¹ God Yawe, i toktok long Moses na Aron long graun bilong ol Isip. Em i tok, ² "Long yupela, dispela mun bai i kamap stat bilong olgeta mun na namba wan mun bilong yia. ³ Tokim ol manmeri bilong ol lain Israel, 'Long namba 10-dei bilong dispela mun olgeta wanwan ol i mas kisim wanpela yangpela sipsip o yangpela memek bilong ol yet, ol wanwan famili i mas mekim dispela, wanpela yangpela sipsip long wanwan haus. ⁴ Sapos wanpela famili i liklik tumas long kaikai wanpela sipsip, ol i ken kisim ol narapela lain husat i stap klostu long ol na ol i ken kisim sipsip o mit bilong yangpela meme, we em bai inap long olgeta i ken kaikai. Em i mas inap long olgeta lain manmeri long kaikai, olsem na ol i mas kisim inap mit long olgeta bai kaikai. ⁵ Dispela yangpela sipsip o meme bilong yupela em i mas nogat asua, em i mas wan pela krismas na em i mas man. Na Yupela i ken kisim wanpela tasol, sipsip o meme. ⁶ Yupela i mas lukautim i stap i go inap long dei 14 bilong dispela mun. Bihain olgeta manmeri bilong Israel i mas kilim ol dispela animol long taim tulait i bruk . ⁷ Yupela i mas kisim sampela blut bilong em na putim long tupela sait post na antap long dua bilong haus we bai yupela i kaikai dispela abus long en. ⁸ Yupela i mas kaikai dispela abus long dispela nait, bihain long taim yupela kukim antap long paia. Kaikai wantaim bret i no gat yis na wantaim ol pait samting. ⁹ Noken kaikai nupela o boilim long wara. Nogat, kukim antap long paia wantaim het na lek na olgeta bel bilong en. ¹⁰ Yupela i no ken larim wanpela hap i stap i go inap long tulait. Ol haphap abus i stap, em long monin yupela mas kukim olgeta. ¹¹ Taim yupela kaikai, yupela mas pasim let bilong yupela na putim su long lek bilong yupela na holim stik bilong wokabaut long han. Yupela mas kaikai hariap. Dispela em i Pasova bilong God Yawe. ¹² God Yawe i tok olsem, bai Mi wokabaut long olgeta hap graun bilong Isip long dispela nait na kilim olgeta namba wan pikinini man bilong ol man na animol wantaim, insait long Isip. Bai mi bagarapim olgeta giaman god bilong Isip. Mi God Yawe. ¹³ Dispela blut bai i stap olsem mak long haus bilong yupela na bai mi lukim taim mi kam. Taim mi lukim dispela blut, bai mi abrusim yupela long taim mi bagarapim graun bilong Isip. Dispela bagarap bai i no inap kamap long yupela na bagarapim yupela. ¹⁴ Dispela dei bai i kamap wanpela dei we yupela i mas tingim, we yupela i mas luksave na mekim kaikai na amamas i go long God Yawe. Em bai i stap olgeta taim olsem lo bilong yupela na long olgeta lain tumbuna i kamap bihain, olsem yupela i mas tingim dispela dei. ¹⁵ Yupela bai kaikai bret i no gat yis insait long 7-pela dei. Long namba wan dei bai yupela rausim olgeta yis long ol haus bilong yupela. Husat man o meri ol i kaikai bret i gat yis long namba wan dei, i go inap long namba 7-dei, ol i mas rausim ol dispela man o meri long Israel. ¹⁶ Long namba wan dei bai i gat wanpela bum bilong mi bai kamap na long namba 7-dei bai i gat wankain bung bai i kamap ken. Nogat wanpela wok bai i kamap long ol dispela dei, wanpela wok tasol yupela i ken mekim em long kukim ol kaikai bilong olgeta man na meri long kaikai. Dispela wok tasol em yupela i mas mekim. ¹⁷ Yupela i mas luksave na amamas long dispela kaikai bilong Pasova Bret long wanem em long dispela dei mi bin kisim ol lain bilong yupela i kam aut long graun bilong ol lain Isip. Olsem na yupela i mas amamas long dispela dei wantaim ol lain tumbuna bilong yupela i kam bihain. Dispela bai i kamap olsem lo bilong yupela. ¹⁸ Yupela i mas kaikai pasova bret long monin tru, taim tulait i bruk, long 14-dei bilong namba wan mun bilong dispela yia, i go inap long monin tru, taim tulait i bruk long 21-dei bilong dispela mun. ¹⁹ Insait long dispela 7-pela dei, i nogat wanpela yis bai i stap insait long ol haus bilong yupela. Husat man o meri i kaikai bret ol i wokim wantaim yis, ol bai i rausim ol long lain bilong Israel, maski sapos yu bin kamap long arapela ples autsait long Israel o yu bin kamap insait long Israel. ²⁰ Yupela i noken kaikai wanpela samting ol i wokim wantaim yis. Long wanem hap yupela i stap long en, yupela i mas kaikai bret i nogat yis. ²¹ Bihain Moses i singautim olgeta hetman bilong Israel na i tokim ol olsem, "Go na makim sipsip we bai inap long ol famili bilong yupela bai kaikai na kilim dispela Passova sipsip." ²² Na kisim sampela lip i save holim wara na putim i go insait long dis i gat blut long en. Kisim dispela blut long lip na putim antap long het bilong dua na tupela sait pos bilong dua. Nogat wanpela bilong yupela bai i go autsait long dispela dua bilong haus inap long tulait. ²³ God Yawe bai i kam na pait long ol lain Isip. Na taim em i lukim blut long het bilong dua na long sait sait pos bilong