¹ Harim, yupela ol lain i save bihainim stretpela pasin na painim God Yawe. Lukim dispela ol ston mi bin katim yupela long en. ² Lukim Abraham, papa bilong yupela na Sara tupela i karim yupela, taim em i bin stap wanpis, mi bin singautim em na blesim em wantaim planti pikinini. ³ Yes, God Yawe bai mekim gut long Saion, em bai mekim gut long ol ples i nogat man na ol hap i bagarap i stap olsem Iden na ples nating i stap arere long wara Jodan olsem gaden bilong God Yawe, em bai i stap ples bilong amamas, singim song bilong tenkyu. ⁴ Ol manmer bilong mi, harim tok bilong mi, mi bai givim lo long yupela na stretpela pasin bilong mi bai stap olsem lait bilong olgeta kantri. ⁵ Stretpela pasin bilong mi i kamap klostu pinis, wok bilong mi long kisim bek olgeta manmeri bai i go long olgeta hap na mi bai lukautim olgeta kantri na olgeta lain long nambis. ⁶ Lukluk i go antap long skai na lukluk i go daun long graun, heven bai pinis wantu olsem smuk na graun bai i bagarap olsem laplap na ol manmeri i stap long en bai dai olsem ol lang. Tasol wok bilong mi long kisim bek ol manmeri bai i stap oltaim na stretpela pasin bilong mi bai i no inap pinis. ⁷ Harim tok bilong mi na save long wanem samting i stret, yupela ol manmeri i save long lo bilong mi long bel bilong yupela. Noken pret na bel hevi long ol tok nogut ol man i mekim long yupela. ⁸ Ol dispela lain bai bagarap na pinis olgeta olsem binatang i kaikai ol laplap, tasol stretpela pasin bilong mi bai i stap oltaim na wok bilong mi long kisim bek ol manmeri bai i go long lain bihain. ⁹ Kirap, kirap, han bilong God Yawe i kam wantaim strong bilong em. Kirap olsem yu bin mekim long ol manmeri long taim bipo. Ino yu husait i bin kilim Rahab, yu husait i bin kilim dispela masalai. ¹⁰ Yu tasol i bin mekim solwara i drai na mekim rot i kamap bilong ol manmeri yu bin kisim bek long wokabaut long en. ¹¹ Ol manmeri God Yawe i helpim ol, ol bai kam bek long Saion wantaim singsing na amamas oltaim. Ol bai pulap long singsing na amamas, krai na sori bai pinis olgeta. ¹² ''Mi, Mi yet bai mekim gut long yu. Bilong wanem yu pret long ol man i save dai, ol pikinini bilong man i olsem gras? ¹³ Bilong wanem yupela i lusim tingting long mi God Yawe, husait i wokim heven na olgeta samting i stap antap long graun? Bilong wanem na olgeta taim yupela i save pret na guria long ol man i laik bagarapim yupela? ¹⁴ God Yawe bai hariap long helpim wanpela man i stap hangre na i laik i dai. ¹⁵ Mi yet mi God Yawe mi God bilong yupela, mi save mekim solwara i kirap na mekim nois. Me God Yawe i gat olgeta strong em nem bilong em. ¹⁶ Mi putim tok bilong mi long maus bilong yupela na mi karamapim yupela long han bilong mi, olsem heven i stap long ples bilong en na graun tu i stap long ples bilong en na tok olsem long Saion,' Yupela ol manmeri bilong mi.' ¹⁷ Kirap, kirap, Jerusalem yu sanap, God Yawe i belhat long yu olsem em i givim yu dis wain long dring na spak nogut tru. ¹⁸ I nogat wanpela bilong ol pikinini man em i karim inap long holim han bilong em na was long em. ¹⁹ Dispela tupela hevi i kamap long yu, husait bai mekim bel bilong yu i stap isi? Ol birua i bin bagarapim yu na kilim yu long bainat na taim bilong hangre husait bai i lukautim yu? ²⁰ Ol pikinini man bilong yu i ai raun na pundaun, ol i slip long olgeta kona bilong ol liklik han rot, olsem wel abus i stap insait long umben. God Yawe i belhat na kros long ol. ²¹ Tasol nau yupela harim, yupela i kisim bikpela bagarap na spak pinis, tasol yupela i no spak long wain. ²² Bikpela God Yawe, God bilong yu, i tok olsem long ol mameri bilong em, ''Lukim mi rausim pinis kap bilong belhat long han bilong yupela, dispela kap bilong belhat bilong mi na bai yupela i no inap drin gen. ²³ Mi bai putim dispela kap long han bilong ol man i save givim hevi long yu na i save tokim yu olsem, ''slip long graun na bai mipela i wokabaut antap long yu, baksait bilong yu i kamap olsem graun na ol liklik han rot bilong wokabaut.''