Song bilong Devit, taim em i bin giaman olsem longlong long ai bilong Abimelek, husat i rausim em. ¹ Bai mi litimapim nem bilong God Yawe long olgeta taim, maus bilong mi bai litimapim nem bilong em oltaim. ² Bai mi litimapim nem bilong God Yawe! Inap bai ol husat lain i stap long pen na bagarap bai i ken harim na amamas. ³ Litimapim nem bilong God Yawe wantaim mi, yumi olgeta i litimapim nem bilong em wantaim. ⁴ Mi bin singaut long God Yawe na em i harim mi na em i givim mi strong long daunim olgeta pret i laik kamap long mi. ⁵ Husat ol lain i save lukluk long em, ol i stap olsem lait na pes bilong ol i no save sem. ⁶ Dispela man husat i stap long pen i singaut long God Yawe na em i harim em na helpim em long olgeta hevi bilong em. ⁷ Na ensel bilong God Yawe i save banisim husat ol lain i save pretim em na i save helpim ol. ⁸ Traim na lukim God Yawe em i gutpela tru. Man husat ol i hait insait long em ol i ken amamas. ⁹ Pretim God Yawe, yupela ol stretpela manmeri bilong em. Ol lain i gat pasin bilong pret long em bai ino inap sot long wanpela samting. ¹⁰ Na yanpela laion sampela taim em i nogat kaikai na hangre nogut tru, tasol husat ol lain i painim God Yawe bai ol i no inap sot long ol gutpela samting. ¹¹ Ol pikinini man, yupela kam long mi na harim. Bai mi skulim yupela long stap aninit long God Yawe. ¹² Wanem kain man i stap we em i save i gat dispela hangre long laip na i laikim planti dei, em i ken lukim gutpela samting? ¹³ Na pasim tang bilong yupela long ol nogut na pasim maus bilong yupela long ol tok giaman. ¹⁴ Givim baksait long pasin nogut na mekim gutpela pasin. Painim bel isi bilong em na bihainim. ¹⁵ Ai bilong God Yawe i save stap antap long ol stretpela lain na yau bilong em i save harim stret olgeta singaut bilong ol. ¹⁶ God Yawe i save givim baksait long ol lain husat i save mekim pasin nogut na ol bai i lus tingting long olgeta ol pasin bilong dispela graun. ¹⁷ Na ol stretpela lain i singaut strong na God Yawe i harim ol na em i helpim ol long olgeta hevi bilong ol. ¹⁸ God Yawe i stap klostu long ol lain bel bilong ol i bruk tru na em i helpim ol lain i bagarap na i daun tru long spirit bilong ol. ¹⁹ Planti hevi i bungim ol stretpela manmeri, tasol God Yawe i helpim ol long ol dispela hevi. ²⁰ Em i lukautim olgeta bun bilong ol na nogat wanpela bai i bruk. ²¹ Pasin nogut bai i kilim ol lain bilong sakim tok. Ol lain i save les tru long ol stretpela pasin bai ol i bagarap. ²² God Yawe i helpim laip bilong ol wok manmeri bilong em. Nogat wanpela bilong ol i stap insait long em bai i painim bagarap.