Gutpela man bilong pilai musik. Song bilong pikinini man bilong Kora. ¹ Mipela i harim long yau bilong mipela, God na ol papa bilong mipela i bin tokim mipela long wanem wok yu bin mekim long dei bilong ol na long taim bipo. ² Yu rausim ol kantri long han bilong yu tasol yu putim ol lain bilong mipela na yu i bin bagarapim ol lain manmeri tasol yu putim ol manmeri bilong mipela long olgeta hap graun. ³ Ol i no kisim graun wantaim bainat long strong bilong ol, tasol long han sut bilong yu na long strong na lait bilong pes bilong yu, long wanem yu bin laikim ol tru. ⁴ God, yu King bilong mi, givim tok lukaut long strong bilong strongim Jekop. ⁵ Long yu tasol bai mipela i daunim ol birua bilong mipela na long nem bilong yu bai mipela krungutim ol i go daun na husat ol i birua long mipela. ⁶ Long mi bai mi no inap bilip long bunara, long wanem, bainat bilong mi bai i no inap helpim mi. ⁷ Tasol yu bin helpim mipela long ol birua bilong mipela na givim sem long husat i no laikim mipela. ⁸ Long God, mipela i apim nem bilong mipela yet na mipela bai tok tenkyu long nem bilong yu olgeta taim. Sela* ⁹ Tasol nau yu bin rausim mipela olgeta na givim baksait na yu i no save go wantaim ol ami bilong mipela. ¹⁰ Yu mekim mipela givim baksait long birua na husat ol i belhat long mipela i bagarapim ol yet. ¹¹ Yu mekim mipela olsem sipsip bilong kilim na tromoi mipela nambaut long namel long ol kantri. ¹² Yu bin salim ol lain manmeri bilong yu nating na yu no kisim planti moni samting taim yu mekim olsem. ¹³ Yu mekim mipela tok kros long ol wantok bilong mipela na lap na tok pilai long husat i stap klostu long mipela. ¹⁴ Yu i larim ol manmeri bilong narapela kantri i tok bilas long mipela na tanim het long mipela. ¹⁵ Olgeta dei bilong mi, sem i stap wantaim mi na sem long pes bilong mi i karamapim mi ¹⁶ long wanem tok bilong ol narapela husat i save tok strong long mi na tok bilas long mi, long wanem ol birua na ol lain bilong pait bek i daunim mi. ¹⁷ Olgeta dispela samting i kamap long mipela na mipela i no lus tingting long yu o mekim giaman toktok long tok promis bilong yu. ¹⁸ Bel bilong mipela i no lusim yu na wokabaut bilong mipela i no go longwe long yu. ¹⁹ Yu bin larim mipela long ples bilong ol wel abus i save stap na mekim mipela pret long dai. ²⁰ Sapos mipela i lus tingting long nem bilong God bilong mipela o tromoi han bilong mipela long ol arapela god, ²¹ ating God bai i no inap painim aut dispela? Long wanem, em i save long hait tingting bilong mipela. ²² Tru tumas, long nem bilong yu ol i kilim mipela long olgeta dei na mipela i kamap olsem ol sipsip bilong kaikai. ²³ Kirap, bilong wanem yu slip, Bikpela? Kirap, yu noken tromoi mipela i go olgeta. ²⁴ Bilong wanem yu haitim pes bilong yu na lusim tingting long sori na bagarap bilong mipela? ²⁵ Long wanem mipela i tanim kamap olsem das na bodi bilong mipela i pas long graun. ²⁶ Kirap na helpim mipela na kisim bek mipela long tok promis long stretpela pasin bilong yu.