¹ Husat i bilipim ol tok ol i harim long mipela na husat i lukim wok bilong God Yawe? ² God Yawe i bin lukautim em olsem wanpela yangpela diwai na olsem wanpela liklik diwai i kamap long drai graun, em i no kamap olsem wanpela samting i gat gutpela bilas bilong en na mipela i no laikim em taim mipela i lukluk long em. ³ Ol manmeri i mekim toktok bilong bagarapim em na rausim em, em i olsem man i stap wantaim sori na em i man bilong karim pen. Olsem wanpela man ol man i no laik long lukim pes bilong en, ol i daunim em na ol i lukim em olsem man nating. ⁴ Tasol tru tumas em i karim olgeta sik na hevi bilong yumi, tasol mipela i ting God i givim hevi long em, God i mekim save long em na em i karim pen bilong yumi. ⁵ Tasol long wanem, bodi bilong en i bin bruk long pasin nogut bilong yumi, ol i mekim save tru long em long sin bilong yumi. Ol i givim pen long em na yumi kisim bel isi na bodi bilong em i bruk na yumi kamap orait. ⁶ Yumi olgeta i olsem sipsip i go long rot bilong bagarap na yumi bihainim laik bilong yumi yet, olsem na God Yawe i putim olgeta nogut bilong yumi antap long em. ⁷ Ol i mekim nogut long em, tasol em i daunim em yet na i no mekim wanpela tok, olsem wanpela pikinini sipsip ol i kisim i go bilong kilim na olsem sipsip ol i laik katim gras bilong en, tasol em i no mekim wanpela tok. ⁸ Ol i holim pasim em na kotim em, ol i tok em i mas dai na i nogat ol man i tingting long em? Tasol em bai i dai na i no inap i stap moa long dispela graun, long wanem, em i kisim hevi bilong olgeta manmeri. ⁹ Ol i planim em wantaim ol man nogut na man i gat planti mani samting, long taim em i dai, em i no mekim wanpela asua o mekim wanpela tok giaman. ¹⁰ Tasol dispela em i laik bilong God Yawe, bai ol i bagarapim em na mekim em i pilim pen. Taim em i givim laip bilong em olsem ofa long sin bilong ol manmeri, bai planti manmeri bilong em i kisim laip, em bai i dai na kirap bek na i stap laip oltaim, olsem na em bai inapim laik bilong God Yawe. ¹¹ Bihain long olgeta pen em i karim long laip bilong en , em bai lukim lait na em bai amamas long save bilong em. Stretpela pasin bilong wokman bilong mi bai mekim planti manmeri i kamap stretpela. ¹² Olsem na God bai i givim namba long em wantaim ol bikman na em bai i skelim ol samting long planti lain, long wanem, em i bin givim em yet na ol i bin killim em i dai wantaim ol sin man. Em i karim sin bilong olgeta manmeri na prea long God bai i lusim rong bilong ol.