¹ Wanpela man nem bilong em Lasarus, em i sik. Em i bilong ples Betani, em wanples bilong Maria na susa bilong em Mata. ² Em dispela Maria tasol i bin welim Bikpela wantaim sanda mir na klinim lek bilong em wantaim het gras bilong em, husat brata bilong em Lasarus i sik. ³ Ol dispela tupela susa i salim tok long Jisas na i tok, "Bikpela, kam lukim, dispela man yu save laikim tumas em i sik." ⁴ Jisas i harim dispela tok na em i tok, "Dispela sik i no inap mekim em i dai nogat, em i bilong kamapim biknem bilong God, olsem bai Pikinini bilong God bai kisim biknem. ⁵ Nau Jisas i save laikim tumas Mata na susa bilong em, na Lasarus. ⁶ Jisas i harim Lasarus i sik tasol em i stap tupela dei moa long ples em stap long em. ⁷ Na bihain em i tokim ol disaipel olsem, "Yumi go bek long Juda." ⁸ Na ol disaipel i tokim em olsem, "Tisa, ol Juda i bin laik tromoi ston long yu, tasol yu laik go bek gen long dispela hap, a?" ⁹ Na Jisas i bekim, "Yumi gat 12-pela aua long wanpela dei, sapos wanpela man i wokabaut long dei taim, em bai i no inap bamim lek na pundaun long wanem em i lukluk long lait bilong dei. ¹⁰ Tasol sapos em i wokabaut long nait em bai bamim lek bilong em na pundaun, long wanem lait i no stap long em." ¹¹ Jisas i tok olsem, na bihain em i tokim ol, "Poroman bilong yumi Lasarus i slip, tasol bai mi go na kirapim em long slip." ¹² Na ol disaipel i tok, "Bikpela, sapos em i slip, em bai orait gen," ¹³ Jisas i tok long Lasarus i dai pinis, tasol ol i ting em i tok long em i slip na malolo. ¹⁴ Nau Jisas i tokaut klia long ol olsem, "Lasarus i dai pinis. ¹⁵ Mi tingting long yupela na mi amamas, olsem mi i no bin stap wantaim em long dispela taim, tasol nau bai yupela i bilip. Orait yumi go long em." ¹⁶ Tomas narapela nem bilong em Didimas i tokim ol arapela disaipel olsem, "Yumi go na bai yumi ken dai wantaim Jisas." ¹⁷ Taim Jisas i kam kamap, em i harim olsem Lasarus i bin stap long matmat 4-pela dei pinis. ¹⁸ Ples Betani i stap tripela kilomita klostu long Jerusalem. ¹⁹ Planti lain Juda i kam i stap wantaim Mata na Maria long mekim gut bel bilong tupela long brata bilong ol. ²⁰ Orait, taim Mata i harim olsem Jisas i kam, em i go na bungim em, tasol Maria i sindaun i stap long haus. ²¹ Na Mata i tokim Jisas olsem, "Bikpela, sapos yu bin stap hia, brata bilong mi bai i no inap dai. ²² Tasol mi save olsem sapos nau yu askim God long wanpela samting, em bai givim yu." ²³ Na Jisas i tokim em, "Brata bilong yu bai kirap gen." ²⁴  Na Mata i tokim em, "Mi save em bai kirap bek long taim bilong Bikpela i kirapim bek dai man long las dei." ²⁵ Na Jisas i tokim em olsem, "Mi yet mi man bilong kirapim bek dai man na mi yet mi man bilong givim laip; Man husat i bilip long mi maski em i dai, bai em i stap laip yet. ²⁶ Na husat i stap laip na i bilip long mi bai i no inap dai. Yu bilip long dispela, a?" ²⁷ Na em i tok, "Yes Bikpela mi bilip olsem yu Krais, Pikinini bilong God husat bai i kam long dispela graun." ²⁸ Em i tok olsem na em i go tokim Maria isi olsem, "Tisa i kam na em i singautim yu." ²⁹ Taim Maria i harim dispela, kwiktaim em i kirap na i go long Jisas. ³⁰ Jisas i no kam insait long ples yet, em i stap yet long hap we Mata i bin bungim em. ³¹ Ol lain Juda i stap wantaim Maria insait long haus, na i wok long mekim gut bel bilong em. Taim ol i lukim em i kirap kwiktaim na ran i go autsait, ol i ting em i laik go krai long matmat olsem na ol bihainim em i go. ³² Maria i kam kamap