¹ Nau insait long namba 12 mun, em i mun Ada, long namba 13-dei, taim ol lo bilong King ol i laik putim aut, long dispela dei ol birua bilong ol lain Juda i redi long bosim na lukautim ol, tasol dispela i tanim. Ol Juda i bosim ol lain husat ino save laikim ol. ² Ol Juda i bung insait long ol biktaun bilong ol long olgeta provins bilong king Ahaserus bilong pait long ol lain husat i laik bringim bagarap antap long ol. Nogat wanpela man bai sanap long pait wantaim ol bilong wanem pret i kisim olgeta manmeri. ³ Olgeta ofisa bilong ol provins, ol gavana bilong ol provins, ol gavana na ol man i save lukautim ol samting bilong king i helpim ol Juda bilong wanem ol i pret long Modekai. ⁴ Modekai em i stap bikman insait long haus bilong King na biknem bilong em i go long olgeta provins olsem Modekai i wok long kamap strong tru. ⁵ Ol Juda i go pait long ol birua bilong ol wantaim bainat na kilim na bagarapim ol na mekim wanem samting ol i laik mekim long ol lain i no save laikim ol. ⁶ Insait long strongpela banis bilong bik taun Susa yet, ol Juda i kilim na bagarapim 500 man. ⁷ Ol i kilim Parsandata, Dalfon na Aspata. ⁸ Porata, Adalia na Aridata, ⁹ Parmasta, Arisai, Aridai na Vaisata, ¹⁰ na ol 10-pela pikinini man bilong Haman, pikinini man bilong Hamedata, birua bilong ol Juda. Tasol ol i no kisim ol kago na moni bilong ol. ¹¹ Long dispela dei namba bilong ol lain ol i bin kilim insait long strongpela banis bilong Susa, ol i toksave i go long king. ¹² King i tokim Kwin Esta. Ol Juda i kilim 500 man insait long strongpela banis bilong Susa, wantaim ol 10-pela pikinini man bilong Haman. Wanem gen bai ol i mekim long olgeta provins bilong king? Nau wanem moa em askim bilong yu? Em bai mi givim long yu. ¹³ Esta i tok, "Sapos em inapim tru laik bilong king, larim ol Juda husat i stap insait long Susa bai i ken karim ol lo bilong dispela dei igo moa long tumoro tu na larim ol bodi bilong 10-pela pikinini man bilong Haman bai hangamap long diwai bilong hangamapim ol man." ¹⁴ Olsem na king i tok orait long ol dispela samting bai kamap. Ol i kisim tok orait insait long Susa na ol i hangamapim 10-pela pikinini man bilong Haman. ¹⁵ Ol Juda husat i stap long Susa i kam bung wantaim long namba 14-dei bilong mun Adar na kilim 300 moa man insait long Susa. Tasol ol i no kisim ol kago na moni bilong ol. ¹⁶ Olgeta lain Juda husat i stap insait long ol provins bilong king i kam bung wantaim long pait long laip bilong ol na ol i kisim bel isi long ol birua bilong ol na kilim 75,000 bilong ol lain husat i no save laikim ol, tasol ol i no putim han antap long ol gutpela kago samting bilong ol lain ol i bin kilim. ¹⁷ Dispela i kamap long namba 13- dei bilong mun Adar. Long namba 14 -dei ol i malolo na mekim dispela de olsem de bilong mekim bikpela kaikai na amamas. ¹⁸ Tasol ol Juda husat i stap insait long Susa i kam bung wantaim long namba 13-dei na namba 14-dei. Long namba 15-dei ol i malolo na mekim olsem dei bilong mekim bikpela kaikai na amamas. ¹⁹ Dispela em i as tingting ol Juda i stap long ples na husat i mekim haus long ol liklik taun i save lukim namba 14-dei bilong mun Adar olsem dei bilong amamas na mekim bikpela kaikai na olsem dei bilong givim presen i go i kam long wanpela arapela. ²⁰ Modekai i raitim ol dispela samting na salim pas i go long olgeta Juda husat i stap insait long olgeta provins bilong King Ahaserus long ples i stap klostu na longwe, ²¹ givim tok long ol Juda i mas tingim 14 na15-de bilong mun Adar long olgeta yia. ²² Em ol dispela dei taim ol Juda i kisim bel isi long ol birua bilong ol na mun taim wari bilong ol i tanim na kamap amamas na krai bilong ol bai tanim i go long dei bilong amamas. Ol bai mekim ol dispela dei i kamap olsem dei bilong pati na amamas na givim kaikai olsem presen i go long wanpela arapela na givim presen i go long ol manmeri i sot long samting. ²³ Olsem na ol Juda i no malolo long mekim pati na amamas ol i bin statim, ol i mekim olsem Modekai i bin raitim pas i go long ol. ²⁴ Long dispela taim, Haman pikinini man bilong Hamedata bilong kantri Agag em birua bilong olgeta Juda i pasim tok long bagarapim ol Juda na em i tromoi Pur long brukim na bagarapim ol. ²⁵ Tasol taim ol dispela tok i kamap long yau bilong King, em i raitim pas na tok orait olsem ol dispela tingting nogut Haman i kamapim long bagarapim ol Juda mas tanim i kam long het bilong em yet olsem na em yet wantaim ol pikinini man bilong em i mas hangamap long diwai bilong hangamapim ol man. ²⁶ Olsem na ol i kolim dispela ol dei Purim bihainim nem Pur. Bilong wanem olgeta samting ol i raitim insait long dispela pas na olgeta samting ol i bin lukim na i bin kamap long ol, ²⁷ ol Juda i tok orait long nupela kastom na wok bilong ol. Dispela kastom em bilong ol tasol, ol tumbuna pikinini bilong ol na olgeta manmeri husat i bihainim ol. Ol bai i amamasim dispela tupela dei long olgeta yia. Ol bai amamas long laik bilong ol yet na long wankain taim long wanwan yia. ²⁸ Dispela em ol dei ol i mas amamasim na lukim na bihainim long olgeta lain pikinini, olgeta femili, olgeta provins na olgeta biktaun. Dispela ol Juda na ol lain pikinini bilong ol bai i no inap stop long tingim na lukim ol dispela dei bilong Purim, olsem na ol bai i no inap long lusim tingting long ol. ²⁹ Kwin Esta, pikinini meri bilong Abihail na Modekai man Juda i rait wantaim olgeta strong na pawa bilong strongim dispela namba tu pas bilong Purim. ³⁰ Ol i salim ol pas i go long olgeta Juda insait long 127 provins long kingdom bilong Ahasuerus wantaim gutpela tingting na tok tru. ³¹ Dispela ol pas i strongim ol dei bilong Purim long taim ol i makim, Modekai man bilong Juda na Kwin Esta i tokim ol Juda long bihainim. Ol Juda i orait long bihainim long ol yet na ol pikinini bilong ol wankain olsem ol i orait long taim bilong lusim kaikai na sori. ³² Dispela tok oda bilong Esta i strongim dispela lo bilong Purim na ol i raitim i go insait long buk.