¹ Dispela tok bilong God Yawe i kam long Hosia pikinini man bilong Beri, insait long taim bilong Usia, Jotam, Ahas na Hesekia, ol i bin i stap king bilong Juda na Jeroboam pikinini man bilong Joas i stap king bilong Israil. ² Taim God Yawe i bin tokim Hosia, em i tok olsem, ''Go painim wanpela pamuk meri na yu maritim em. Bai em i karim pikinini olsem kaikai bilong dispela pasin pamuk, long wanem dispela graun i mekim planti pasin pamuk na ol manmeri i givim baksait long God Yawe. ³ Olsem na Hosia i go na maritim Goma pikinini meri bilong Diblaim na em i gat bel na karim wanpela pikinini boi. ⁴ God Yawe i tokim Hosia, ''Kolim nem bilong em Jesril, em i olsem klostu taim bai mi mekim save long lain bilong Sehu, long wanem ol i bin kilim ol man long Jesril na bai mi stopim ol manmeri long kingdom bilong Israel. ⁵ Long dispela taim bai mi brukim bunara bilong Israil long ples daun bilong Jesril.'' ⁶ Goma i gat bel na karim wanpela pikinini meri gen. God Yawe i tokim Hosia olsem, ''Kolim nem bilong em Loruhama, long wanem bai mi no inap marimari long ol Israil na lusim sin bilong ol. ⁷ Bai mi sori long ol Juda na kisim bek ol long strong bilong mi yet God Yawe, God bilong ol. Mi no inap kisim bek ol long strong bilong bunara o bainat o ol hos na long ol hosman." ⁸ Taim Loruhama i bikpela pinis na Goma i gat bel na karim narapela pikinini boi. ⁹ Na God Yawe i tokim Hosia, ''Kolim nem bilong em Loami, em i olsem, yupela i no manmeri bilong mi na mi no God bilong yupela. ¹⁰ Namba bilong ol Israil bai i olsem wesan bilong nambis na yupela i no inap long kauntim. Ol i bin kisim tok bipo olsem, 'ol i no manmeri bilong God, tasol nau ol bai tok, 'yupela i manmeri bilong God i gat laip.' ¹¹ Ol manmeri bilong Juda na Israil bai i bung wantaim na makim wanpela lida bilong ol na ol bai i go aut long dispela graun. Em i olsem bikpela na gutpela dei bai i kamap long Jesril.