¹ Leboh maya nya Herodes, ke merintah di menua Galelia, ninga pasal Yesus, ² alu ko iya bejako enggau bala pemesai iya, “Iya to Yohanes Pemaptis. Iya udah diangkat ka ari mati. Nya kebuah kuasa nya bekereja alam iya.” ³ Laban Herodes udah nangkap Yohanes, alu nancang iya, alu nutup iya alam rumah penjara, ketegal Herodias, bini menyadi iya Filipus, ⁴ laban Yohanes udah bejako ngagai Herodes, “Nuan salah jadi enggau iya!” ⁵ Tang taja pen Herodes bisi ati deka munuh Yohanes, iya takut ka urang mayoh, laban sida ngumbai Yohanes nabi. ⁶ Tang leboh Herodes ngintu hari ulang tahun iya empu, anak indu Herodias betanda di mua bala pengabang, ⁷ alu Herodes gaga amat ati datai ke iya nyau besemaya ngena sumpah deka meri ngagai indu nya sebarang utai ti dipinta iya. ⁸ Ari asoh indai iya, indu nya alu bejako, “Beri ngagai aku dito pala Yohanes Pemaptis ba atas pinggai!” ⁹ Raja alu tusah ati, tang laban iya udah besemaya di mua semua bala pengabang, iya alu ngasoh urang ngereja utai ti di pinta indu nya. ¹⁰ Iya ngasoh urang mumpong pala Yohanes alam rumah penjara, ¹¹ alu pala nya dibai ngena pinggai, alu disua ka ngagai indu nya. Indu nya alu mai pala nya ngagai indai iya. ¹² Sida murid Yohanes datai, ngambi bangkai Yohanes, alu ngubur ka iya. Udah nya sida mupuk alu madah ngagai Yesus. ¹³ Leboh Yesus ninga nya, Iya mupuk ke Diri ari endur nya ngena perau ngagai endur ti sunyi. Tang leboh urang mayoh ninga nya, sida bedarat nitih ka Iya ari nengri sida empu. ¹⁴ Leboh Yesus angkat ari perau, Iya meda mayoh amat urang, alu Iya sinu ati ke sida, alu ngerai ka sida ke sakit. ¹⁵ Leboh hari nyau lemai, sida murid datai ngagai Iya, alu bejako, “Endur to nadai mensia, alu hari pen nyau lemai. Asoh urang mayoh to mupuk, ngambi ka sida bejalai ngagai kampung desa alu meli pemakai ke diri empu.” ¹⁶ Ko Yesus bejako, “Sida enda iboh mupuk. Kita empu meri sida utai di empa!” ¹⁷ Ko sida bejako enggau Iya, “Kami semina bisi lima iti tuko roti, enggau dua iko ikan.” ¹⁸ Lalu ko Yesus bejako, “Bai utai nya kito ngagai Aku.” ¹⁹ Iya alu ngasoh urang mayoh duduk ba rumput. Iya ngambi lima iti tuko roti enggau dua iko ikan nya, engkadah ke langit, meri terima kasih ke roti enggau ikan nya, mecah ka roti nya, alu nyua ka roti nya ngagai sida murid, alu sida nyadung roti nya ngagai urang mayoh. ²⁰ Lalu semua urang bela makai alu kenyang magang. Udah nya, sida murid ngumpul dua belas bakul penuh tedai pemakai nya. ²¹ Pemayoh urang ke makai nya kira lima ribu iko lelaki, enda ngitung sida ke indu enggau anak mit. ²² Udah nya Yesus ngasoh sida murid nepan perau alu mupuk dulu ke seberai danau nya, alu Iya Empu ngasoh urang mayoh pulai. ²³ Leboh Iya udah ngasoh urang mayoh pulai, Iya alu niki ngagai bukit sigi, deka besampi. Leboh hari nyau lemai, semina Yesus aja bisi dia. ²⁴ Tang ba urung maya nya, perau ti di tepan sida murid nyau udah jauh ari tebing alu dipangka ka gelumbang, laban sida nanjak ribut. ²⁵ Ba entara pukul tiga enggau pukul enam pagi, Yesus mansang ngagai sida, bejalai ba atas ai. ²⁶ Tang leboh sida meda Iya bejalai ba atas ai, sida balat amat takut, alu nyerauh, “Antu!” ²⁷ Tang Yesus alu tekala nya bejako enggau sida. Ko Iya, “Anang takut! Aku to. Anang takut!” ²⁸ Petrus alu nyaut Iya. “Tuhan, enti nya amat Nuan, asoh aku bejalai ba atas ai ngagai Nuan.” ²⁹ Ko Yesus, “Kito ke nuan!” Petrus alu angkat ari perau lalu bejalai ba atas ai mansang ngagai Yesus. ³⁰ Tang leboh iya meda pemalat ribut, iya takut, alu leboh iya baru deka belaboh tengelam, iya alu nyerauh, “Tuhan, selamat ka aku!” ³¹ Yesus alu tekala nya nyapai iya, alu bejako, “Mit amat meh pengarap nuan! Nama kebuah nuan kakang?” ³² Leboh seduai iya nepan ngagai perau, ribut alu teduh. ³³ Sida ke alam perau nya alu nyembah Iya. Ko sida, “Nuan amat Anak Allah Taala!” ³⁴ Leboh sida udah ngelayang ke seberai, sida alu sangkai di Genesaret. ³⁵ Lalu leboh urang ke di menua nya ngelala Yesus, sida alu mesau ka urang ari serata menua nya, alu sida mai ngagai Yesus semua urang ke sakit, ³⁶ minta Iya uleh nyuroh sida negu puting kelambi Iya, alu semua urang ke negu puting kelambi Iya, gerai magang.