¹ Ahap i tokim Jesebel long olgeta samting Elaisa i bin mekim na em i tokim em olsem em i kilim olgeta profet long bainat. ² Na Jesebel i salim man bilong toksave igo tokim Elaisa olsem, ''Inap ol god i ken mekim sampela samting long mi , sapos mi ino mekim laip bilong yu i kamap olsemlaip bilong ol dispela dai profet bai olsem wanem long tumoro. ³ Taim Elaisa i harim dispela tok, em i kirap na ranawe igo long Besiba long hap bilong ol Juda na i lusim wokman bilong em long hap. ⁴ Na em yet i wokabaut inap long wanpela dei olgeta igo long ples nating na em igo sindaun aninit long wanpela diwai brum. Em i beten olsem na em yet i mas idai, na em i tok, ''God Yawe, mi inap pinis, yu rausim laip bilong mi, mi ino gutpela man na i winim ol tumbuna bilong mi.'' ⁵ Na em igo sindaun aninit long wanpela diwai brum na em i slip. Wantu tasol wanpela Ensel i kam holim em na i tokim em, ''Yu kirap na kaikai.'' ⁶ Elaisa i opim ai bilong em na i lukim wanpela bret ol i kukim pinis long ston na wanpela botol wara istap klostu long het bilong em. Em i kaikai na dring pinis na em i slip gen. ⁷ Ensel bilong God Yawe i kam gen namba tu taim na i holim em na i tok, ''Yu kirap na kaikai, rot bai yu go long en i longwe na bai longpela rot long yu." ⁸ Olsem na em i kirap na i kaikai na dring na em i wokabaut long strong bilong dispela kaikai inap long 40-pela dei na 40-pela nait igo kamap long Horeb, em maunten bilong God. ⁹ Em igo stap insait long wanpela hul bilong ston long hap. Na tok bilong God Yawe i kam long em na i tokim em, "Elaisa yu kam mekim wanem long hia?'' ¹⁰ Elaisa i bekim tok olsem, ''Mi save strong tru long ol Israel i bihainim yu God Yawe, God i gat olgeta strong, wanpela tasol. Tasol ol Israel i givim baksait long kontrak yu bin mekim wantaim ol na ol i brukim ol alta bilong yu na kilim ol profet bilong yu long bainat. Nau mi wanpela tasol istap na ol i laik kilim mi tu.'' ¹¹ God Yawe i bekim tok olsem, ''Yu go ausait long maunten na sanap long pes bilong mi.'' Nau God Yawe i kam igo na strongpela win tru i ron long maunten na i brukim ol ston i go liklik long pes bilong God Yawe, tasol God Yawe i no stap insait long win. Bihain long win guria i kam, tasol God Yawe i no stap insait long guria. ¹² Na bihain long guria, paia i kam, tasol God Yawe ino stap insait long paia. Na bihain long paia na tu wanpela liklik nek i kam. ¹³ Taim Elaisa i harim dispela nek, em i karamapim pes bilong em long saket bilong em na igo ausait na sanap long maus bilong hul bilong ston. Na em i harim wanpela nek i tokim em olsem, ''Elaisa, yu kam mekim wanem long hia?'' ¹⁴ Elaisa i bekim tok olsem, ''Mi save strong tru long ol Israel i bihainim yu God Yawe, God i gat olgeta strong wanpela tasol. Tasol ol Israel i givim baksait long kontrak yu bin mekim wantaim ol na ol i brukim ol alta bilong yu na kilim ol profet bilong yu long bainat. Nau mi wanpela tasol i stap na ol i laik kilim mi tu." ¹⁵ Na God Yawe i tokim em olsem, ''Yu go bek long rot yu bin kam long en na igo long ples drai bilong Damaskas na taim yu kamap, yu mas kapsaitim wel long het bilong Hasael long kamap king bilong Aram, ¹⁶ na yu bai kapsaitim wel long het bilong Jehu, pikinini bilong Nimsi long kamap king bilong Israel na bai yu kapsaitim wel long het bilong Elisa, pikinini bilong Sapat bilong Abel Mehola long kisim ples bilong yu na kamap profet. ¹⁷ Em bai kamap long taim wei Jehu bai kilim ol lain i ranawe long bainat bilong Hasael na Elisa bai kilim ol lain i ranawe long bainat bilong Jehu. ¹⁸ Tasol bai mi larim 7000-manmeri bilong mi yet i stap long Israel, em dispela ol lain ino bin brukim skru long Baal na maus bilong ol i no kis long em.'' ¹⁹ Orait Elaisa i lusim dispela hap na igo kamap long Elisa pikinini bilong Sapat, em i wok long brukim graun wantaim 12-pela bulmakau. Elaisa i wokabaut igo long Elisa na putim saket long em. ²⁰ Na Elisa i lusim ol bulmakau na i go bihainim Elaisa, na em i tok, " Inap mi go tok gutbai long papa na mama bilong mi na bai mi kam bihaim yu?" Orait EIaisa i tok, "Yu ken igo bek, tasol yu mas tingim wanem mi mekim long yu." ²¹ Orait Elisa i lusim Elaisa na igo bek na kilim bulmakau na kukim mit long hap plang bilong pasim long nek bilong bulmakau. Na em i givim ol manmeri na ol i kaikai. Orait em i kirap igo bihainim EIaisa na kamap wokman bilong em.