long ples Jisas i stap na em i lukim em na i pundaun long lek bilong Jisas na i tok, "Bikpela sapos yu bin stap long hia, brata bilong mi bai i no inap dai." ³³ Na taim Jisas i lukim em i krai na olgeta lain Juda i kam wantaim em i krai, bel bilong em i bruk na em i sori tru, ³⁴ na em i tok, "Yupela putim em we?" Na ol i tokim em, "Bikpela, yu kam lukim." ³⁵ Na Jisas i krai. ³⁶ Na ol Juda i tok, "Lukim! em i laikim Lasarus moa yet!" ³⁷ Tasol sampela bilong ol i tok, "Dispela man i bin opim ai bilong aipas man, olsem na, bilong wanem em i no laik mekim dispela man tu i no inap dai?" ³⁸ Jisas i bel sori gen na em i go long matmat. Dispela matmat, ol i bin wokim matmat long wanpela hul bilong ston na pasim dua bilong en wantaim wanpela ston. ³⁹ Na Jisas i tok, "Rausim dispela ston." Tasol Mata, susa bilong Lasarus, dispela man i bin dai i tokim Jisas olsem, "Bikpela, bodi bilong em i sting pinis, long wanem em i dai 4-pela dei i go pinis." ⁴⁰ Na Jisas i tokim em olsem, "Mi tok tru long yu, sapos yu bilip bai yu lukim glori bilong God." ⁴¹ Orait ol i rausim ston na Jisas i lukluk i go antap na i tok, "Papa, Mi tok tenkyu long yu harim tok bilong mi. ⁴² Mi save olsem yu save harim tok bilong mi, tasol mi mekim dispela tok bilong ol manmeri i sanap raunim mi, bai ol i ken bilip olsem yu bin salim mi kam." ⁴³ Bihain long dispela, em i singaut bikpela na i tok, "Lasarus, yu kam autsait!" ⁴⁴ Na dai man i kam aut wantaim laplap ol i bin pasim lek han na peis bilong em wantaim. Na Jisas i tokim ol, "Rausim laplap na larim em i go." ⁴⁵ Na planti ol Juda i bihainim Maria i kam, i lukim samting Jisas i mekim na ol i bilip long em. ⁴⁶ Tasol sampela bilong ol i go na tokim ol Farisi long samting Jisas i bin mekim. ⁴⁷ Orait ol hetpris na ol Farisi i go kisim ol kansol i kam bung na ol i tok, "Bai yumi mekim wanem? Dispela man i mekim ol planti mirakel. ⁴⁸ Sapos yumi larim em i stap, olgeta bai bilip long em na ol Rom bai kam na bagarapim ples na kantri bilong yumi." ⁴⁹ Tasol wanpela man namel long ol, nem bilong em Kaiafas, em i hetpris long dispela yia, em i tokim ol olsem, "Yupela i no save long wanpela samting. ⁵⁰ Yupela i mas save olsem i gutpela moa long wanpela man i kisim ples bilong ol manmeri na dai, bai kantri i no inap bagarap." ⁵¹ Em i no mekim dispela tok long tingting bilong em yet, nogat. Em i stap hetpris long dispela yia olsem na em i mekim tok profet olsem Jisas bai dai long ol manmeri bilong Juda, ⁵² na i no ol Juda tasol, nogat. Jisas bai bungim olgeta pikinini bilong God i stap nabaut long olgeta hap i bung na kamap wanpela. ⁵³ Na long dispela dei na i go, ol i stat long painim rot long kilim Jisas i dai. ⁵⁴ Olsem na Jisas i no moa wokabaut namel long ol Juda, em i go stap long hap bilong kantri klostu long ples nating long wanpela taun ol i kolim Efrem. Em i go stap wantaim ol disaipel bilong em long hap. ⁵⁵ Nau Bikpela Dei Bilong Pasova i kam klostu na planti ol lain manmeri bilong olgeta hap bilong Juda i kam bung long Jerusalem long mekim ol yet i kamap klin pastaim long Bikpela Dei Bilong Pasova bai kamap. ⁵⁶ Ol manmeri i kam painim Jisas, na ol i sanap insait long tempel na toktok i go i kam long ol yet olsem, "Yupela ting wanem? Em bai kam long Bikpela Dei Bilong Lotu o nogat?" ⁵⁷ Ol hetpris na ol Farisi i givim strongpela tok long ol manmeri olsem, sapos wanpela man o meri i save long wanem hap Jisas i stap, em i mas tokim ol, na bai ol i ken holim pasim em.