Gutpela man bilong pilai musik. Song bilong ol pikinini man bilong Kora. ¹ Bikpela God Yawe, yu ples hait na strong bilong mi. Oltaim yu stap long helpim hevi bilong mi. ² Olsem na mipela i no inap pret, maski graun i senis, maski ol maunten i pundaun i go namel long ol solwara, ³ maski ol wara i mekim bikpela nois na bruk nabaut na maski ol maunten i guria wantaim ol liklik maunten i solap. Sela ⁴ I gat bikpela wara na liklik han wara i mekim biktaun bilong God Yawe i amamas, long ples bilong God bikpela Antap Tru i stap long em. ⁵ God Yawe i stap namel long biktaun bilong em, biktaun bilong em bai i no inap bagarap. God Yawe bai helpim biktaun bilong em long moning taim san i no kamap yet. ⁶ Ol kantri bai belhat na ol kingdom bai guria, em bai lukluk i go antap na singaut na graun bai kamap olsem wara. ⁷ God Yawe Bikpela antap tru i stap wantaim yumi, em i God bilong Jekop, em i ples hait bilong yumi. Sela ⁸ Kam na lukim, ol samting God Yawe i mekim na kamapim bagarap long olgeta hap bilong graun. ⁹ Em i save mekim ol pait i pinis long olgeta hap bilong graun, em i save brukim bunara, katim spia i go liklik na em i save kukim ol hap plang bilong pait. ¹⁰ Stap isi na save olsem, Mi yet mi God Bikpela, olgeta manmeri bilong ol kantri na olgeta hap bilong graun bai litimapim nem bilong mi. ¹¹ God Yawe bikpela antap tru i stap wantaim yumi, God bilong Jekop, em i ples hait bilong yumi. Sela