¹ Urang Farisi enggau urang Saduki alu datai ngagai Yesus, deka nguji Iya. Sida minta Iya ngayan ka ngagai sida site tanda ari surga. ² Ko Yesus nyaut sida, “Leboh hari nyau lemai, kita nyebut, ‘Manah hari pagila, laban langit mirah.’ ³ Lalu leboh pagi hari kita nyebut, ‘Kabut hari sehari to legi, laban langit mirah sereta mambam.’ Kita nemu madah ka gaya hari ari utai ti di peda kita di langit, tang kita enda nemu maca tanda utai ti nyadi diato! ⁴ Rebak ti jai sereta enda tetap ati to begiga ka tanda, tang tanda enda diberi, kelimpah ari tanda Nabi Yunus.” Iya ninggal ka sida, alu mupuk ari endur nya. ⁵ Leboh sida murid datai di seberai danau nya, sida enda ingat mai roti. ⁶ Ko Yesus bejako enggau sida, “Bejimat sereta bejaga ari ragi urang Farisi enggau ragi urang Saduki.” ⁷ Sida alu berandau enggau pangan diri. Ko sida, “To ketegal kitai nadai mai roti.” ⁸ Tang Yesus nemu utai ti disebut sida, alu ko Iya, “Mit amat meh pengarap kita. Nama kebuah kita berandau ka pasal nadai roti? ⁹ Kati kita alu empai mereti? Kati kita enda ingat ka lima iti roti ke lima ribu iko urang? Berapa bakul tedai di gumpul kita? ¹⁰ Tauka tujuh iti tuko roti ke empat ribu iko urang? Berapa bakul tedai di gumpul kita? ¹¹ Nama kebuah kita alu enda mereti? Aku ukai bejako ngagai kita pasal roti. Bejaga kita ari ragi urang Farisi enggau ragi urang Saduki!” ¹² Udah nya baru sida nemu Iya ukai ngasoh sida bejaga ari ragi ti dikena ngaga roti, tang bejaga ari ajar urang Farisi enggau ari ajar urang Saduki. ¹³ Leboh Yesus datai damping menua Kaisarea Filipi, Iya alu nanya sida murid Iya, “Ba penemu urang, sapa Anak Mensia?” ¹⁴ Ko sida nyaut, “Sekeda ngumbai Iya Yohanes Pemaptis. Sekeda ngumbai Iya Elia, alu sida ti bukai ngumbai Iya Yeremia tauka siko ari nabi ti bukai.” ¹⁵ Iya alu nanya sida, “Sapa Aku to ko kita?” ¹⁶ Simon Petrus alu nyaut, “Nuan to Mesias, Anak Allah Taala ti idup.” ¹⁷ Yesus alu nyaut, “Beberekat meh nuan, Simon anak Yunus! Laban mensia nadai madah ka utai to ngagai nuan, tang Apai Aku ti di surga. ¹⁸ Lalu Aku madah ngagai nuan, nuan to Peter alu ba batu to Aku deka niri ka gerija Aku, alu pintu neraka enda uleh ngalah ka iya. ¹⁹ Aku deka meri nuan kunci Perintah surga, alu sebarang utai ditancang nuan di dunya to, deka ditancang di surga, alu sebarang utai di buka nuan di dunya to, deka di buka di surga.” ²⁰ Yesus alu berat-rat enda nyagi sida murid Iya madah ngagai urang ti Iya nya Mesias. ²¹ Berengkah ari nya, Yesus alu belaboh madah ngagai sida murid Iya, Iya enda tao enda mansang ngagai Yerusalem alu ngenat ka Diri diperinsa ka bala tuai bansa, bala tuai imam, enggau bala pengajar Adat, alu dibunoh, alu diangkat ka idup baru ari mati ba hari ti ketiga. ²² Petrus alu narik mai Iya ke tisi, alu belaboh ngerara Iya. Ko Petrus, “Allah Taala enda nyagi utai nya nyadi, Tuhan! Utai nya enda tao sekali-kali nyadi ba Nuan!” ²³ Tang Yesus nguing alu bejako ngagai Petrus, “Rari ari Aku, Sitan! Nuan ngempang jalai Aku, laban nuan berunding ka utai ti dirunding mensia, ukai utai ti dirunding Allah Taala.” ²⁴ Yesus alu madah ngagai sida murid Iya, “Enti urang deka nitih ka Aku, awak ka iya badu agi berunding ka diri empu, ngesan salib iya, alu nitih ka Aku. ²⁵ Laban barang sapa deka ngidup ka nyawa diri, deka ngenyau ka iya, alu barang sapa ngenyau ka nyawa diri ketegal Aku, deka tetemu ka iya. ²⁶ Laban nama penguntung urang, enti iya bempu semua dunya, tang ngenyau ka nyawa diri? Tauka, nama utai ti patut diberi urang kena iya nganti nyawa diri? ²⁷ Laban Anak Mensia enggau bala melikat Iya deka datai alam mulia Apai Iya, alu ngupah genap iko urang niteh ka utai ti udah dikereja sida siko-siko. ²⁸ Enggau bendar Aku madah ngagai kita, sekeda urang ke bediri dito diato empai parai sebedau sida meda Anak Mensia datai enggau Perintah Iya.”