¹ Ba hari nya mega Yesus pansut ari rumah alu duduk ba tebing danau. ² Mayoh amat urang begelumu ngelingi Iya. Nya alai Iya nepan site perau, alu nuduk ka Diri dia, alu bala urang mayoh bediri ba tebing. ³ Iya alu madah ka mayoh macam utai ngagai sida ngena jako sempama. Ko Iya, “Urang siko nabur ka benih. ⁴ Leboh iya nabur ka benih, sekeda leka benih nya laboh ba jalai raya. Burung datai, alu makai benih nya. ⁵ Sekeda laboh ba tanah ti bebatu ti nadai mayoh tanah, alu leka benih nya matuk tekala nya, laban tanah dia mabu, ⁶ tang leboh mata panas niki, sida kena pancar mata panas nya alu layu laban sida nadai urat. ⁷ Leka benih ti bukai laboh ba madang duri, alu duri nya tumbuh alu ngalah ka sida. ⁸ Benih ti bukai laboh ba tanah ti ami, alu bebuah, sekeda mansut ka seratus, sekeda enam puluh, alu sekeda tiga puluh. ⁹ Awak ka urang ke bisi pending, ninga.” ¹⁰ Udah nya sida murid datai alu bejako enggau Iya, “Nama kebuah Nuan bejako ngagai sida ngena jako sempama?” ¹¹ Ko Iya nyaut sida, “Kita udah diberi penemu pasal mistri Perintah surga, tang penemu nya empai diberi ngagai sida. ¹² Laban urang ke bisi utai, deka diberi mayoh agi, alu iya deka ngembuan mayoh agi utai, tang urang ke nadai utai, indah utai ti mimit ti di kemisi iya deh deka di rampas ari iya. ¹³ Nya kebuah Aku bejako ngagai sida ngena jako sempama, ngambika sida merening, tang enda meda, mending, tang enda ninga tao ka enda mereti. ¹⁴ Ba sida to meh jako nabi Yesaya di kamatka: ‘Kita amat deka mending, tang enda mereti, lalu kita amat merening, tang enda meda. ¹⁵ Laban sida enda nemu berunding, alu pending sida bengal, alu sida udah nutup mata sida, enti enda pia, enggai ke sida meda ngena mata sida, alu ninga ngena pending sida, alu mereti ngena ati sida, alu nguing ka diri ngagai Aku, alu Aku ngerai ka sida.’ ¹⁶ “Tang beberekat meh mata kita, laban sida meda, nggau pending kita, laban sida ninga. ¹⁷ Enggau bendar Aku madah ngagai kita, mayoh nabi nggau urang ke lurus ingin deka meda utai ti dipeda kita, tang nadai meda utai nya, alu ingin deka mending ka utai ti dipending ka kita, tang nadai ninga utai nya. ¹⁸ “Nya alai pending ka sempama penabur benih. ¹⁹ Leboh urang ninga pesan pasal Perintah Allah Taala, alu enda mereti ka pesan nya, Sitan datai alu ngerampas utai ti udah ditabur ka ngagai ati urang nya. Nya meh leka benih ti laboh ba jalai raya. ²⁰ Nyadi benih ti laboh ba tanah ti bebatu nya urang ke ninga pesan nya alu tekala nya nerima iya enggau ati ti gaga. ²¹ Tang iya nadai urat, alu semina tan enda lama aja. Leboh iya dituntung penusah tauka pemerinsa ketegal pesan nya, iya alu tekala nya mungkir. ²² Benih ti laboh ba madang duri nya urang ke ninga pesan nya, tang pengangkun iya ke dunya, enggau ke pengaya ngalahka pesan nya, alu pesan nya enda uleh bebuah. ²³ Nyadi benih ti laboh ba tanah ti ami nya urang ke ninga pesan nya, alu mereti ka iya. Iya alu bebuah, siko seratus leka, siku enam puluh, alu siko tiga puluh.” ²⁴ Yesus madah ka siti agi jako sempama ngagai sida. Ko Iya, “Perintah Allah Taala tao dibanding ka enggau urang siko ke nanam leka benih ti badas ba umai iya. ²⁵ Tang leboh iya tinduk, munsuh datai alu nanam leka lalang ba madang gandum nya, alu mupuk ari endur nya. ²⁶ Nya alai leboh gandum nya tumbuh, alu murai, lalang nya mega dipeda tumbuh. ²⁷ Bala urang gaji iya datai alu bejako ngagai iya, ‘Tuan, ukai enda nuan nabur ka benih ti badas ba umai nya? Nama kebuah umai nya bisi rumput?’ ²⁸ Ko tuan nya nyaut, ‘Nya utai di kereja munsuh.’ Lalu ko sida bejako ngagai iya, ‘Kati nuan deka ngasuh kami nyabut rumput nya?’ ²⁹ Tang ko iya nyaut, ‘Anang! enggai ke kita tecabut ka gandum leboh kita nyabut rumput. ³⁰ Awak ka gandum enggau rumput nya sama tumbuh nyentuk ngagai maya ngetau. Leboh maya ngetau ila aku deka bejako enggau urang ke ngetau, ngasuh sida ngumpul rumput nya dulu, nancang alu nunu rumput nya, alu nyimpan gandum alam setor aku.’ ” ³¹ Yesus madah ka siti agi jako sempama ngagai sida. Ko Iya, “Perintah surga nya baka igi ensabi ti dibai urang siko, alu di tanam iya ba umai iya. ³² Igi ensabi nya leka ti pemado mit ari semua leka utai, tang leboh iya udah tumbuh, pucuk iya besai, alu iya nyadi kayu, datai ke burung nyau begaga ka sarang ba sebelah dan iya.” ³³ Yesus madah ka siti agi jako sempama ngagai sida. “Perintah surga nya baka ragi ti diambi siko indu alu dicampur ka iya enggau empat puluh liter tepung, datai ke semua tepung nya nyau kembai magang.” ³⁴ Semua utai nya dipadah ka Yesus ngagai urang mayoh ngena jako sempama. Iya enda nyebut utai ngagai sida enti enda ngena jako sempama. ³⁵ To ngamat ka jako ti udah di sebut beseruan ka siko nabi: “Aku deka bejako ngena jako sempama, Aku deka nyebut pasal utai ti udah dilalai ka kenyau ari penumbuh dunya.” ³⁶ Udah nya Yesus ninggal ka urang mayoh, alu pulai ke rumah. Sida murid Iya alu datai ngagai Iya, ko sida, “Padah ka ngagai kami reti sempama pasal lalang ti ba umai nya.” ³⁷ Ko Yesus nyaut, “Urang ke nabur ka benih ti badas nya Anak Mensia. ³⁸ Umai nya dunya to, alu benih ti badas nya nembiak Perintah Allah Taala. Lalang nya nembiak Sitan, ³⁹ alu munsuh ke nanam leka lalang nya Sitan. Maya ngetau nya pengujung dunya, alu urang ke ngetau nya bala malaikat. ⁴⁰ Baka rumput ti di gumpul alu ditunu, baka nya meh gaya utai ti deka nyadi leboh pengujung dunya: ⁴¹ Anak Mensia deka ngirum ka bala malaikat Iya, alu sida deka muai ari Perintah Iya semua utai ti ngasoh bedosa, enggau semua urang ke ngereja penyai, ⁴² alu nikau ka sida ngagai dapur api, endur urang deka nyabak sereta begerit ngeli. ⁴³ Udah nya baru urang ke lurus deka mancar baka mata hari alam Perintah Apai sida. Awak ka urang ke bisi pending, ninga. ⁴⁴ “Perintah surga mega baka reta ti berega ti dilalai ka alam sebidang tanah, ti ditemu urang siko alu di lamun iya baru. Enggau ati ti gaga iya mupuk alu nyual semua reta iya, alu meli tanah nya.” ⁴⁵ “Perintah surga mega baka siko urang dagang ke begiga ka batu mutiara ti badas. ⁴⁶ Iya tetemu ka sigi batu mutiara ti berega amat, mupuk alu nyual semua reta iya, alu meli batu mutiara nya. ⁴⁷ “Perintah surga mega baka jala ti ditibar ka ngagai danau, alu buleh semua macam ikan. ⁴⁸ Leboh jala nya nyau penuh laban ikan, urang alu narit jala nya ke tebing, duduk alu nyimpan ikan ti badas alam bakul, tang muai ikan ti enda badas. ⁴⁹ Baka nya meh gaya utai ti deka nyadi leboh pengujung dunya. Bala malaikat deka datai alu nyerara ka urang ke jai ari urang ke lurus, ⁵⁰ alu nikau ka sida ke jai ngagai dapur api, endur sida deka nyabak sereta begerit ngeli. ⁵¹ “Kati kita mereti ka semua utai to?” “Mereti,” ko sida nyaut. ⁵² Lalu ko Iya bejako ngagai sida, “Nya alai semua pengajar Adat ti udah di latih bekereja ke Perintah surga nya baka urang ke bempu rumah, ke mansut ka ari setor iya utai ti baru, enggau utai ti lama.” ⁵³ Leboh Yesus udah tembu madah ka semua jako sempama nya, Iya alu mupuk ari endur nya. ⁵⁴ Leboh Iya datai ba menua Iya Empu, Iya ngajar urang mayoh alam sinagoge. Sida alit ati ke Iya alu ko sida bejako, “Dini endur urang to buleh penemu-dalam to, enggau kereja ajih to? ⁵⁵ Ukai enda Iya to anak tukang kayu? Ukai enda indai Iya benama Maria? ⁵⁶ Lalu ukai enda Iya to menyadi Yakobus, Yusuf, Simon enggau Yudas? Ukai enda semua menyadi indu Iya bisi dito enggau kitai? Nya alai dini endur Iya buleh semua utai to?” ⁵⁷ Nya alai sida nulak Iya. Tang ko Yesus bejako ngagai sida, “Nabi endang dibasa urang, kelimpah ari di menua enggau alam ruang bilik iya empu.” ⁵⁸ Lalu Iya nadai ngereja mayoh kereja ajih dia, laban sida enda arap.