To Anak ke di kesayau ka Aku. Aku rindu ka Iya. Pending ka Iya!” ⁶ Leboh sida murid ninga nya, sida alu nyungkur ka mua diri ke tanah, laban sida kelalu balat takut. ⁷ Tang Yesus datai alu nego sida. Ko Iya, “Angkat. Anang takut!” ⁸ Leboh sida tiga engkadah, sida nadai meda urang bukai, semina Yesus aja. ⁹ Leboh sida nurun ari bukit nya, Yesus nangkan sida tiga enggau jako, ko Iya, “Anang madah ka pasal senera nya ngagai urang, nyentuk ngagai maya Anak Mensia udah diangkat ka idup baru ari mati.” ¹⁰ Sida murid alu nanya Iya, “Nama kebuah sida pengajar Adat madah ka Elia deka dulu datai?” ¹¹ Disaut Yesus, “Elia endang amat dulu datai, alu nyendia ka semua utai. ¹² Tang, Aku madah ngagai kita, Elia udah datai, tang sida enda ngelala iya, tang merinsa ka Iya sepeneka ati sida. Baka nya mega sida deka merinsa ka Anak Mensia.” ¹³ Nya baru sida murid nemu Iya bejako ngagai sida pasal Yohanes Pemaptis. ¹⁴ Leboh Yesus enggau sida murid datai ba bala mayoh, siko urang datai ngagai Yesus, belutut di mua Iya, alu bejako, ¹⁵ “Tuhan, kasih ka anak aku, laban iya sakit gila-babi, alu balat amat merinsa. Iya suah udah rebah ngagai api, tauka ngagai ai. ¹⁶ Aku udah mai iya ngagai sida murid Nuan, tang sida enda uleh ngerai ka iya.” ¹⁷ Yesus alu nyaut, “Kita to urang ke enda tetap ati sereta tesat! Ni pengelama Aku enda tao enda begulai enggau kita? Ni pengelama Aku enda tao enda sabar enggau kita? Bai nembiak nya kitu ngagai Aku!” ¹⁸ Yesus alu merak antu nya, lalu antu nya pansut ari nembiak nya, alu nembiak nya gerai tekala nya. ¹⁹ Udah nya sida murid datai ngagai Yesus, leboh maya sida kediri enggau Iya, alu nanya, “Nama kebuah kami enda uleh muru antu nya?” ²⁰ Disaut Iya, “Laban kita mit pengarap. Laban, enggau bendar Aku madah ngagai kita, enti kita bisi pengarap ngemesai ige ensabi, kita uleh bejako ngagai bukit to, ‘Mindah ari to ngagai nyin!’ alu bukit nya deka mindah. Nadai utai enda uleh dikereja kita! ²¹ [Tang utai bansa to semina uleh diburu ngena sampi enggau bepuasa.”] ²² Leboh semua murid begempuru di Galilea, Yesus bejako ngagai sida, “Anak Mensia deka diserah ka ngagai jari mensia ²³ alu sida deka munuh Iya, alu Iya deka diangkat ka idup baru ari mati ba hari ti ketiga.” Alu ati sida murid Iya balat amat tusah. ²⁴ Leboh sida datai di Kapernaum, urang ke ngumpul duit pupu ke Rumah Sembayang mansang ngagai Petrus, alu nanya, “Kati guru kita enda mayar duit pupu Rumah Sembayang?” ²⁵ “Mayar,” ko Petrus nyaut. Leboh Petrus pulai ke rumah, Yesus alu bejako dulu enggau iya. Ko Iya, “Baka ni ko penemu nuan, Simon? Ari sapa raja dunya ngambi cukai tauka pupu? Ari peranak menua nya empu, tauka ari urang bukai?” ²⁶ “Ari urang bukai,” ko Petrus nyaut. Lalu ko Yesus, “Enti pia, peranak menua iya empu enda iboh mayar cukai. ²⁷ Tang ngambi ka sida enda pedih ati, alai nuan mupuk ngagai danau, alu ulur ka ginti. Ambi meh ikan ti terubah ulih ginti nuan leboh nuan muka mulut iya, nuan deka tetemu ka sesingkap duit. Bai duit nya alu beri ngagai sida, nge Aku enggau nge nuan.”