dua, em bai i abrusim dua bilong yupela na em bai i no inap larim samting bilong bagarapim man i kam insait long haus na kilim yupela. ²⁴ Yupela i mas luksave na amamasim dispela dei. Dispela bai i kamap olsem Lo bilong yupela na ol lain tumbuna bilong yupela oltaim. ²⁵ Taim yupela i go insait long dispela graun God Yawe i laik givim long yupela olsem em i tok promis long mekim, yupela i mas luksave na bihainim dispela pasin bilong lotu. ²⁶ Taim ol pikinini bilong yupela ol i askim yupela olsem, "Dispela ol kain pasin bilong lotu long God Yawe em i minim wanem samting?, ²⁷ yupela i mas tokim ol olsem, "dispela em i ofa bilong Pasova bilong God Yawe, bilong wanem God Yawe i bin abrusim haus bilong ol lain Israel long Isip taim em i bagarapim ol lain Isip. Em i lusim ol Israel i go fri.'" Bihain ol manmeri i brukim skru na i lotuim God Yawe. ²⁸ Ol Israel i go na i bihainim stret wanem samting God Yawe i tokim Moses na Aron. ²⁹ Em i kamap long biknait taim God Yawe i kilim i dai olgeta namba 1-pikinini man bilong ol Isip, stat long namba 1- pikinini bilong Fero, husat i sindaun long sia king, i go inap long olgeta namba 1- pikinini bilong man husat i stap insait long kalabus tu na olgeta namba 1- pikinini bilong ol animol. ³⁰ King Fero i kirap long nait, em wantaim olgeta wokboi bilong en na olgeta lain bilong Isip. Bikpela krai i kamap long Isip, bilong wanem namba 1- pikinini man i dai long olgeta haus. ³¹ King Fero i singautim Moses na Aron long nait na i tok olsem, "Kirap na lusim ol lain bilong mi na go, yu wantaim ol lain bilong yu. Go na lotu long God Yawe olsem yu bin tok long mekim. ³² "Kisim ol animol bilong yupela olsem yu bin askim long en na go! Na askim God Yawe long blesim mi tu." ³³ Ol Isip i tokim ol Israel long lusim ples bilong ol hariap, bilong wanem ol i tok, "Sapos yupela i no mekim olsem bai mipela olgeta i dai." ³⁴ Olsem na ol i kisim ol bret bilong ol we i no gat yis long em. Ol dis bilong wokim ol plaua em ol i pasim pinis long klos na solda bilong ol. ³⁵ Nau ol manmeri bilong Israel ol i mekim olsem Moses i tokim ol long en. Ol i askim ol lain Isip long ol samting ol i mekim long silva na gol na ol klos. ³⁶ God Yawe i kirapim bel bilong ol lain Isip long amamasim ol lain Israel. Olsem na ol lain Isip ol i givim olgeta samting ol i askim long en. Long dispela rot, ol Israel i kisim olgeta kago bilong ol Iain Isip. ³⁷ Ol Israel i wokabaut long Ramases i go long Sukot. Namba bilong ol em i klostu 600,000 man antap long ol meri na pikinini. ³⁸ Ol bikpela lain manmeri ol i no bilong ol lain Israel ol i go wantaim ol. Ol i kisim tu ol animol bilong ol, sipsip na meme na bulmakau. ³⁹ Long rot ol i mekim bret i no gat yis long plaua ol i kisim i kam long Isip. Em i no gat yis long wanem ol i kam aut long Isip hariap tru na i no gat taim long putim yis. ⁴⁰ Ol lain Israel i bin stap long Isip inap long 430 yia. ⁴¹ Long pinis bilong 430 yia, long dispela dei, olgeta lain manmeri bilong God Yawe i lusim graun bilong ol Isip. ⁴² Dispela em i wanpela nait we ol lain Israel ol i no silip. Ol i kirap na weit i stap long God Yawe, long kisim ol i kam aut long graun bilong ol Isip. Dispela em nait bilong God Yawe we olgeta ol lain Israel ol i mas luksave na amamas long en, i go long ol lain tumbuna bilong ol tu. ⁴³ God Yawe i tokim Moses na Aron olsem, "Hia em i Lo bilong Pasova, i no gat wanpela manmeri bilong narapela hap bai kaikai long dispela pasova kaikai." ⁴⁴ Tasol ol wokboi bilong ol lain Israel husat ol i baim long mani na husat ol i katim skin bilong ol pinis, em ol i ken kaikai. ⁴⁵ Ol lain bilong narapela hap na ol wokboi ol i bin kisim ol bilong wok long ol bai i no inap kaikai wanpela hap bilong dispela kaikai. ⁴⁶ Ol i mas kaikai dispela kaikai insait long wanpela haus tasol. Na ol i no ken kisim wanpela mit i kam autsait long haus. Na noken brukim wanpela bun bilong ol. Olgeta kominiti long Israel i mas mekim olsem. ⁴⁷ Olgeta lain manmeri insait long Israel ol i mas luksave na amamasim dispela dei. ⁴⁸ Sapos wanpela man long narapela hap i stap wantaim yu na i laik luksave na amamasim Pasova i go long God Yawe, olgeta man long lain bilong em i mas katim skin bilong ol. Bihain em i ken kam na amamas wantaim. Em bai i kamap olsem wanpela lain bilong Israel olsem mama i bin karim long Israel. Ol man husat i no katim skin bilong ol bai i no inap long kaikai dispela kaikai. ⁴⁹ Dispela Lo tasol bai i stap namel long ol lain tru bilong Israel na long ol lain bilong narapel hap we i stap namel long yupela." ⁵⁰ Olsem na olgeta lain Israel ol i bihainim olgeta samting God Yawe i tokim Moses na Aron long en. ⁵¹ .Na long dispela dei tasol God Yawe i kisim ol lain Israel i kam aut long Isip bihainim wan wan famili lain bilong ol.