¹ Udah nya urang Farisi enggau sida pengajar Adat datai ari Yerusalem ngagai Yesus, alu bejako, ² “Nama kebuah sida murid Nuan ngelanggar adat asal ake ine kitai, enda masu jari sida sebedau sida makai!” ³ Ko Yesus nyaut sida, “Lalu nama kebuah kita ngelanggar pesan Allah Taala ketegal adat asal kita? ⁴ Laban Allah Taala udah meri pesan, ‘Bebasa ka apai enggau indai nuan.’ Lalu Allah Taala udah mega bejako ‘Urang ke bejai apai indai diri, enda tao enda bunuh.’ ⁵ Tang ko kita, enti urang madah ngagai apai tao ka indai iya: ‘Utai ti dipinta nuan ari aku, udah diberi ngagai Allah Taala,’ ⁶ iya enda iboh bebasa ka apai indai iya. Nya alai, kita udah nulak jako Allah Taala ketegal adat asal kita. ⁷ Kita to urang ke pura-pura ngapa! Sigi amat jako Yesaya leboh iya benabi ka pasal kita! ⁸ ‘Urang to ngemesai ka Aku ngena mulut sida aja, tang ati sida jauh ari Aku. ⁹ Sida ngelebu ka diri nyembah Aku, laban sida ngajar adat mensia.’ ” ¹⁰ Yesus alu ngangau ka urang mayoh ngagai Iya, alu bejako ngagai sida, “Pending ka to uleh kita, ngambi ka kita mereti! ¹¹ Utai ti tama ngagai mulut urang, nadai ngasoh iya nda tuci, tang utai ti pansut ari mulut iya, nya utai ti ngasoh iya nda tuci.” ¹² Udah nya, sida murid Iya datai alu bejako enggau Iya, “Kati Nuan nemu urang Farisi pedeh ati ninga utai ti di sebut Nuan?” ¹³ Disaut Yesus, “Semua utai ti tumbuh, ti ukai di tanam Apai Aku ti di surga, deka di cabut magang. ¹⁴ Anang iboh ka sida. Sida nya urang buta ke ngiring urang buta. Lalu enti urang ke buta ngiring urang ke buta, seduai iya deka sama laboh ngagai alam lubang kebung.” ¹⁵ Tang ko Petrus bejako ngagai Iya, “Padah ka reti jako sempama nya ngagai kami.” ¹⁶ Ko Yesus bejako, “Kati kita empu agi mengkang enda mereti baka sida? ¹⁷ Kati kita enda nemu? Utai ti tama ngagai mulut, tama ngagai perut, alu udah nya di buai ke alam jamban? ¹⁸ Tang utai ti pansut ari mulut, datai ari ati. Nya utai ti ngamah ka mensia. ¹⁹ Laban ari ati pansut runding ti jai, munoh urang, butang, bambai, ngencuri, besaksi bula, enggau bejako ka urang. ²⁰ Nya utai ti ngamah ka mensia. Tang makai ngena jari ti nda di basu, nda ngamah ka mensia.” ²¹ Yesus angkat ari endur nya alu mupuk ngagai menua damping nengri Tirus nggau Sidon. ²² Siko indu urang Kanaan ari menua nya mansang ngagai Yesus, alu ngangau, “Kasih ka aku, O Tuhan, Anak Daud! Anak indu aku dirasuk antu balat amat di perinsa.” ²³ Tang Yesus enda nyaut iya. Sida murid Iya datai alu bejako enggau Iya, “Buru indu nya, laban iya rauh-rauh dibelakang niteh ka kitai!” ²⁴ Yesus alu nyaut, “Aku udah di asoh datai semina ngagai bedus urang Israel ke tesat.” ²⁵ Tang indu nya datai alu nyembah di mua Yesus, alu bejako, “Saup aku, Tuhan!” ²⁶ Ko Yesus nyaut, “Aku enda patut ngambi pemakai ari anak mit, alu nikau ka nya ngagai uduk.” ²⁷ Indu nya alu nyaut, “Nya endang amat, Tuhan, tang uduk deh makai tedai pemakai ti laboh ari mija tuan iya.” ²⁸ Yesus alu nyaut iya, “Endu, besai pengarap nuan! Utai ti dikedeka ka nuan, deka nyadi.” Anak indu iya alu gerai tekala nya. ²⁹ Yesus alu mupuk ari endur nya, alu bejalai ba tebing Danau Galilea. Iya alu niki ngagai bukit sigi, alu nuduk ka Diri. ³⁰ Mayoh amat urang datai ngagai Iya, mai urang ke kait-kupit, urang ke bisi penimpang, ke buta, ke bago, enggau mayoh urang bukai ke sakit. Sida ngengkah ka sida ke sakit damping kaki Yesus, alu Iya ngerai ka sida. ³¹ Urang mayoh balat alit ati meda urang ke bago, bejako, urang ke kait-kupit, bejalai, urang ke timpang pendiau, digerai ka, alu urang ke buta, meda; alu sida mulia ka Allah Taala urang Israel. ³² Yesus ngangau ka sida murid Iya ngagai Iya, alu bejako, “Aku sinu ati ke sida, laban sida udah enggau Aku tiga hari, alu nadai utai di empa. Aku enggai ngasoh sida pulai lapar, enggai ke sida lepi di rantau jalai.” ³³ Lalu ko sida murid Iya bejako enggau Iya, “Dini endur kami di menua puang to uleh nemu pemakai ti cukup kena meri urang ke ngemayoh to makai?” ³⁴ Yesus alu nanya sida, “Berapa iti tuko roti di kemisi kita?” “Tujuh iti, enggau dua tiga iko ikan ti mit,” ko sida nyaut. ³⁵ Yesus alu ngasoh urang mayoh duduk ba tanah, ³⁶ Udah nya, Iya ngambi tujuh iti tuko roti enggau ikan nya. Leboh Iya udah meri terima kasih, Iya mecah ka roti enggau ikan nya, alu meri roti nya ngagai sida murid; sida murid Iya alu nyadung utai nya ngagai bala urang mayoh. ³⁷ Semua sida bela makai magang, alu kenyang. Udah nya sida murid alu ngumpul tujuh bakul penuh tedai pemakai nya. ³⁸ Pemayoh urang ke makai nya empat ribu iko lelaki, enda ngitung sida ke indu enggau anak mit. ³⁹ Leboh Yesus udah ngasoh urang mayoh mupuk, Iya nepan perau, alu mansang ngagai menua Magadan.