1
Mi bai tok tenkyu long God Yawe wantaim bel bilong mi na tokaut long olgeta gutpela samting em i mekim.
2
Mi bai pilim amamas long yu na mi bai singim song long litimapim nem bilong yu, Bikpela Antap tru.
3
Taim birua bilong mi i tanim bek ken, ol i pundaun na dai long pes bilong yu.
4
Long wanem yu strongim stretpela pasin bilong mi na yu sindaun long sia king olsem stretpela jas!
5
Yu stretim ol kantri na yu bin bagarapim ol sin manmeri na lus tingting long nem bilong ol oltaim oltaim.
6
Ol birua i bruk na bagarap nabaut taim yu kisim pinis biktaun bilong ol. Nogat man bai tingim ol ken.
7
Tasol God Yawe bai stap oltaim, em i kamapim pinis sia king bilong em long mekim stretpela pasin.
8
Em bai kotim dispela graun wantaim stretpela pasin na em bai mekim stretpela pasin long givim bikpela kot long ol kantri.
9
God Yawe bai kamap strongpela haus bilong ol manmeri husat i stap long bikpela hevi na long taim bilong trabel.
10
Husat ol i save long nem bilong yu, i ken bilip long yu, long wanem God Yawe yu no save givim baksait long husat i kam long yu.
11
Litimapim nem bilong God Yawe em i bikpela bilong Saion na tokim olgeta kantri long wanem samting em i bin mekim.
12
Long wanem bikpela God i save tingting long ol manmeri husat i lusim pinis blut bilong ol na em i no save lus tingting long krai bilong ol lain i stap long hevi.
13
Yu marimari long mi, God Yawe, lukim ol pen na hevi ol birua bilong mi i bin wokim long mi, yu ken rausim mi long ol ples bilong dai.
14
Olsem na mi bai tokaut long litimapim nem bilong yu. Long haus bilong pikinini meri bilong Saion, bai mi amamas long yu bilong wanem yu bin kisim bek mi!
15
Ol kantri i go daun pinis insait long hul ol i bin wokim long en na lek bilong ol i pas long umben ol i taitim.
16
God Yawe i soim em yet klia taim em i mekim kot, pasin nogut bilong ol yet i mekim ol i kamap sin manmeri. Sela
17
Ol i salim ol sin manmeri long tanim bek na go long Seol, em olgeta kantri ol i lus tingting long bikpela God.
18
God bai i no inap lus tingting long ol trangu manmeri, bel na tingting bilong ol manmeri i stap long bagarap bai i no inap lus nating.
19
Kirap, God Yawe, noken larim man bai winim yu na larim ol kantri i ken sanap long kot long ai bilong yu.
20
Mekim ol pret moa, God Yawe, larim ol kantri i luksave olsem ol i samting nating tasol.Sela