¹ Taim Devit pinis long toktok wantaim Sol, orait, bel bilong Jonatan i pas long Devit, na Jonatan i laikim em olsem brata tru bilong em yet. ² Sol i kisim Devit long wok wantaim em stat long dispela dei, em i no larim em i go bek long haus bilong papa bilong em. ³ Bihain Jonatan na Devit i mekim kontrak wantaim bilong kamap gutpela pren long wanem Jonatan i laikim tumas em olsem em brata tru bilong em yet. ⁴ Jonatan i rausim longpela klos bilong en na givim i go long Devit wantaim klos pait bilong em, na tu wantaim bainat, bunara na let. ⁵ Devit i go raun long olgeta hap Sol i salim em, na i mekim gut long olgeta samting. Olsem na Sol i makim em bilong lukautim olgeta man bilong pait. Dispela pasin i gutpela long ai bilong olgeta manmeri na tu long lukluk bilong ol wokman bilong Sol. ⁶ Taim ol i kam bek long ples bihain long ol winim pait wantaim Filistia, ol meri i kam long olgeta biktaun bilong Israel, ol i singsing amamas na danis long bungim king Sol, wantaim ol tambarin na ol kain kundu samting bilong mekim musik. ⁷ Ol meri i singim song na amamas wantaim. Ol i singim song olsem, "Sol i kilim tausen man tasol Devit i kilim 10 tausen. ⁸ Sol i belhat nogut tru taim em harim ol singim dispela song. Em i tok, "Ol i apim nem bilong Devit long 10 tausen tasol long mi, tausen tasol. Na wanem narapela samting moa long sia bilong mi olsem king?" ⁹ Sol i putim ai long Devit wantaim tingting nogut stat long dispela dei na i go. ¹⁰ Na long de bihain spirit bilong givim hevi i kam long God Yawe kwiktaim i go long Sol na em i kamap longlong insait long haus. Olsem na Devit i paitim gita olsem em i save mekim olgeta dei. Sol i holim spia long han. ¹¹ Sol i tromoi spia na em i tingting olsem, "Nau bai mi sutim Devit long spia na nilim em long banis." Tasol Devit abrusim spia bilong Sol tupela taim long dispela rot. ¹² Sol i stat long pret long Devit long wanem God Yawe i stap wantaim em, tasol em i lusim pinis Sol. ¹³ Olsem na Sol i rausim em long haus bilong king na makim em i kamap komanda bilong 1000 soldia. Long dispela as Devit i kam aut na i kisim ol man i go i kam long pait. ¹⁴ Devit i kamap gutpela moa long ol pasin bilong em, long wanem God Yawe i stap wantaim em. ¹⁵ Taim Sol i lukim olsem em i kamap gutpela moa, em i stat long pret long em. ¹⁶ Tasol olgeta manmeri bilong Israel na Juda i laikim tru Devit, long wanem em i save i go i kam long ai bilong ol manmeri. ¹⁷ Na Sol i tokim Devit, "Namba wan pikinini meri bilong mi Merab i stap hia. Bai mi givim em long yu olsem meri bilong yu. Yu noken pret, wanpela rot tasol long harim tok bilong mi na winim pait bilong God Yawe ." Sol i tingting pinis olsem, "Larim mi noken kilim em, tasol larim em long han bilong ol Filistia bai ol i ken kilim em." ¹⁸ Devit i tokim Sol, "Mi husait na ol famili lain bilong mi o wanlain bilong papa bilong mi ol i husat long Israel, olsem mi bai kamap tambu pikinini man bilong king?" ¹⁹ Tasol long dispela taim i kamap bilong Merab, pikinini meri bilong Sol, em inap long maritim Devit, tasol ol i givim em i go long Adriel bilong taun Mehola olsem meri bilong em. ²⁰ Tasol Mikal, narapela pikinini meri bilong Sol i laikim tumas Devit. Ol i tokim Sol na dispela i mekim em i amamas tru. ²¹ Na Sol i ting "Mi bai givim dispela pikinini meri long em, long giamanim em na kamap olsem trap bilong em, na nau ol man Filistia bai kilim em." Olsem na Sol i tokim Devit namba tu taim gen, "Yu bai kamap tambu pikinini man bilong mi." ²² Sol i givim oda long ol wokman, "Yu hait na tokim Devit olsem, harim, king i belgut long yu na olgeta wokman tu i laikim yu. Nau yu i ken kamap tambu pikinini man bilong king." ²³ Olsem na wokman bilong Sol i tokim dispela tok long Devit. Bihain Devit i tok,"Yu ting em i liklik samting long yu kamap olsem tambu pikinini man bilong king, mi olsem rabis man na ol manmeri i no laikim mi tumas?" ²⁴ Ol wokman bilong Sol i kam bek na tokim em long ol tok Devit i bin tok. ²⁵ Bihain Sol i tokim ol wokman, "Tokim dispela tok long Devit, 'King i no laikim yu givim sampela samting olsem pe bilong pikinini meri, tasol 100 skin bilong kok bilong ol Filistia, olsem bekim bilong ol birua bilong king." Nau Sol i tingim pinis long mekim Devit i ken i dai long han bilong ol Filistia. ²⁶ Taim ol wokman bilong em i tokim Devit dispela ol tok, em i mekim Devit i amamas long kamap olsem tambu pikinini man bilong king. ²⁷ Pastaim long ol dispela dei i no pinis yet, Devit i go wantaim ol soldia bilong em na kilim 200 man Filistia. Devit i kam bek na bringim ol skin bilong kok bilong ol na givim olgeta namba ya i go long king, olsem long em inap kamap tambu pikinini man bilong king. Olsem na Sol i givim em Mikal pikinini meri bilong em olsem meri bilong Devit. ²⁸ Taim Sol i lukim , na em i save olsem God Yawe i stap wantaim Devit, na long dispela as Mikal, pikinini meri bilong king i laikim em tru, ²⁹ Sol tu i poret moa yet long Devit. Sol i wok strong yet long birua long Devit. ³⁰ Bihain ol pikinini bilong king bilong Filistia kam gen long pait, olsem olgeta taim ol i save kam aut long pait, Devit i kamap gutpela moa long olgeta wokman bilong Sol, olsem na ol i save givim biknem nem long en.