¹ God Yawe i toktok long moses olsem, ² "Tokim ol Israel i mas i go bek na wokim kemp arere long ples Pi Hahirot, namel long Mikdol na solwara Detsi klostu long Bal Sefon. ³ Na king Fero i tok long ol Israel olsem. 'Ol bai raun nating long ples drai. Na ol i nogat rot bilong lusim dispela ples.` ⁴ Mi bai mekim king i belhat na em bai ronim yupela.Tasol bai mi winim em wantaim ol ami bilong em na bai mi kisim biknem long dispela samting mi mekim. Na ol lain Isip bai save olsem mi tasol mi God Yawe i gat olgeta stron.'' Olsem na ol Israel i harim tok na mekim kemp long hap. ⁵ Taim ol i tokim king bilong Isip olsem ol Isreal i ranawe pinis, Fero wantaim ol ofisa bilong en i senisim tingting bilong ol na i tok olsem, "Bilong wanem na yumi larim ol Isreal i go pinis na ol bai i no inap mekim wok bilong yumi?" ⁶ Bihain Fero i redim ol karis bilong pait na kisim ol ami wantaim em. ⁷ Em i kisim 600 namba wan karis wea ol i makim pinis, wantaim ol narapela karis i stap long Isip wantaim olgeta ofisa bilong en. ⁸ God Yawe i mekim bel bilong king Fero, i stron tumas na em i belhat na ronim ol lain Israel. Ol Israel i save olsem ol i winim pinis ol Isip. ⁹ Tasol olgeta Isip wantaim ol hos, karis, ol man long hos na ol ami i belhat na bihainim ol long baksait. Ol i abrusim kemp bilong ol Israel arere long solwara klostu long Pi Hairot na Bal Sefon. ¹⁰ Taim Fero i kam klostu pinis, ol Isreal i lukim em na ol i kirap nogut. Ol Isip i kam klostu long ol na ol i poret nogut tru. Na ol Israel i singaut long God Yawe. ¹¹ Ol i tokim Moses olsem, "Ating i nogat ples matmat long Isip olsem na yu kisim mipela kam long ples nating. Bilong wanem na yu mekim olsem long mipela na kisim mipela i kam autsait long Isip? ¹² Ating mipela i no tokim yu long dispela kain samting long Isip a? Mipela i bin tokim yu, 'Larim mipela i stap wokboi nating bilong Isip. Em i gutpela long mipela mekim wok long ol Isip na i no gutpela long mipela i dai long dispela ples wesan nating." ¹³ Moses i tokim ol manmeri olsem, " Yupela i no ken poret. Stap isi na lukim God Yawe bai helpim yumi nau. Yupela i no inap lukim ol Isip ken olsem yupela i lukim nau. ¹⁴ God Yawe bai mekim pait long yupela, olsem na yupela i mas stap isi tasol." ¹⁵ Olsem na God Yawe i tokim Moses, "Bilong wanem yu wok long singaut long mi olsem?. Tokim ol Israel i mas wokabaut i go pas. ¹⁶ Hapim wokabaut stik bilong yu na makim solwara na wara bai bruk long tupela hap, bai ol Israel inap wokabaut long drai graun i go long hapsait. ¹⁷ Yu mas save olsem, mi bai mekim tingting bilong ol Isip i pas tru na ol bai bihainim yupela i go. Mi bai winim Fero wantaim karis bilong em, olgeta ami billong em na karis bilong em na ol soldia i sindaun long hos bilong em na mi bai kisim biknem long wanem i kamap long ol. ¹⁸ Bihain ol Isip bai save olsem mi yet mi God Yawe olsem na mi winim Fero, wantaim ol karis na ol man long hos bilong en." ¹⁹ Dispela ensel bilong God Yawe i go pas lain long ol Israel, i lusim dispela hap na i go long baksait bilong ol. Na klaut bilong lait i go pas long ol na sanap baksait long ol Israel. ²⁰ Dispela klaut i kam namel long kemp bilong Isip na Israel. Na tudak i karamapim ol Isip tasol em i givim lait long ol Israel long nait. Olsem na long dispela nait ol Isip i no inap i go klostu long ol Israel. ²¹ Orait Moses hapim han na i makim solwara. God Yawe i mekim stronpela Is win i kamap long hap san kamap long dispela olgeta nait na mekim solwara i drai. Long dispela rot wara i bruk namel. ²² Ol Israel i wokabaut namel long solwara antap long drai graun. Na wara i sanap olsem banis long tupela sait. ²³ Na ol Isip i ronim ol long baksait, ol i bihainim ol i go kamap namel long solwara, olgeta hos, karis na ol soldia bilong Fero. ²⁴ Long monin taim God Yawe i lukluk i go daun long ol ami bilong Isip long paia na long klaut. Em i mekim ol Isip i poret . ²⁵ Na wil bilong ol karis i pas long graun na ol soldia i painim hat tru. Olsem na ol Isip i tok, "Yumi larim ol Israel, long wanem God Yawe i pait long yumi bilong helpim ol." ²⁶ God Yawe i tokim Moses, "Stretim han bilong yu na makim solwara na bai wara i kam bek ken antap long ol karis na ol soldia bilong ol Isip." ²⁷ Olsem na Moses i makim han i go long solwara na wara i kam bek long ples bilong en long taim tulait i bruk. Na olgeta Isip i go insait long wara tasol. God Yawe i mekim ol i go insait long namel tru. ²⁸ Na wara i kam bek na karamapim Fero wantaim ol karis, ol soldia na olgeta ami. God Yawe i mekim solwara i karamapim ol karis na soldia bilong Fero. Na i nogat wanpela i stap laip. ²⁹ Tasol ol Isreal i wokabut long drai graun namel long solwara. Na wara i kamap olsem banis long han kais na long han sut. ³⁰ Olsem na God Yawe i helpim ol Israel long han bilong ol Isip na ol Isreal i lukim ol bodi bilong Isip i dai pinis i stap nambaut long nambis. ³¹ Taim ol Isreal i lukim stron bilong God Yawe na wanem em i mekim long ol Isip, ol i givim biknem long em na putim bilip long God Yawe na long wokman bilong em Moses.